ພາຍຫຼັງສໍາເລັດການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II ໃນວັນທີ 27 ມັງກອນ 2023 ທີ່ສະໂມສອນສະພາປະຊາຊົນແຂວງ ເຊກອງ ທ່ານ ນາງ ຄຳໄພ ວິລະສານ ຄະນະປະຈຳ, ເລຂາທິການສະພາປະຊາຊົນແຂວງ ເຊກອງ ໄດ້ຖະແຫຼງຕໍ່ສື່ມວນຊົນຂອງແຂວງວ່າ: ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງເຊກອງ ຊຸດທີ II ໄດ້ດຳ ເນີນມາເປັນເວລາ 03 ວັນເຕັມ ພາຍໃຕ້ການຊີ້ນຳ-ນຳພາ ຂອງຄະນະປະຈຳສະພາປະຊາຊົນແຂວງ ດ້ວຍບັນຍາກາດທີ່ຟົດຟື້ນ ແລະ ການສຸມເຫື່ອແຮງສະຕິປັນຍາ ຂອງບັນດາທ່ານ ສະມາຊິກສະພາ ປະຊາຊົນແຂວງ, ການປະກອບສ່ວນຂອງອົງການປົກຄອງແຂວງ ອົງການຈັດຕັ້ງພັກ-ລັດ, ອົງ ການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງ ເຂົ້າໃນການດຳເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງເຊກອງ ຊຸດທີ II ເຊິ່ງໄດ້ເຮັດໃຫ້ການພິຈາລະນາ ແລະ ຮັບຮອງເອົາບັນຫ ສຳຄັນຂອງແຂວງ ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.
ຂ້າພະເຈົ້າ ເລຂາທິການສະພາປະຊາຊົນແຂວງ ຕາງໜ້າໃຫ້ຄະນະປະຈຳ ສະພາປະຊາຊົນ ແຂວງ ມີຄວາມຍິນດີ ແລະ ຂໍຖືເປັນກຽດຢ່າງສູງ ແຈ້ງມາຍັງບັນດາທ່ານການນຳຂັ້ນຕ່າງໆ, ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ ຊາວຜູ້ອອກແຮງງານ, ພໍ່ແມ່ພີ່ນ້ອງປະຊາຊົນບັນດາເຜົ່າທົ່ວແຂວງ ເຊກອງ ໄດ້ຮັບຊາບ ກ່ຽວກັບ ຜົນສຳເລັດຂອງກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ເຊກອງ ຊຸດທີ II ດັ່ງນີ້:
ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງເຊກອງ ຊຸດທີ II ໄດ້ເລີ່ມ ໄຂຂຶ້ນແຕ່ຕອນເຊົ້າຂອງ ວັນພຸດ, ວັນທີ 25 ມັງກອນ ແລະ ດຳເນີນມາເຖິງ ວັນສຸກ ວັນທີ 27 ມັງກອນ 2023 ຈຶ່ງໄດ້ສຳເລັດຢ່າງສະຫງ່າງາມ ເຊິ່ງໃຊ້ເວລາດຳເນີນ 03 ວັນເຕັມ ຢູ່ທີ່ສະໂມສອນ ສະພາປະຊາຊົນແຂວງ ພາຍໃຕ້ການເປັນປະທານຂອງ ທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ກອງປະຊຸມໄດ້ໃຫ້ກຽດຕ້ອນຮັບການເຂົ້າຮ່ວມຂອງ ທ່ານ ເຫລັກໄຫລ ສີວິໄລ ກຳມະການສູນກາງພັກ, ເລຂາພັກແຂວງ-ເຈົ້າແຂວງ ເຊກອງ, ມີບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງ ເຊກອງ, ສະມາຊິກສະພາປະຊາຊົນ ແຂວງ, ບັນດາທ່ານການນຳພັກ-ລັດຂັ້ນສູງ ຂອງແຂວງ, ອະດີດການນຳຂອງແຂວງ, ອະດີດ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 16; ບັນດາຫົວໜ້າພະເເນກການ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ລັດວິສາຫະກິດທະນາຄານ, ພະນັກງານ-ລັດຖະກອນ ແລະ ສື່ມວນຊົນ ເຂົ້າຮ່ວມທັງໝົດ 100 ກວ່າທ່ານ.
ການດຳເນີນກອງປະຊຸມ ໄດ້ຮັບຟັງການລາຍງານໂດຍສັງເຂບ ຂອງທ່ານ ເຈົ້າແຂວງ ກ່ຽວ ກັບສະພາບການຈັດຕັ້ງປະຕິບັດແຜນພັດທະນະເສດຖະກິດ-ສັງຄົມ, ແຜນງົບປະມານປະຈຳປີ 2022 ແລະ ທິດທາງແຜນການປີ 2023 ຂອງແຂວງ ແລະ ກໍ່ໄດ້ຮັບຟັງການລາຍງານ, ການຊີ້ແຈງ ຈາກພະແນກການ, ອົງການຈຳນວນໜຶ່ງ. ໃນວາລະການດໍາເນີນກອງປະຊຸມ ແມ່ນເຕັມ ໄປດ້ວຍ ບັນຍາກາດແຫ່ງການເສີມຂະຫຍາຍປະຊາທິປະໄຕ ຂອງສະມາຊິກສະພາປະຊາຊົນແຂວງ ໂດຍໄດ້ສຸມທຸກສະຕິປັນຍາໃນການຄົ້ນຄວ້າຢ່າງຖີ່ຖ້ວນ ຕໍ່ເນື້ອໃນທີ່ນໍາມາພິຈາລະນາ ແລະ ຮັບຮອງເອົາ ໃນກອງປະຊຸມ ດ້ວຍຄວາມຮັບຜິດຊອບສູງ, ປະກອບຄໍາຄິດຄໍາເຫັນຢ່າງກົງໄປກົງມາ ເຊິ່ງໄດ້ລົງຄະແນນສຽງຮັບຮອງເອົາມະຕິກອງປະຊຸມ ຈຳນວນ 10 ສະບັບຄື:
1. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ຂອງອົງການ ປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມ ປະຈຳປີ 2022 ແລະ ທິດທາງແຜນການປີ 2023.
2. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ຂອງອົງການ ປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ ຂອງແຂວງ ປະຈຳປີ 2022 ແລະ ທິດທາງແຜນການປີ 2023.
3. ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ຂໍ້ຕົກລົງ ວ່າດ້ວຍລະບຽບ ການຄຸ້ມຄອງການສຶກສາພາກບັງຄັບ ພາຍໃນແຂວງເຊກອງ.
4. ມະຕິກອງປະຊຸມສະພາປະຊາຊົນແຂວງ ວ່າດ້ວຍຮັບຮອງເອົາ ຂໍ້ຕົກລົງ ວ່າດ້ວຍ ການຄຸ້ມ ຄອງ ແລະ ການນໍາໃຊ້ວິທະຍຸສື່ສານໂຟນີ.
5. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ກ່ຽວກັບ ການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2023 ຂອງ ອົງການກວດສອບແຫ່ງລັດ ປະຈຳພາກໃຕ້; ບົດລາຍງານຜົນການກວດສອບບົດສະຫຼຸບຂາດ ຕົວ ການຈັດຕັ້ງປະຄຕິບັດແຜນງົບປະມານແຫ່ງລັດຂອງແຂວງ ປະຈໍາປີ 2021 ຂອງອົງການ ກວດສອບແຫ່ງລັດ ປະຈໍາພາກໃຕ້.
6. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດວຽກງານປະຈໍາປີ 2022 ແລະ ທິດທາງແຜນການ ປະຈໍາປີ 2023; ບົດລາຍງານຜົນການກວດກາ ຕາມຜົນການກວດສອບ ປີ 2020ຂອງອົງການກວດກາລັດແຂວງ.
7. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການ ປະຈຳປີ 2023 ຂອງສານປະຊາຊົນ ແຂວງ.
8. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ກ່ຽວກັບ ການຈັດຕັ້ງປະຕິບັດວຽກງານ ປະຈຳປີ 2022 ແລະ ທິດທາງແຜນການ ປະຈຳປີ 2013 ຂອງ ອົງການໄອຍະການປະຊາຊົນ ແຂວງ.
9. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ຂອງຄະນະປະ ຈຳສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະ ຈຳປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023 ຂອງ ສະພາ ປະຊາຊົນແຂວງ.
10. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ຮັບຮອງເອົາບົດລາຍງານ ແຜນການສ້າງ ແລະ ປັບປຸງນິຕິກຳໃຕ້ກົດໝາຍ ແຕ່ປີ 2023-2025 ຂອງສະພາປະຊາຊົນແຂວງ.
ໃນການດຳເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ເຊກອງ ຊຸດທີ II ມີພໍ່ແມ່ປະຊາຊົນ ສົ່ງຄຳຄິດຄຳເຫັນຈຳນວນ 22 ສາຍ ຜ່ານໂທລະສັບສາຍດ່ວນຕາມ ໝາຍເລກ 038 156 ມາຍັງກອງປະຊຸມ ເຊິ່ງພົວພັນເຖິງການຄຸ້ມຄອງລັດ, ການຄຸ້ມຄອງ ເສດຖະກິດ-ສັງຄົມ ຕໍ່ກັບບັນຫາທີ່ສົ່ງມາທາງໂທລະສັບດັ່ງກ່າວ ກອງເລຂາກອງປະຊຸມຈະໄດ້ ສັງລວມມອບໃຫ້ຄະນະກຳມະການທີ່ກ່ຽວຂ້ອງ ປະສານສົມທົບກັບພາກສ່ວນຕ່າງໆ ຂອງອົງການ ປົກຄອງແຂວງ ຄົ້ນຄວ້າແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ.
ໃນນາມຕາງໜ້າຄະນະປະຈຳສະພາປະຊາຊົນແຂວງ, ຄະນະເລຂາທິການສະພາປະຊາຊົນ ແຂວງ ຂໍສະແດງຄວາມຂອບໃຈຢ່າງສູງ ມາຍັງບັນດາທ່ານການນຳພັກ-ລັດຂັ້ນສູງຂອງແຂວງ, ອະດີດການນຳຂອງແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາ ປະຊາຊົນແຂວງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ເຈົ້າເມືອງ, ລັດວິສາຫະກິດ ແລະ ພາກສ່ວນຕ່າງໆ ທີ່ເຂົ້າຮ່ວມກອງປະຊຸມຄັ້ງນີ້ຢ່າງພ້ອມພຽງ, ຂໍຂອບໃຈມາຍັງພໍ່ແມ່ພີ່ ນ້ອງ ປະຊາຊົນບັນດາເຜົ່າທົ່ວແຂວງ ທີ່ຕິດຕາມການດຳເນີນກອງປະຊຸມຄັ້ງນີ້, ສະແດງຄວາມຂອບໃຈຕໍ່ ສື່ມວນຊົນແຂວງ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກໍາຂ່າວ ແລະ ເຜີຍແຜ່ຂ່າວສານກ່ຽວກັບການດຳເນີນກອງປະຊຸມ ໃຫ້ສັງຄົມໄດ້ຮັບຊາບຢ່າງທົ່ວເຖິງ, ຂອບໃຈຕໍ່ທຸກພາກສ່ວນທີ່ໄດ້ ປະກອບສ່ວນ ເຮັດໃຫ້ກອງປະຊຸມຄັ້ງນີ້ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.
ເພື່ອຜັນຂະຫຍາຍຜົນສຳເລັດ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນ ແຂວງ ຊຸດທີ II ນີ້ ສະມາຊິກສະພາປະຊາຊົນແຂວງ ເຊກອງ ຈະໄດ້ພ້ອມກັນສືບຕໍ່ນຳເອົາເນື້ອໃນ ຜົນສຳເລັດກໍຄືມະຕິຂອງກອງປະຊຸມສະພາໃນຄັ້ງນີ້ ລົງໄປເຜີຍແຜ່ໃຫ້ພໍ່ແມ່ປະຊາຊົນ, ຜູ້ມີສິດ ເລືອກຕັ້ງ ໄດ້ຮັບຮູ້ເຂົ້າໃຈແນໃສ່ໃຫ້ທຸກຄົນໄດ້ປະກອບສ່ວນໃນການຈັດຕັ້ງປະຕິບັດຢ່າງພ້ອມພຽງ ກັນ ແລະ ກວ້າງຂວາງອອກໃນທົ່ວສັງຄົມ ໃຫ້ກາຍເປັນຮູບປະທຳນັບມື້ນັບຫລາຍຂຶ້ນ.
#ໂດຍ: ນາລີວັນ.