(ສພຊ) – ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນທີ 18 ພະຈິກຜ່ານມາ, ທ່ານ ບຸນມີ ພິມມະສອນ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 12 ແຂວງຄຳມ່ວນ ໄດ້ປະກອບຄຳເຫັນຕໍ່ບົດລາຍງານຂອງທ່ານນາຍົກລັດຖະມົນຕີ ເຊິ່ງມີເນື້ອໃນບາງຕອນດັ່ງນີ້:

1. ການຄຸ້ມຄອງການລົງທຶນຂອງເອກະຊົນພາຍໃນ ແລະ ຕ່າງປະເທດ, ທ່ານນາຍົກລັດຖະມົນຕີກໍໄດ້ເວົ້າແລ້ວກ່ຽວກັບມາດຕະການໃນການແກ້ໄຂ, ການສຳປະທານການເຊົ່າເນື້ອທີ່ດິນ ຖືວ່າເດັດຂາດຕົວຈິງ; ເຖິງແນວໃດກໍຕາມ, ການແກ້ໄຂຍັງຊັກຊ້າ, ຍັງມີຫຼາຍໂຄງການທີ່ຈອງໄວຊື່ໆບໍ່ເຮັດຫຍັງ, ບາດຜູ້ມີທຶນ ຢາກມາລົງທຶນກໍມາບໍ່ໄດ້ ຍ້ອນວ່າໂຄງການມີເຈົ້າຂອງຈອງໄວ້ຢູ່ ໂດຍສະເພາະໂຄງການທີ່ຕິດພັນແຫຼ່ງວັດຖຸດິບ ໂດຍສະເພາະແຂວງຄຳມ່ວນ ກໍໄດ້ສະເໜີໃຫ້ບໍລິສັດ ຊີໂນ ເຮັດໂຮງງານປຸ໋ຍ ແຕ່ບໍ່ມີວັດຖຸ (ຖ່ານຫີນ) ສະໜອງໃຫ້ເຂົາເຈົ້າ, ແຕ່ວ່າມີຫຼາຍບໍລິສັດຖ່ານຫີນ ທີ່ມີບໍລິສັດອື່ນຈອງໄວ້ແລ້ວ ແຕ່ເຮົາບໍ່ສາມາດຈະໄປຈັດຕັ້ງປະຕິບັດໄດ້, ບັນຫານີ້ສະເໜີໃຫ້ກະຊວງ, ຂະແໜງການທີ່ກ່ຽວ ຂ້ອງກວດກາຄືນ ບໍ່ວ່າຈະເປັນເລື່ອງຖ່ານຫີນ ບັນຫາເນື້ອທີ່ກໍເຊັ່ນດຽວກັນ. ບັນຫາທີສອງ, ການໃຫ້ສຳປະທານ ຄິດວ່າມັນຫຼາຍໂພດ ຜູ້ໜຶ່ງ 200-300 ເຮັກຕາ, 1,000 ເຮັກຕາ ກໍມີ ແຕ່ເຮັດຕົວຈິງບາງທີບໍ່ຮອດ 100 ເຮັກຕາ.

2. ການແກ້ໄຂຜົນກະທົບຕໍ່ສິ່ງແວດລ້ອມ-ສັງຄົມ: ກອງປະຊຸມສະໄໝສາມັນເທື່ອທີ 7 ກໍໄດ້ເວົ້າແລ້ວ ຍັງມີຫຼາຍໂຄງການໄດ້ຮັບຜົນກະທົບຢູ່ ບໍ່ທັນໄດ້ຮັບການແກ້ໄຂ ໂດຍສະເພາະຢູ່ແຂວງຄຳມ່ວນ ກໍຄືຢູ່ເຂດນ້ຳປະແທ່ນ ເພິ່ນກໍວ່າຈະເຮັດໃຫ້ນ້ຳໃສ ແຕ່ມາຮອດປັດຈຸບັນຍັງຄືເກົ່າ ບໍ່ໄດ້ຮັບການແກ້ໄຂ, ກໍຢາກສະເໜີຕື່ມວ່າຈະມີມາດຕະການແນວໃດກ່ຽວກັບບັນຫາດັ່ງກ່າວ; ນອກນັ້ນ, ກໍຍັງມີໂຄງການອື່ນໆ ຍັງໄດ້ຮັບຜົນກະທົບ.

3. ວຽກງານສຶກສາ: ລູກຫຼານບໍ່ໄປຮຽນກໍຫຼາຍ, ປະລະກໍຫຼາຍ ຈະມີວິທີແກ້ໄຂບັນຫານີ້ແນວໃດ, ຈຶ່ງຢາກສະເໜີວ່າ: ຜ່ານການສຳມະນາວິທະຍາສາດຢູ່ວັງວຽງ ກໍໄດ້ຍົກຂຶ້ນວ່າ ຖ້າຢາກໃຫ້ນັກຮຽນໄປໂຮງຮຽນ ແລະ ຮຽນຈົນຈົບ ຕ້ອງມີການປະສານສົມທົບກັນລະຫວ່າງກະຊວງສຶກສາທິການ ແລະ ກິລາ, ກະຊວງແຮງງານ ແລະ ສະຫວັດດີການສັງຄົມ, ກະຊວງພາຍໃນ ເມື່ອຮຽນຈົບແລ້ວ ກໍຄວນມີວຽກເຮັດ ອາດຈະສົ່ງເສີມວິຊາຊີບໃດໜຶ່ງ ຫຼືວ່າເຈລະຈາກັບບໍລິສັດລົງທຶນພາຍໃນ ຫຼື ເອກະຊົນພາຍໃນ ແລະ ຕ່າງປະເທດ, ຮຽນຈົບໃຫ້ມີອາຊີບ ເຂົາເຈົ້າຈຶ່ງຈະຕັ້ງໃຈຮຽນ; ຖ້າມີແຕ່ຜະລິດອອກມາ ແລະ ບໍ່ໄດ້ເຮັດວຽກເຮັດງານຫຍັງ, ອັນນີ້ກໍໄດ້ຕັ້ງບັນຫາກັນຢູ່ ຄິດວ່າຖ້າມີແຜນຈັດສັນລະອຽດວ່າປີນີ້ຈະມີໂກຕາວິຊາຊີບດ້ານນີ້ເທົ່າໃດ, ການບໍລິການການທ່ອງທ່ຽວເທົ່າໃດ, ເລື່ອງອື່ນໆເທົ່າ ໃດ? ພວກເຮົາຍັງບໍ່ທັນມີແຜນລະອຽດເພື່ອປະສານສົມທົບກັບຜູ້ປະກອບການ. ອີກບັນຫາໜຶ່ງ ຢາກໃຫ້ເບິ່ງຜູ້ໃດທີ່ຮຽນດີຮຽນເກັ່ງໄດ້ໃບປະກາດແດງ ຫຼືວ່າຈົບປະລິນຍາໂທ, ປະລິນຍາເອກ ໂດຍສະເພາະຜູ້ຮຽນເກັ່ງ ຈົບມາແລ້ວ ກໍໃຫ້ບຸລິມະສິດປະກອບວິຊາອາຊີບໃຫ້ເຂົາ, ຖ້າບໍ່ມີວຽກເຮັດ ມັນກໍທໍ້ຖອຍໃຈ ໂດຍສະເພາະພໍ່-ແມ່ ຜູ້ສົ່ງເສີມ.

4. ການແບ່ງຂັ້ນຄຸ້ມຄອງ: ສະເໜີບັນດາກະຊວງທີ່ກ່ຽວຂ້ອງໃຫ້ເບິ່ງຄືນຕື່ມ, ທິດ 3 ສ້າງ ກໍໄດ້ເວົ້າແຈ້ງກ່ຽວກັບການຫັນວຽກລົງສູ່ທ້ອງຖິ່ນຮາກຖານ ເຊິ່ງຍັງຫຼາຍອັນທີ່ກະຊວງຍັງບໍ່ທັນໄດ້ແບ່ງສິດໃຫ້ທ້ອງຖິ່ນຄຸ້ມຄອງ ໂດຍສະເພາະທາງຫຼວງແຫ່ງຊາດ; ສະເໜີວ່າ ທາງຫຼວງແຫ່ງຊາດທີ່ຜ່ານແຂວງໃດ ກໍຄວນມອບໃຫ້ແຂວງນັ້ນຄຸ້ມຄອງທຸກຢ່າງຈະໄດ້ບໍ່, ສ່ວນທຶນໃຫ້ກະຊວງຄຸ້ມຄອງກໍໄດ້ ແຕ່ວ່າສຳຄັນໃຫ້ທ້ອງຖິ່ນຊ່ວຍຕິດຕາມກວດກາວ່າມັນເປ່ເພແນວໃດ, ຈະແປງແນວໃດ? ບໍ່ໃຫ້ເປ່ເພໜັກແລ້ວຈຶ່ງໄປແປງ.