ໃນຕອນເຊົ້າວັນທີ 13 ມິຖຸນາ 2023 ທີ່ຫ້ອງປະຊຸມສະພາປະຊາຊົນແຂວງສະຫວັນນະເຂດ ໄດ້ຈັດກອງປະຊຸມເຜີຍແຜ່, ເຊື່ອມຊຶມເອກະສານວ່າດ້ວຍການຈັດຕັ້ງຜັນຂະຫຍາຍເນື້ອໃນຈິດໃຈຂອງກອງປະຊຸມສະຫຼຸບວຽກງານຕິດຕາມກວດກາຂອງຄະນະພັກແຂວງ ສະໄໝທີ IX ພາຍໃຕ້ການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ມີບັນດາທ່ານ ຮອງປະທານສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງພ້ອມດ້ວຍວິຊາການພາຍໃນສະພາປະຊາຊົນແຂວງເຂົ້າຮ່ວມ, ຊຶ່ງໃນວາລະກອງປະຊຸມໄດ້ຮັບຟັງການລາຍງານກ່ຽວກັບການເຄື່ອນໄຫວຂອງຄະນະພັກຮາກຖານສະພາປະຊາຊົນແຂວງ ຈາກທ່ານ ນາງ ພູທອນ ແກ້ວພູວົງ ຄະນະພັກຮາກຖານສະພາປະຊາຊົນແຂວງ, ຮອງປະທານສະພາປະຊາຊົນແຂວງ

ຈາກນັ້ນ, ປະທານສະພາປະຊາຊົນແຂວງ ກໍ່ໄດ້ເຜີຍແຜ່ເນື້ອໃນເອກະສານຂອງກອງປະຊຸມສະຫຼຸບວຽກງານຕິດຕາມກວດກາຂອງຄະນະພັກແຂວງ ແລະ ຄໍາສັ່ງແນະນໍາຂອງຄະນະເລຂາທິການສູນກາງພັກ ສະບັບເລກທີ 169/ຄລສພ, ລົງວັນທີ 15 ສິງຫາ 2022 ກ່ຽວກັບການເພີ່ມທະວີການນໍາພາ-ຊີ້ນໍາ ຕໍ່ການເຄື່ອນໄຫວວຽກງານກວດກາ ແລະ ແກ້ໄຂຜົນການກວດກາ ຕື່ມອີກ.

ໃນຕອນທ້າຍຂອງກອງປະຊຸມດັ່ງກ່າວ ທ່ານ ປະທານສະພາປະຊາຊົນແຂວງ ກໍ່ໄດ້ມີຄໍາເຫັນໂອ້ລົມຕໍ່ບັນດາເລຂາໜ່ວຍພັກ, ສະມາຊິກພັກ, ພະນັກງານ-ລັດຖະກອນ ຕ້ອງເອົາໃຈໃສ່ໃນການປະຕິບັດໜ້າທີ່ວຽກງານທີ່ການຈັດຕັ້ງກໍ່ຄືວຽກງານຄະນະພັກທີ່ໄດ້ນໍາພາ-ຊີ້ນໍາ ໃຫ້ສໍາເລັດ ແລະ ບັນດາທ່ານສະມາຊິກພັກ ກໍ່ຕ້ອງເອົາໃຈໃສ່ເປັນເຈົ້າການເຄື່ອນໄຫວວຽກງານຕິດຕາມກວດກາ ເພື່ອເປັນການຍົກສູງການນໍາພາຂອງພັກ ແລະ ເຮັດໃຫ້ສະພາປະຊາຊົນແຂວງ ມີຄວາມເຂັ້ມແຂງຫຼາຍຂຶ້ນກວ່າເກົ່າ. (ພາບ ແລະ ຂ່າວ: ສະຫວັດດີ ສີບຸນເຮືອງ)