ໃນລະຫວ່າງວັນທີ 21-22 ມີນາ 2024  ສະພາແຫ່ງຊາດ ໄດ້ຈັດກອງປະຊຸມທາບທາມຄຳຄິດເຫັນໃສ່ຮ່າງປັບປຸງກົດໝາຍ 03 ສະບັບ ໃນຂົງເຂດສະພາແຫ່ງຊາດ ຂຶ້ນທີ່ຫ້ອງປະຊຸມ ສະພາປະຊາຊົນແຂວງ ສະຫວັນນະເຂດ ໂດຍການເປັນປະທານຮ່ວມຂອງທ່ານ ນາງ ປິ່ງຄໍາ ລາຊະສິມມາ ປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງເວດລ້ອມ ແລະ ທ່ານ ກົງແກ້ວ ມີວໍລະຈັກ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ປະທານສະພາປະຊາຊົນແຂວງສະຫວັນນະເຂດ; ມີບັນດາທ່ານ ສສຊ ປະຈໍາເຂດເລືອກຕັ້ງທີ 13, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ-ນະຄອນ, ທ່ານຮອງເຈົ້າແຂວງ, ເຈົ້ານະຄອນ, ອາດີດສະມາຊິກສະພາແຫ່ງຊາດ, ຫົວໜ້າ-ຮອງຫົວໜ້າພະແນກການຂອງອົງການປົກຄອງແຂວງ, ຂົງເຂດຕຸລາການ, ຄະນະນໍາຈາກ 2 ກໍາລັງປ້ອງກັນຊາດ-ປ້ອງກັນຄວາມສະຫງົບ, ອົງການຈັດຕັ້ງມະຫາຊົນ, ສະຖາບັນການສຶກສາ ພ້ອມດ້ວຍພະນັກງານ-ລັດຖະກອນ ຈາກ ສພຊ ແລະ ສພຂ ຈໍານວນຜູ້ເຂົ້າຮ່ວມທັງໝົດ 87 ທ່ານ ຍິງ 29 ທ່ານ.

        ພາຍຫຼັງທີ່ທ່ານປະທານກອງປະຊຸມໄດ້ກ່າວເປີດກອງປະຊຸມແລ້ວ ໄດ້ມອບໃຫ້ຄະນະຮັບຜິດຊອບປັບປຸງກົດໝາຍ ໃນຂົງເຂດສະພາແຫ່ງຊາດຂຶ້ນສະເໜີ ກົດໝາຍ ວ່າດ້ວຍສະພາແຫ່ງຊາດ, ກົດໝາຍ ວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ, ກົດໝາຍທີ່ນຳມາທາບທາມໃນຄັ້ງນີ້ ມີຄວາມສຳຄັນ ແລະ ມີຄວາມໝາຍຫຼາຍ ຕໍ່ການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄດ້ເຄື່ອນໄຫວປະຕິບັດພາລະບົດບາດຂອງຕົນມີປະສິດທິພາບ ແລະ ປະສິດທິຜົນ, ສອດຄ່ອງກັບສະພາບຕົວຈິງຂອງປະເທດເຮົາ.

ຫຼັງຈາກນັ້ນທ່ານປະທານກອງປະຊຸມກໍ່ໄດ້ເຈາະຈິມ ແລະ ມອບໃຫ້ບັນດາຜູ້ແທນກອງປະຊຸມ ແລກປ່ຽນຄໍາຄິດຄໍາເຫັນ, ເຊິ່ງໄລຍະກອງປະຊຸມມີຜູ້ແທນປະກອບຄໍາເຫັນທັງໝົດ 40 ເທື່ອທ່ານ, ຍິງ 7 ເທື່ອທ່ານ, ກອງປະຊຸມຄັ້ງນີ້ເຫັນໄດ້ເຖິງຄວາມເອົາໃຈໃສ່ຂອງບັນທ່ານ ສສຊ ແລະ ສສຂ, ບັນດາທ່ານຜູ້ແທນກອງປະຊຸມ ປະກອບສ່ວນໃນການປັບປຸງຮ່າງກົດໝາຍ 03 ສະບັບໃນຂົງເຂດສະພາແຫ່ງຊາດ, ເພື່ອປັບປຸງໃຫ້ສອດຄ່ອງກັບສະພາບປະຈຸບັນ ແລະ ສາມາດນໍາໄປຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ ເເນໃສ່ການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ.