ໃນຕອນເຊົ້າຂອງວັນທີ 27 ກັນຍາ 2022 ທີ່ສະໂມສອນແຂວງຄໍາມ່ວນ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນແຂວງຄໍາມ່ວນ ໄດ້ເຄື່ອນໄຫວໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນແຂວງຄໍາມ່ວນ ຊຸດທີ IIໂດຍການເປັນປະທານຂອງ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງ ພ້ອມດ້ວຍສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ, ເຂົ້າຮ່ວມຮັບຟັງຄັ້ງໃນນີ້ແມ່ນຂົງເຂດ ອົງການກວດກາ, ສານປະຊາຊົນແຂວງ, ໄອຍະການປະຊາຊົນແຂວງ ແລະ ກຳລັງປ້ອງກັນຊາດ – ປ້ອງກັນຄວາມສະຫງົບແຂວງ.

ໃນພິທີ, ທ່ານ ສະເຫຼີມສັກ ແກ້ວຈັນທະລາ  ຄະນະປະຈໍາສະພາປະຊາຊົນແຂວງຄໍາມ່ວນ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 12 ແຂວງຄໍາມ່ວນ ກໍ່ໄດ້ເປັນກຽດ ເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໂດຍທ່ານໄດ້ຍົກໃຫ້ເຫັນກ່ຽວກັບບັນຫາສໍາຄັນຂອງຊາດ ເປັນຕົ້ນວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ ແລະ ການພິຈາລະນາ-ຮັບຮອງເອົາບັນດາກົດໝາຍ, ຮັບຮອງເອົາບົດລາຍງານການຕິດຕາມຄວາມຄືບໜ້າການຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ, ທິດທາງແຜນການຕິດຕາມກວດກາໃນຕໍ່ໜ້າ ແລະ ວຽກງານດ້ານບຸກຄະລາກອນ ທີ່ສະພາແຫ່ງຊາດພິຈາລະນາ-ຮັບຮອງເອົາການຍົກຍ້າຍແຕ່ງຕັ້ງ ບ່ອນປະຈໍາການຄະນະລັດຖະບານ, ຈາກນັ້ນ ທ່ານ ຄໍາສຸກ ວັນທະວົງສາ ຄະນະປະຈໍາສະພາປະຊາຊົນແຂວງ ປະທານຄະນະກຳມະການ ຍຸຕິທໍາ ແລະ ປກຊ-ປກສ ສະພາປະຊາຊົນແຂວງຄໍາມ່ວນ ໄດ້ໃຫ້ກຽດຂຶ້ນເຜີຍແຜ່ກົດໝາຍ ແລະ ນິຕິກຳໃຕ້ກົດໝາຍເປັນຕົ້ນ: ພາລະບົດບາດ, ສິດ ແລະ ໜ້າທີ່ ສະພາປະຊາຊົນຂັ້ນແຂວງຕາມທີກຳນົດໄວ້ໃນກົດໝາຍ ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ; ເປັນອົງການນິຕິບັນຍັດ; ພິຈາລະນາ-ຮັບຮອງ ນິຕິກໍາໃຕ້ກົດໝາຍ, ຕົກລົງບັນຫາສໍາຄັນພື້ນຖານຂອງທ້ອງຖິ່ນ, ຕິດຕາມກວດການການເຄົາລົບ, ປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ ຂອງບັນດາອົງການລັດ.

ໂອກາດດັ່ງກ່າວ  ທ່ານ ບົວພັນ ແສງຈັນ ຮອງປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນໂອ້ລົມ ກ່ຽວກັບວຽກງານການສືບສວນ, ສອບສວນ, ການຈັດຕັ້ງປະຕິບັດຄໍາຕັດສິນຂອງສານ ແລະ ຕິດຕາມ, ຊຸກຍູ້ການຈັດຕັ້ງຜັນຂະຫຍາຍມະຕິກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ກ່ຽວກັບບັນຫາການຈັດຕັ້ງປະຕິບັດ 7 ມາດຕະການສະກັດກັ້ນ ຄວບຄູ່ກັບການແກ້ໄຂບັນຫາຢາເສບຕິດ ຕິດພັນກັບການນໍາໃຊ້ 7 ມາດຕະການ; ການປະຕິບັດສິດ ແລະ ໜ້າທີ່ໃນການຕິດຕາມກວດກາຂອງອົງການໄອຍະການປະຊາຊົນ ຕໍ່ການປະຕິບັດກົດໝາຍ ໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ ແລະ ການປະຕິບັດລັດຖະທໍາມະນູນ ແລະ ກົດໝາຍ ຂອງກຳລັງ ປກຊ-ປກສ ແມ່ນເພື່ອສືບຕໍ່ປັບປຸງຄຸນນະພາບຂອງການນໍາໃຫ້ນັບມື້ນັບດີຂຶ້ນເລື້ອຍໆ ເພາະກໍາລັງທີ່ຕັດສິນຄວາມໝັ້ນຄົງຂອງ ຊາດ ແມ່ນສອງກໍາລັງນີ້ ເຊິ່ງໄລຍະຜ່ານມາສາມາດກໍາໄດ້ສັດຕູກຸ່ມເປົ້າໝາຍ, ກຸ່ມຄົນບໍ່ຫວັງດີທີ່ຫວັງຈະສ້າງ ຄວາມປັ່ນປ່ວນ, ຄວາມບໍ່ສະຫງົບໃນທຸກດ້ານ ແລະຕໍ່ໄປໃຫ້ສືບຕໍ່ເຮັດໃຫ້ດີຕື່ມອີກ, ກໍາແໜ້ນໃຫ້ໄດ້, ວາງແຜນ ໃຫ້ຖືກຕ້ອງ, ກໍາແໜ້ນແນວຄິດຊີ້ນໍາແນວທາງນະໂຍບາຍຂອງພັກໃນການຈັດຕັ້ງປະຕິບັດວຽກງານ, ເອົາໃຈໃສ່ດ້ານ ຄຸນທາດການເມືອງ, ອຸດົມການຂອງພັກ, ອຸດົມການຂອງກໍາລັງປະກອບອາວຸດ ຕິດພັນກັບບັ້ນດໍາເນີນຊີວິດການ ເມືອງປັບປຸງປົວແປງພາຍໃນກໍາລັງ ໃນນາມທີ່ເປັນກໍາລັງປ້ອງກັນຊາດປ້ອງກັນຄວາມສະຫງົບເພື່ອຮັບໃຊ້ປະຊາຊົນ.

ໂດຍ: ເອື້ອ ມະໂນສິງ ( ອາລີ )