ວັນທີ 9 ພຶດສະພາ 2023, ຢູ່ທີ່ຫ້ອງປະຊຸມທາງໄກ ບໍລິສັດ ສະຕາ ເທເລຄອມ (ຢູນິເທວ) ສາຂາໂພນໝີ, ແຂວງວຽງຈັນ, ທ່ານ ລໍາໄມ ກູດລາວົງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10, ທ່ານ ດາວເຮືອງ ນັນທາວົງ ຮອງເຈົ້າແຂວງ ແຂວງວຽງຈັນ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 10, ສະມາຊິກສະພາປະຊາຊົນແຂວງວຽງຈັນ, ຕາງໜ້າຈາກພະແນກການ ແລະ ອົງການທີ່ກ່ຽວຂ້ອງແຂວງວຽງຈັນ ເຂົ້າຮ່ວມກອງປະຊຸມ ທີ່ສະພາແຫ່ງຊາດຈັດຂຶ້ນ ຜ່ານລະບົບອອນລາຍ (ກອງປະຊຸມທາງໄກ) ກ່ຽວກັບການທາບທາມຄໍາເຫັນຕໍ່ຮ່າງກົດໝາຍ ຈໍານວນ 11 ສະບັບ ທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX. ໂດຍການເປັນປະທານຂອງທ່ານ ສຈ. ປອ. ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ.

         ຈຸດປະສົງໃນການຈັດກອງປະຊຸມໃນຄັ້ງນີ້ ແມ່ນເພື່ອປຶກສາຫາລື, ແລກປ່ຽນຄໍາເຫັນ ແລະ ຮັບຟັງການຊີ້ແຈງອະທິບາຍຂອງຄະນະຮັບຜິດຊອບສ້າງ ແລະ ປັບປຸງກົດໝາຍຕໍ່ບາງຄໍາເຫັນ ທີ່ຜູ້ເຂົ້າຮ່ວມກອງປະຊຸມທາບທາມຄໍາເຫັນ ໄດ້ຕັ້ງຄໍາຖາມຕໍ່ບັນຫາເນື້ອໃນທີ່ບໍ່ທັນຈະແຈ້ງ ຫຼື ບໍ່ທັນເຂົ້າໃຈໃນແຕ່ລະຮ່າງກົດໝາຍ.

ພາບ-ຂ່າວ : ຄໍາພັນ ໄຊຍະປະທຸມ