(ສພຊ) ໃນວັນທີ 25 ທັນວາ 2023 ຢູ່ຫໍສະພາແຫ່ງຊາດ, ສະຖາບັນຄົ້ນຄວ້ານິຕິກຳສະພາແຫ່ງຊາດ (ສນສ) ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2023 ແລະ ວາງທິດທາງແຜນ ການປີ 2024 ໂດຍການເປັນປະທານຂອງທ່ານ ສິນທະລາ ຫຼ້າສຸກສະໄໝ ຫົວໜ້າສະຖາບັນຄົ້ນຄວ້ານິຕິກຳ; ເຂົ້າຮ່ວມມີບັນດາທ່ານຮອງປະທານກໍາມາທິການ, ຄະນະສະຖາບັນ, ຫົວໜ້າ-ຮອງຫົວໜ້າກົມ, ຄະ ນະສູນ, ຄະນະພະແນກ ແລະ ລັດຖະກອນພາຍໃນ ສນສ ພ້ອມດ້ວຍເລຂາ-ຮອງເລຂາທິການ, ຫົວໜ້າ-ຮອງຫົວໜ້າຂະແໜງຄົ້ນຄວ້າສັງລວມ ແລະ ຂໍ້ມູນຂ່າວສານ ຂອງສະພາປະຊາຊົນຂັ້ນແຂວງ ທີ່ເຂົ້າຮ່ວມກອງປະຊຸມຜ່ານອອນລາຍ.
ຈຸດປະສົງຂອງກອງປະຊຸມ ກໍເພື່ອເປັນການສະຫຼຸບຕີລາຄາການເຄື່ອນໄຫວວຽກງານປະຈໍາປີ 2023 ແລະ ວາງທິດທາງແຜນການປີ 2024 ເຊິ່ງສຸມໃສ່ປະກອບຄໍາເຫັນຕໍ່ຮ່າງບົດສະຫຼຸບຕີລາຄາການ ເຄື່ອນໄຫວວຽກງານຄົ້ນຄວ້າວິທະຍາສາດ, ຍົກສູງຂີດຄວາມສາມາດ ແລະ ຂໍ້ມູນຂ່າວສານ ປະຈໍາປີ 2023 ແລະ ວາງທິດທາງແຜນການປີ 2024 ໃຫ້ມີເນື້ອໃນຄົບຖ້ວນ; ນອກຈາກນີ້, ກອງປະຊຸມຍັງໄດ້ຮັບຟັງການປະກອບຄໍາເຫັນກ່ຽວກັບການຍົກສູງຂີດຄວາມສາມາດໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຈາກທ່ານຮອງປະທານກໍາມາທິການວຽກງານສະມາຊິກສະພາແຫ່ງຊາດ ແລະ ທ່ານເລຂາທິການສະພາປະຊາຊົນນະຄອນຫຼວງວຽງຈັນ.
ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ຜູ້ຊີ້ນຳສະຖາບັນຄົ້ນຄວ້ານິຕິກຳ ເຊິ່ງທ່ານໄດ້ເນັ້ນໜັກໃຫ້ເອົາໃຈໃສ່ຄົ້ນຄວ້າຫົວຂໍ້ວິທະຍາສາດກ່ຽວກັບທິດສະດີ ແລະ ພຶດຕິກໍາວຽກງານສະພາ ທັງຢູ່ພາຍໃນ ແລະ ຕ່າງປະເທດ ເພື່ອຮັບໃຊ້ໃຫ້ແກ່ການຈັດຕັ້ງປະຕິບັດ 3 ພາລະບົດບາດຂອງສະພາແຫ່ງຊາດ, ຄົ້ນຄວ້າ ແລະ ວິເຄາະກົດໝາຍ ແລະ ນິຕິກຳໃຕ້ກົດໝາຍ ດ້ວຍການປຽບທຽບ ແລະ ຄັດຫຍໍ້ເນື້ອໃນບັນຫາຕ່າງໆ ເພື່ອເປັນຂໍ້ມູນສະໜອງໃຫ້ແກ່ຄະນະປະຈຳສະພາແຫ່ງຊາດ, ສະມາຊິກສະພາແຫ່ງຊາດ ແລະ ບັນດາກຳມາທິການທີ່ກ່ຽວຂ້ອງ ຕາມທີ່ໄດ້ວາງໄວ້; ເອົາໃຈໃສ່ປະສານສົມທົບກັບບັນດາກໍາມາທິການ ແລະ ພາກສ່ວນກ່ຽວຂ້ອງໃນການຄົ້ນ ຄວ້າເນື້ອໃນ, ຮູບການ ແລະ ວິທີການໃນການເຝິກອົບຮົມ ແລະ ສຳມະນາ ໂດຍໃຫ້ເອົາໃຈໃສ່ຄົ້ນຄວ້າ ແລະ ສ້າງຫຼັກສູດ, ທັກສະ ແລະ ປຶ້ມຄູ່ມືຕ່າງໆທີ່ມີຄວາມສໍາຄັນ ແລະ ເປັນບົດຮຽນທີ່ດີ ເພື່ອຍົກສູງຂີດຄວາມສາມາດປະຕິບັດພາລະບົດບາດ, ສິດ ແລະ ໜ້າທີ່ຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານທີ່ເປັນເສນາທິການ ໃຫ້ສາມາດໝູນໃຊ້ເຂົ້າໃນການປະຕິບັດວຽກງານຕົວຈິງໃຫ້ມີປະສິດທິຜົນ ແລະ ສືບຕໍ່ພົວພັນກັບສະຖາບັນຄົ້ນຄວ້າທີ່ກ່ຽວຂ້ອງ ທັງຢູ່ພາຍໃນ ແລະ ຕ່າງປະເທດ, ອົງການຈັດຕັ້ງສາກົນທີ່ກ່ຽວຂ້ອງ ເພື່ອແລກປ່ຽນຂໍ້ມູນຂ່າວສານ, ບົດຮຽນທີ່ດີ, ຍາດແຍ່ງເຕັກ/ນິກວິຊາການ ແລະ ທຶນຮອນ ເພື່ອສະໜັບສະໜູນແຜນພັດທະນາວຽກງານຂອງສະຖາບັນ ໃຫ້ເຕີບໃຫຍ່ຂະຫຍາຍຕົວ, ປະກອບສ່ວນເຂົ້າໃນການພັດທະນາວຽກງານຂອງສະພາແຫ່ງຊາດ ໃຫ້ມີຜົນສຳເລັດດີຂຶ້ນຢ່າງບໍ່ຢຸດຢັ້ງ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)