(ສພຊ) ເນື່ອງຈາກມະຕິ, ຄຳສັ່ງ ແລະ ຄຳແນະນຳ ກໍຄືນິຕິກຳຕ່າງໆຂອງພັກໄດ້ຖືກກຳນົດອອກມາໃໝ່ ເພື່ອປ່ຽນແທນສະບັບເກົ່າ ພ້ອມທັງເປັນການປັບປຸງ, ແກ້ໄຂຈຸດອ່ອນ ຂໍ້ຄົງຄ້າງ ໂດຍສະເພາະແມ່ນຕ້ອງເຊື່ອມຊືມ, ກຳແໜ້ນ ແລະ ຜັນຂະຫຍາຍແນວທາງນະໂຍບາຍຂອງພັກ ກໍຄືຄະນະພັກ ໃຫ້ເປັນອັນລະອຽດ ແລ້ວຊີ້ນຳ-ນຳພາການຈັດຕັ້ງປະຕິບັດ ພ້ອມທັງຕິດຕາມກວດກາເປັນປົກກະຕິ ແລະ ຕໍ່ເນືອງ ເພື່ອຮັບປະກັນໃຫ້ມີຜົນສຳເລັດຕາມຄາດໝາຍທີ່ວາງອອກ; ໃນລະຫວ່າງວັນທີ 1-2 ເມສາ 2019 ທີ່ຫ້ອງປະຊຸມຄະນະເລຂາທິການ ສະພາແຫ່ງຊາດ (ຫລັກ 6) ນະຄອນຫລວງວຽງຈັນ ຄະນະພັກສະພາແຫ່ງຊາດ (ສພຊ) ໄດ້ຈັດກອງປະຊຸມເຝິກອົບຮົມວຽກງານກໍ່ສ້າງພັກ ແລະ ກວດກາພັກໃນໄລຍະໃໝ່ ໃຫ້ເລຂາ, ຮອງເລຂາ, ຄະນະພັກຮາກຖານ ແລະ ຜູ້ຊ່ວຍວຽກຢູ່ແຕ່ລະຮາກຖານ ໂດຍການເປັນປະທານຂອງສະຫາຍ ພົທ. ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະບໍລິຫານງານພັກ ສພຊ, ຮອງປະທານ ສພຊ; ເຂົ້າຮ່ວມມີບັນດາສະຫາຍເລຂາ-ຮອງເລຂາ, ກຳມະການຄະນະພັກຮາກຖານ, ໜ່ວຍພັກຮາກຖານ ແລະ ໜ່ວຍພັກທີ່ຂຶ້ນກັບຄະນະພັກຮາກຖານ, ບັນດາສະຫາຍຄະນະຊ່ວຍວຽກຄະນະພັກຮາກຖານ, ໜ່ວຍພັກຮາກຖານ ແລະ ໜ່ວຍພັກທີ່ຂຶ້ນກັບຄະນະພັກຮາກຖານ ພ້ອມດ້ວຍວິທະຍາກອນຈາກຄະນະກວດກາສູນກາງພັກ, ອົງການກວດກາລັດຖະບານ ແລະ ຄະນະຈັດຕັ້ງສູນກາງພັກ.
ກອງປະຊຸມຄັ້ງນີ້, ເພື່ອເປັນການເພີ່ມຄວາມຮູ້ກ່ຽວກັບການຍົກສູງຄຸນນະພາບສະມາຊິກພັກ, ການຈັດຕັ້ງພັກປອດໃສ, ເຂັ້ມແຂງ ແລະ ໜັກແໜ້ນ; ການຕີລາຄາຄຸນນະພາບ, ແບ່ງປະເພດສະມາຊິກພັກ ແລະ ໜ່ວຍພັກ; ວຽກງານປ້ອງກັນພັກ-ພະນັກງານ ແລະ ຄວາມຮູ້ພຶ້ນຖານກ່ຽວກັບວຽກງານກວດກາພັກ ແລະ ກວດກາລັດໃຫ້ເລຂາ, ຮອງເລຂາ ແລະ ຄະນະຮາກຖານພັກ ແລະ ຜູ້ຊ່ວຍວຽກຂອງຮາກຖານພັກ; ເພື່ອປັບປຸງແບບແຜນການເປັນເສນາທິການໂດຍກົງຮອບດ້ານຂອງຮາກຖານພັກໃຫ້ມີຄຸນນະພາບສູງຂຶ້ນ, ຈັດຕັ້ງປະຕິບັດຖືກຕາມກົດລະບຽບພັກ ແລະ ເປັນເອກະພາບພາຍໃນອົງຄະນະພັກສະພາແຫ່ງຊາດ; ເພື່ອຍົກສູງພາລະບົດບາດການຕິດຕາມກວດກາຂອງພັກ ເຮັດໃຫ້ການຈັດຕັ້ງພັກ, ສະມາຊິກພັກມີສະຕິລະວັງຕົວ, ຮູ້ເຮັດວຽກງານປ້ອງກັນພັກ-ພະນັກງານ, ຮູ້ສະກັດກັ້ນ ແລະ ແກ້ໄຂປາກົດການຫຍໍ້ທໍ້ຕ່າງໆ ທີ່ຈະເກີດຂຶ້ນກັບສະມາຊິກພັກ-ພະນັກງານ ແລະ ລັດຖະກອນພາຍໃນພັກສະພາແຫ່ງຊາດ.
ໂອກາດນີ້, ຜູ້ເຂົ້າຮ່ວມໄດ້ຮັບຟັງຄວາມຮູ້ພື້ນຖານກ່ຽວກັບວຽກງານກວດກາພັກ, ກວດກາລັດ, ການຍົກສູງຄຸນນະພາບການຈັດຕັ້ງຮາກຖານພັກປອດໃສ, ເຂັ້ມແຂງ, ໜັກແໜ້ນ, ການຕີລາຄາຄຸນນະພາບ ແບ່ງປະເພດສະມາຊິກພັກ ແລະ ໜ່ວຍພັກ ແລະ ຄວາມຮູ້ພື້ນຖານກ່ຽວກັບວຽກງານປ້ອງກັນພັກ-ພະນັກງານ; ຈາກນັ້ນ, ບັນດາຜູ້ເຂົ້າຮ່ວມຍັງໄດ້ສົນທະນາແລກປ່ຽນຄຳຄິດຄຳເຫັນ, ແກ້ຂໍ້ຂ້ອງໃຈຕໍ່ຫົວຂໍ້ຕ່າງໆ.
ໂອກາດນີ້, ສະຫາຍ ພົທ. ແສງນວນ ໄຊຍະລາດ ໄດ້ມີຄໍາເຫັນວ່າ: ການຈັດເຝິກອົບຮົມວຽກງານກໍ່ສ້າງພັກ ແລະ ກວດກາພັກໃຫ້ພະນັກງານນຳພາຫລັກແຫລ່ງ ແມ່ນເພື່ອຍົກສູງຄວາມສາມາດນຳພາ ຄຸ້ມຄອງພະນັກງານ-ສະມາຊິກພັກ ແລະ ນຳພາທຸກວຽກງານ ທັງເປັນບາດກ້າວໜຶ່ງທີ່ຈະຊ່ວຍຍົກສູງ ພາລະບົດບາດ, ໜ້າທີ່ຮັບຜິດຊອບ ແລະ ຫົວຄິດປະດິດສ້າງໃຫ້ແກ່ພະນັກງານ-ສະມາຊິກພັກ ເຂົ້າໃຈ ແລະ ເປັນເອກະພາບ ໃນການຈັດຕັ້ງປະຕິບັດວຽກງານຂອງພັກ ໂດຍສະເພາະແມ່ນການນຳພາ-ຄຸ້ມຄອງຂອງບັນ ດາສະຫາຍຄະນະຮາກຖານພັກພາຍໃນ ສພຊ ໃຫ້ເຂັ້ມແຂງ ສາມາດປະຕິບັດພາລະບົດບາດ, ສິດ ແລະ ໜ້າທີ່, ຄວາມຮັບຜິດຊອບຢ່າງມີປະສິດທິພາບ, ຊອກໃຫ້ເຫັນດ້ານດີ, ດ້ານຕັ້ງໜ້າເພື່ອເສີມ ຂະຫຍາຍ, ຊອກໃຫ້ເຫັນດ້ານອ່ອນ ແລະ ດ້ານຫຍໍ້ທໍ້ ເພື່ອປັບປຸງແກ້ໄຂ; ການຈັດເຝິກອົບຮົບ ຄັ້ງນີ້ແມ່ນແນໃສ່ສ້າງໃຫ້ຮາກຖານພັກເປັນແກນນໍາໃນລະບົບການເມືອງຢູ່ຂັ້ນຮາກຖານ, ສ້າງໃຫ້ຄະ ນະຮາກຖານພັກ, ຄະນະໜ່ວຍພັກ ແລະ ສະມາຊິກພັກ ມີຄວາມປອດໃສ, ເຂັ້ມແຂງ, ໜັກແໜ້ນ ສ້າງໃຫ້ຮາກຖານພັກມີຄວາມສາມາດນໍາພາຈັດຕັ້ງປະຕິບັດໜ້າທີ່ການເມືອງ ແລະ ສ້າງໃຫ້ການຈັດຕັ້ງ ຮາກຖານພັກມີການຫັນປ່ຽນໃໝ່ຢ່າງຕັ້ງໜ້າ.
ຄະນະພັກ ສພຊ ມີຮາກຖານທັງໝົດ 17 ຮາກຖານ; ໃນນັ້ນ, ມີ 1 ຄະນະພັກຮາກຖານ, 11 ໜ່ວຍພັກຮາກຖານ ແລະ 5 ໜ່ວຍພັກທີ່ຂຶ້ນກັບຄະນະພັກຮາກຖານ; ປະຈຸບັນ, ສພຊ ມີພະນັກງານ-ການນຳ, ພະນັກງານ-ລັດຖະກອນ ທັງໝົດ 433 ຄົນ ຍິງ 175 ຄົນ, ພະນັກງານການນຳ 39 ທ່ານ ຍິງ 13 ທ່ານ, ມີສະມາຊິກພັກ 232 ສະຫາຍ, ຍິງ 79 ສະຫາຍ (ສະມາຊິກພັກສົມບູນ 197 ສະຫາຍ ຍິງ 65 ສະຫາຍ, ສະມາຊິກພັກສຳຮອງ 30 ສະຫາຍ ຍິງ 15 ສະຫາຍ) ສະມາຊິກພັກກວມເອົາ 53,57% ຂອງພະນັກງານ-ລັດຖະກອນທັງໝົດ; ຄະນະພັກຮາກຖານພັກມີ 40 ສະຫາຍ ຍິງ 11 ສະຫາຍ ແລະ ມີສະມາຊິກທີ່ເປັນຫົວໜ້າກົມ ແລະ ຮັກສາການຫົວໜ້າ 2 ສະຫາຍ ຍິງ 1 ສະຫາຍ (ທີ່ເປັນຜູ້ນຳສູງສຸດພາຍໃນໜ່ວຍພັກກົມ) ຜູ້ຮັບຜິດຊອບວຽກພັກຂອງຮາກຖານພັກ ທັງໝົດ 37 ສະຫາຍ ຍິງ 15 ສະຫາຍ.
(ນາງ ອາລິນ ສຸພິມມະປະດິດ)