(ສພຊ) ວັນທີ 22 ເມສາ 2022 ທີ່ສະພາແຫ່ງຊາດ, ທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ໂພລ ເຄລີ (Paul Kelly) ເອກອັກຄະລັດຖະທູດ ແຫ່ງ ອົດສະຕຣາລີ ປະຈໍາ ສປປລາວ ພ້ອມດ້ວຍຄະນະ.
ໃນໂອກາດນີ້, ທ່ານ ປອ. ລີເບີ ລີບົວປາວ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງ ຕໍ່ທ່ານເອກອັກຄະລັດຖະທູດ ແຫ່ງ ອົດສະຕຣາລີ ປະຈໍາ ສປປລາວ ທີ່ໄດ້ສະຫລະເວລາອັນມີຄ່າມາພົບປະໃນຄັ້ງນີ້ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ອົດສະຕຣາລີ, ສະພາແຫ່ງຊາດລາວ ກໍມີການພົວພັນອັນດີງາມ ກັບລັດຖະສະພາອົດສະຕຣາລີ ໃນໄລຍະຜ່ານມາ ສອງປະເທດໄດ້ມີການແລກປ່ຽນຄະນະຜູ້ແທນຂັ້ນສູງນໍາກັນ; ນອກຈາກນີ້, ອົດສະຕຣາລີ ກໍເປັນໜຶ່ງໃນຄູ່ຮ່ວມພັດທະ ນາຢູ່ລາວ, ປະກອບສ່ວນສໍາຄັນເຂົ້າໃນການພັດທະນາຂອງລາວ ໂດຍສະເພາະໃນຂົງເຂດການພັດທະນາຊັບພະຍາ ກອນມະນຸດ ແລະ ໃນປີ 2022 ນີ້ ແມ່ນຄົບຮອບ 70 ປີ ແຫ່ງວັນສ້າງຕັ້ງສາຍພົວພັນການທູດ ລະຫວ່າງສອງປະເທດ ເຊິ່ງທັງສອງປະເທດ ຈະໄດ້ມີການຈັດກິດຈະກຳເພື່ອສະເຫລີມສະຫລອງວັນສຳຄັນດັ່ງກ່າວ; ພ້ອມນັ້ນ, ທ່ານປະທານ ກໍາມາທິການແຜນການ, ການເງິນ ແລະ ການກວດສອບ ຍັງໃຫ້ຮູ້ວ່າ: ໃນປັດຈຸບັນ ສະພາແຫ່ງຊາດລາວ ແມ່ນສະພາ ແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ເຊິ່ງໄດ້ສໍາເລັດການເລືອກຕັ້ງໃນວັນທີ 21 ກຸມພາ 2021, ມີຈໍານວນສະມາຊິກສະພາແຫ່ງຊາດ ຊຸດທີ IX ທັງໝົດ 164 ທ່ານ ຍິງ 36 ທ່ານ, ສະມາຊິກສະພາ ປະຊາຊົນຂັ້ນແຂວງ ຈໍານວນ 492 ທ່ານ ຍິງ 150 ທ່ານ; ໃນໄລຍະຜ່ານມາ, ສະພາແຫ່ງຊາດ ໄດ້ຈັດກອງປະຊຸມຄັ້ງປະ ຖົມມະລືກ, ກອງປະຊຸມສະໄໝວິສາມັນ ແລະ ກອງປະຊຸມສະໄໝສາມັນເທື່ອທີ 2 ຂອງຕົນ ເຊິ່ງໄດ້ພິຈາລະນາ ແລະ ຮັບຮອງເອົາຫລາຍບັນຫາສຳຄັນຂອງຊາດໃນໄລຍະໃໝ່, ຮັບຮອງເອົາວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງ ຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ແລະ ມາດຕະການແກ້ໄຂຜົນກະທົບຈາກການແຜ່ ລະບາດຂອງພະຍາດໂຄວິດ-19; ປັດຈຸບັນ, ມີກົດໝາຍຈຳນວນ ທັງໝົດ 156 ສະບັບ ໄດ້ຖືກຮັບຮອງໂດຍສະພາແຫ່ງ ຊາດ; ຈາກນັ້ນ, ທັງສອງທ່ານໄດ້ປຶກສາຫາລືກັນກ່ຽວກັບການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປລາວ ແລະ ອົດສະຕຣາລີ ກໍຄື ລະຫວ່າງສອງອົງການນິຕິບັນຍັດ ໃຫ້ໄດ້ຮັບການ ພັດທະນາ ແລະ ຂະຫຍາຍຕົວຍິ່ງໆຂຶ້ນ; ພ້ອມນັ້ນ, ໄດ້ສະແດງຄວາມຊົມເຊີຍ ແລະ ຂອບໃຈ ຕໍ່ທ່ານທູດ ທີ່ໄດ້ເປັນຂົວ ຕໍ່ໃຫ້ແກ່ການພົວພັນຮ່ວມມື ລະຫວ່າງສອງປະເທດ ກໍຄືການຊ່ວຍເຫລືອດ້ານຕ່າງໆໃຫ້ແກ່ ສປປລາວ ໃນໄລຍະຜ່ານ ມາ ໂດຍສະເພາະການຊ່ວຍເຫລືອຜູ້ປະສົບໄພເຫດການໄພນໍ້າຖ້ວມຢູ່ແຂວງອັດຕະປື, ອົດສະຕຣາລີ ຍັງໄດ້ປະກາດ ໃຫ້ການຊ່ວຍເຫລືອ ສປປລາວ ໃນການເຂົ້າເຖິງວັກຊິນປ້ອງກັນພະຍາດໂຄວິດ-19 ແລະ ຊ່ວຍເຫລືອອຸປະກອນທາງ ການແພດ ມູນຄ່າ 19,7 ລ້ານໂດລາອົດສະຕຣາລີ ແລະ ຫວັງຢ່າງຍິ່ງວ່າທ່ານທູດ ຈະສືບຕໍ່ໃຫ້ການຊ່ວຍເຫລືອ ແລະ ຊຸກຍູ້ສົ່ງເສີມການພົວພັນຮ່ວມມື ລະຫວ່າງສອງປະເທດ ກໍຄືລະຫວ່າງສອງອົງການນິຕິບັນຍັດ ໃຫ້ໄດ້ຮັບການພັດ ທະນາຍິ່ງໆຂຶ້ນໃນຕໍ່ໜ້າ.
ໃນຕອນທ້າຍ, ທ່ານ ໂພລ ເຄລີ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງສະແດງ ຄວາມຊົມເຊີຍຕໍ່ການພົວພັນຮ່ວມມືລະຫວ່າງສອງປະເທດ ກໍຄືການຮ່ວມມືລະຫວ່າງສອງອົງການນິຕິບັນຍັດ ອົດສະຕຣາ ລີ-ລາວ ທີ່ນັບມື້ນັບໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)