ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ແຂວງຫົວພັນ ຊຸດທີ IIໄດ້ໄຂຂຶ້ນຢ່າງເປັນທາງການ ໃນຕອນເຊົ້ນວັນທີ 15 ກຸມພາ 2023, ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານ ຂອງທ່ານ ນາງ ອໍາໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ ປະທານສະພາປະຊົນ ແຂວງຫົວພັນໃຫ້ກຽດເຂົ້າຮ່ວມຂອງທ່ານ ວັນໄຊ ແພງຊຸມມາກຳມະການສູນກາງພັກ ເຈົ້າແຂວງ ແຂວງຫົວພັນ, ມີບັນດາທ່ານຄະນະປະຈຳພັກແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ສະມາຊິກສະພາປະຊາຊົນແຂວງ, ອາດີດຄະນະປະຈຳພັກແຂວງ, ອາດີດສະມາຊິກສະພາແຫ່ງຊາດ ເຂດເລືອກຕັ້ງທີ 8 ຜູ້ຕາງໜ້າອົງການຈັດຕັ້ງພັກ-ລັດ, ອົງການແນວລາວສ້າງຊາດ, ສະຫະພັນນັກຮົບເກົ່າ ອົງການຈັດຕັ້ງມະຫາຊົນ ແລະ ແຂກຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ,
ໃນວາລະກອງປະຊຸມ ທ່ານ ນາງ ອຳໄພວອນລ້ອມບຸນແພງ ປະທານສະພາປະຊາຊົນ ແຂວງຫົວພັນ ໄດ້ມີຄຳເຫັນກ່າວເປີດກອງປະຊຸມຢ່າງເປັນທາງການ ເຊິ່ງກອງປະຊຸມຄັ້ງນີ້ຈະໄດ້ຮັບຟັງບົດລາຍງານ ຂອງທ່ານເຈົ້າແຂວງກ່ຽວກັບການຈັດຕັ້ງປະຕິບັດວຽກງານພົ້ນເດັ່ນໃນປີ2022 ແລະ ທິດທາງແຜນການວຽກງານຈຸດສຸມປີ2023 ຂອງແຂວງຫົວພັນ; ບົດລາຍງານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2022 ແລະ ທິດທາງແຜນການ ປີ2023 ຂອງແຂວງ; ບົດລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປີ 2022 ແລະ ທິດທາງແຜນການປີ 2023 ຂອງແຂວງ, ບົດລາຍງານກ່ຽວກັບການຈັດຕັ້ງປະຕິບັດ ສອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ຢູ່ແຂວງຫົວພັນ ໃນປີ 2022; ບົດລາຍງານ ຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປີ 2021 ຂອງອົງການກວດສອບແຫ່ງລັດ ປະຈໍາພາກເໜືອ; ບົດລາຍງານກ່ຽວກັບການຈັດຕັ້ງປະຕິບັດວຽກງານ ປະຈໍາປີ 2022 ແລະ ທິດທາງແຜນການປີ 2023 ແລະ ການກວດກາຕາມຜົນຂອງການກວດສອບ ຂອງແຂວງຫົວພັນ ຈາກອົງການກວດກາລັດແຂວງ; ບົດລາຍງານ ກ່ຽວກັບການເຄື່ອນໄຫວວຽກງານປະຈໍາປີ 2022 ແລະ ທິດທາງແຜນການປີ 2023 ຂອງອົງການໄອຍະການປະຊາຊົນແຂວງ ແລະ ຂອງສານປະຊາຊົນແຂວງ; ບົດລາຍງານການເຄື່ອນໄຫວຈັດຕັ້ງປະຕິບັດວຽກງານ ປີ 2022 ແລະ ທິດທາງແຜນການ ປີ 2023 ຂອງສະພາປະຊາຊົນແຂວງ ແລະ ບົດປະກອບຄໍາເຫັນ ຂອງອົງການແນວລາວສ້າງຊາດແຂວງ ຕໍ່ການເຄື່ອນໄຫວວຽກງານຂອງສະພາປະຊາຊົນ ແຂວງຫົວພັນ ຊຸດທີ II.
ນອກຈາກນັ້ນ, ຍັງຈະໄດ້ຮັບຟັງການ ຊີ້ແຈງ, ອະທິບາຍ ຂອງອົງການປົກຄອງແຂວງ ແລະ ພາກສ່ວນກ່ຽວຂ້ອງ ຕໍ່ກັບຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຫົວພັນຊຸດທີ II.
ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ແຂວງຫົວພັນ ຊຸດທີ II ຄັ້ງນີ້ ຈະໄດ້ດຳເນີນເປັນເວລາ 3 ວັນ ນັບແຕ່ວັນທີ 15–17 ກຸມພາ 2023 ຈຶ່ງສໍາລັດ.