ຕອນແລງ ວັນທີ 22 ສິງຫາ 2023 ນີ້, ສະພາປະຊາຊົນແຂວງ ໄດ້ຈັດກອງປະຊຸມ ສະຫຼຸບຖອດຖອນບົດຮຽນກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນ ຊຸດທີ IIໂດຍການເປັນປະທານ ຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ,ປະທານສະພາປະຊາຊົນແຂວງ ມີບັນດາທ່ານ ຄະນະປະຈໍາ, ຄະນະກຳມະການ, ຄະນະເລຂາທິການ, ຫົວໜ້າ,ຮອງຫົວໜ້າຂະແໜງ ຕະຫຼອດຮອດພະນັກງານ-ລັດຖະກອນພາຍໃນສະພາປະຊາຊົນແຂວງ ເຂົ້າຮ່ວມທັງໝົດ.

ກອງປະຊຸມ ໄດ້ຮັບຟັງການຜ່ານບົດສະຫຼຸບຖອດຖອນບົດຮຽນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນ ຊຸດທີ II ຈາກ ທ່ານ ສຸກມີໄຊ ສິງບຸນເຮືອງ ຮອງເລຂາທິການສະພາປະຊາຊົນແຂວງ ເຊິ່ງຍົກໃຫ້ເຫັນ ດ້ານດີຜົນງານ, ດ້ານອ່ອນຄົງຄ້າງ ເປັນຕົ້ນ: ດ້ານການກະກຽມເນື້ອໃນ, ບໍລິຫານ-ພິທີການ,ວຽກງານສື່ມວນຊົນ ແລະ ວຽກງານປິ່ນອ້ອມອື່ນໆ ໃນໄລຍະດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ແຂວງຫົວພັນ ຊຸດທີ II ທີ່ເປີດຂຶ້ນ ໃນລະຫວ່າງ ວັນທີ 2-4 ສິງຫາ 2023 ຜ່ານມາ. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ມີຄໍາຄິດເຫັນ, ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ເພື່ອນຳເອົາບັນດາເນື້ອໃນຈິດໃຈກອງປະຊຸມ ຖອດຖອນເປັນບົດຮຽນ ນຳໄປປັບປຸງຈັດຕັ້ງປະຕິບັດວຽກງານ ໃນກອງປະຊຸມສະໄໝສາມັນ ເທື່ອຕໍ່ໄປໃຫ້ມີຜົນສຳເລັດ ແລະ ດີຂື້ນເລື້ອຍໆ.

ຕອນທ້າຍ ປະທານກອງປະຊຸມ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ-ລັດຖະກອນ ພາຍໃນສະພາປະຊາຊົນແຂວງ ທີ່ໄດ້ພ້ອມກັນເອົາໃຈໃສ່ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ແລະ ມີຜົນສຳເລັດໜ້າວຽກຕ່າງໆ ຕາມການມອບໝາຍໃນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 5ຂອງສະພາປະຊາຊົນ ແຂວງຫົວພັນ ຊຸດທີ II ມີຜົນສຳເລັດອັນຈົບງາມ; ພ້ອມນັ້ນ, ທ່ານຍັງໄດ້ເນັ້ນໜັກໃຫ້ພະນັກງານທັງໝົດ ຈົ່ງສືບຕໍ່ເສີມຂະຫຍາຍດ້ານດີຜົນງານ,ປັບປຸງແກ້ໄຂບັນຫາ ທີ່ຍັງຄົງຄ້າງ ເປັນຕົ້ນ: ເພີ່ມທະວີຄວາມເປັນເຈົ້າການໃນການກະກຽມເນື້ອໃນກອງປະຊຸມ, ກົນໄກການປະສານງານຮ່ວມກັບອົງການປົກຄອງແຂວງ, ຂະແໜງການທີ່ກ່ຽວຂ້ອງໃຫ້ມີຄວາມຄ່ອງຕົວ, ວ່ອງໄວ ແລະ ທັນກຳນົດເວລາ ເພື່ອເປັນບົດຮຽນໃຫ້ແກ່ການດຳເນີນກອງປະຊຸມຄັ້ງຕໍ່ໄປ ໃຫ້ຮັບປະກັນທາງດ້ານເນື້ອໃນທີ່ມີຄຸນນະພາບດີຂື້ນກວ່າເກົ່າ.