(ສພຊ) ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 7 ນໍາໂດຍທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ ແລະ ສະມາຊິກສະພາປະຊາຊົນແຂວງໄຊຍະບູລີປະຈຳເມືອງຫົງສາ ພ້ອມດ້ວຍຄະ ນະ ໄດ້ພົບປະພະນັກງານຫຼັກແຫ່ງຂອງເມືອງຫົງສາ ໃນຕອນບ່າຍຂອງວັນທີ 25 ມັງກອນ 2024 ທີ່ສະໂມສອນເມືອງ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ໄຊຍະບູລີ ຊຸດທີ II.
ທ່ານ ຄຳຫຼ້າ ຜິວວັນນາ ເຈົ້າເມືອງໆຫົງສາ ໄດ້ລາຍງານຫຍໍ້ກ່ຽວກັບການນໍາພາ-ຊີ້ນໍາຂອງອົງ ການປົກຄອງເມືອງໃນໄລຍະ 1 ປີຜ່ານມາ ໂດຍໄດ້ສຸມໃສ່ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ຕິດພັນກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ວຽກງານເສດ ຖະກິດ ເປັນຕົ້ນແມ່ນການຜະລິດເຂົ້າ, ການປູກພືດລະດູແລ້ງ ແລະ ການລ້ຽງສັດຂອງປະຊາຊົນ; ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ລວມທັງວຽກງານວັດທະນະທຳ-ສັງຄົມ.
ຈາກນັ້ນ, ສະມາຊິກສະພາ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ສພຂ ໄຊຍະບູລີ ຊຸດທີ II ເຊິ່ງປະກອບມີບັນດາມະຕິ, ກົດ ໝາຍ, ນິຕິກໍາໃຕ້ກົດໝາຍ ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ຜູ້ເຂົ້າຮ່ວມກໍໄດ້ມີການແລກປ່ຽນຄຳຄິດຄຳເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)