ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII, ໃນວັນທີ 14 ມິຖຸນາ ນີ້, ພາຍໃຕ້ການເປັນປະທານ ຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງ ຊາດ ບັນດາສະມາຊິກສະພາ ແຫ່ງຊາດ (ສສຊ) ໄດ້ສຸມໃສ່ປະກອບຄຳເຫັນຕໍ່ຮ່າງກົດໝາຍ ວ່າດ້ວຍນາຍທະຫານກອງທັບ ປະຊາຊົນລາວ ສະບັບປັບປຸງ. ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ໄດ້ຂຶ້ນນຳສະເໜີກ່ຽວກັບການປັບ ປຸງກົດໝາຍວ່າດ້ວຍນາຍທະຫານກອງທັບປະຊາຊົນລາວ ຊຶ່ງເປັນການປັບປຸງບັນດາຫຼັກການ, ລະບຽບການ, ມາດຕະການ ແລະ ນະໂຍບາຍກ່ຽວກັບການຈັດຕັ້ງການເຄື່ອນໄຫວ ປະຕິບັດໜ້າທີ່ຂອງບັນດາ ນາຍທະຫານໃຫ້ສອດຄ່ອງກັບ ສະພາບການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ຕາມຄວາມຮຽກຮ້ອງ ຕ້ອງການຂອງການພັດທະນາ ໃນໄລຍະໃໝ່ ເພື່ອເຊື່ອມໂຍງ ກັບພາກພື້ນ ແລະ ສາກົນ ໂດຍ ສະເພາະ ແມ່ນບັນດາປະເທດ ເພື່ອນມິດ ຍຸດທະສາດ ໃຫ້ມີຄວາມໜັກແໜ້ນ ແລະ ເຂັ້ມແຂງ, ເປັນການກຳນົດທີ່ຕັ້ງ, ພາລະບົດບາດ, ໜ້າທີ່, ຄວາມຮັບຜິດຊອບ, ສິດ ແລະ ພັນທະ, ໜ້າທີ່ຕຳແໜ່ງ, ຂັ້ນ, ຊັ້ນຂອງ ນາຍທະຫານໃຫ້ມີຄວາມເໝາະສົມ, ລະອຽດ ແລະ ສາມາດຈັດຕັ້ງປະຕິບັດໄດ້. ກົດໝາຍດັ່ງກ່າວສະພາຮັບຮອງເອົາໃນປີ 2004 ແລະ ຜ່ານການຈັດຕັ້ງປະຕິບັດມາ ເປັນເວລາ 14 ປີ ຊຶ່ງຜ່ານການ ປະເມີນຜົນການຈັດຕັ້ງປະຕິ ບັດກົດໝາຍດັ່ງກ່າວເຫັນວ່າມີ ຄວາມຈຳເປັນຕ້ອງໄດ້ປັບປຸງ. ຮ່າງກົດໝາຍວ່າດ້ວຍ ນາຍທະຫານກອງທັບປະຊາຊົນລາວ ສະບັບປີ 2004 ແມ່ນ ມີແຕ່ໝວດ ແລະ ມາດຕາ, ສ່ວນສະບັບປັບປຸງປະກອບມີ V ພາກ, 8 ໝວດ, 50 ມາດຕາ ໃນນີ້ ຮັກສາໄວ້ 10 ມາດຕາ, ຂຽນໃໝ່ 19 ມາດຕາ, ປັບປຸງ 21 ມາດຕາ. ຖ້າຫາກວ່າກົດໝາຍສະບັບນີ້ ຖືກຮັບຮອງ ແລະ ປະກາດໃຊ້ຄາດຄະເນວ່າຈະໄດ້ ຮັບຜົນເປັນຢ່າງດີຊຶ່ງຈະເປັນບ່ອນອີງໃຫ້ແກ່ການກໍ່ສ້າງ, ຄຸ້ມຄອງ, ຕິດຕາມ, ກວດກາ, ປະຕິບັດນະໂຍບາຍຕໍ່ນາຍ ທະ ຫານເພື່ອໃຫ້ສອດຄ່ອງກັບ ສະພາບການເຕີບໃຫຍ່ ແລະ ຂະຫຍາຍຕົວຂອງກອງທັບ ປະຊາຊົນລາວໃຫ້ໄປຕາມທິດ ການປົກຄອງລັດດ້ວຍກົດໝາຍ. ຈາກນັ້ນ ສສຊ ໄດ້ຜັດ ປ່ຽນກັນປະກອບຄຳຄິດຄຳເຫັນໃສ່ຮ່າງກົດໝາຍ ສະບັບ ປັບປຸງຢ່າງກົງໄປກົງມາເພື່ອ ໃຫ້ເນື້ອໃນແຕ່ລະພາກ, ໝວດ ແລະ ມາດຕາມີເນື້ອໃນຮັດກຸມ, ຄົບຖ້ວນ, ຈະແຈ້ງ, ຖືກຕ້ອງ.