(ສພຊ) ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 14 ແຂວງສາລະວັນ ໄດ້ເຄື່ອນໄຫວພົບປະ ປະຊາຊົນບັນດາເຜົ່າຢູ່ 5 ຈຸດຄື: ບ້ານແມວ, ບ້ານກະເລງ ເມືອງສະໝ້ວຍ, ບ້ານປິໂກະ ເມືອງຕະໂອ້ຍ, ບ້ານໂພນໄຜ່ ເມືອງສາລະວັນ ແລະ ບ້ານສະພາດ ເມືອງວາປີ, ມີຄະນະພັກຮາກຖານ 5 ກຸ່ມບ້ານ, ອົງການຈັດຕັ້ງບ້ານ ຈາກ 27 ບ້ານ, ມີພະນັກງານອາວຸໂສບຳນານ, ເຖົ້າແກ່ແນວໂຮມ, ພໍ່ແມ່ປະຊາຊົນ, ຄູ-ອາຈານ ແລະ ນັກຮຽນ ເຂົ້າຮ່ວມ ຈໍານວນ 800 ກວ່າຄົນ ຍິງ 350 ກວ່າຄົນ. ຜ່ານການລົງພົບປະໃນແຕ່ລະຈຸດ ໄດ້ຮັບຟັງລາຍງານສະພາບການພັດທະນາເສດຖະກິດ-ສັງຄົມພາຍໃນບ້ານ. ພ້ອມກັນນັ້ນ ສສຊ ແລະ ສະມາຊິກສະພາປະຊາຊົນແຂວງ ກໍໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຕິດພັນກັບ 2 ວາລະແຫ່ງຊາດ ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈ. ຈາກນັ້ນ ກໍໄດ້ເປີດໂອກາດໃຫ້ພໍ່ແມ່ປະຊາຊົນ ໄດ້ມີຄຳເຫັນ ແລະ ຂໍ້ສະເໜີຕ່າງໆ ເຊິ່ງຂໍ້ສະເໜີດັ່ງກ່າວ ແມ່ນພົວພັນກັບຊີວິດການເປັນຢູ່ຂອງປະຊາຊົນ ເປັນຕົ້ນ: ການສ້າງເສັ້ນທາງເຂົ້າບ້ານ, ຂໍງົບປະມານສ້າງໂຮງຮຽນ, ສ້າງຊົນລະປະທານ, ນ້ຳລິນ, ຂົວຂ້າມນ້ຳຫ້ວຍ ແລະ ອື່ນໆ.
ຜ່ານການສະເໜີຂອງປະຊາຊົນ, ສສຊ ແລະ ສະມາຊິກສະພາປະຊາຊົນແຂວງ ກໍຄືພາກສ່ວນກ່ຽວຂ້ອງຂັ້ນເມືອງທີ່ເຂົ້າຮ່ວມ ກໍໄດ້ໃຫ້ການຊີ້ແຈງ, ອະທິບາຍຕາມແຜນການຂອງລັດຖະບານ ກໍຄືຂອງແຂວງ ແລະ ເມືອງ ຕິດພັນກັບເນື້ອໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IXແລະ ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງສາລະວັນຊຸດທີ II ເຊິ່ງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາເສດຖະກິດ-ສັງຄົມ ຂອງປະເທດເຮົາປັດຈຸບັນ; ເພື່ອສູ້ຊົນຈັດຕັ້ງປະຕິບັດ 2 ວາລະແຫ່ງຊາດ ທີ່ລັດຖະບານກຳນົດ ໃຫ້ມີຜົນສຳເລັດ. ທັງໝົດນັ້ນ, ແມ່ນຄໍາສະເໜີຕໍ່ທ່ານ ສຸບັນ ສະວະບຸດ ປະທານກໍາມາທິການວຽກງານສະມາຊິກສະພາແຫ່ງຊາດ ທັງເປັນ ສສຊ ປະຈໍາເຂດເລືອກຕັ້ງທີ 14 ແຂວງສາລະວັນ ຮ່ວມກັບທ່ານ ສີເຮັງ ຫອມສົມບັດ ປະທານຄະນະ ສສຊ ປະຈຳເຂດເລືອກຕັ້ງ ທັງເປັນປະທານສະພາປະຊາຊົນແຂວງ, ທ່ານ ຂັນໄຊ ລັດຖະເຮົ້າ ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ທັງເປັນຮອງປະທານສະພາປະຊາຊົນແຂວງ ແລະ ບັນດາທ່ານສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງດັ່ງກ່າວ ໃນໂອກາດພົບປະປະຊາຊົນບັນດາເຜົ່າໃນລະຫວ່າງວັນທີ 3-5 ມີນາຜ່ານມາ.
ໂອກາດດັ່ງກ່າວ ທ່ານ ສຸບັນ ສະວະບຸດ ຍັງໄດ້ນຳເອົາຜ້າຫົ່ມ ແລະ ອຸປະກອນກິລາ ຈຳນວນໜຶ່ງ ທີ່ໄດ້ຮັບຈາກກອງທຶນຊ່ວຍເຫລືອສັງຄົມສະພາແຫ່ງຊາດ ໄປສົມທົບກັບການລະດົມຂອງສະມາຊິກສະພາປະຊາຊົນແຂວງສາລະວັນ ມີອຸປະກອນການຮຽນ ເປັນຕົ້ນ: ປຶ້ມຂຽນ, ບິກ ແລະ ເກີບ ນຳໄປມອບໃຫ້ການຈັດຕັ້ງໃນຈຸດທີ່ລົງພົບປະປະຊາຊົນ ເພື່ອນຳໄປແຈກຢາຍໂຮງຮຽນ ແລະ ພໍ່ແມ່ປະຊາຊົນຜູ້ທຸກຍາກຂາດເຂີນ.
(ພາບ ແລະ ຂ່າວ: ຄຳແດງ ອິນທະສັກ)