(ສພຊ) ໃນຕອນບ່າຍວັນອັງຄານທີ 19 ມີນາ 2024 ທີ່ສະພາແຫ່ງຊາດ (ສພຊ), ສະຫາຍ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ຄະນະປະຈຳພັກ, ຜູ້ຊີ້ນຳວຽກງານອົງການຈັດຕັ້ງມະຫາຊົນສະພາ ແຫ່ງຊາດ ໄດ້ຕ້ອນຮັບການເຂົ້າຢ້ຽມພົບປະຂອງສະຫາຍ ນວນທອງ ສຸວັນວິໄຊ ຮອງເລຂາຄະນະບໍລິຫານງານສູນ ກາງຊາວໜຸ່ມປະຊາຊົນປະຕິວັດລາວ (ສຊປລ) ພ້ອມດ້ວຍຄະນະ ໃນໂອກາດລົງຕິດຕາມ, ຊຸກຍູ້ວຽກງານການກະ ກຽມດຳເນີນກອງປະຊຸມໃຫຍ່ 3 ຂັ້ນ.

ໃນໂອກາດນີ້, ສະຫາຍ ນວນທອງ ສຸວັນວິໄຊ ໄດ້ແຈ້ງຈຸດປະສົງຂອງການລົງຕິດຕາມ, ຊຸກຍູ້ວຽກງານກະ ກຽມດຳເນີນກອງປະຊຸມໃຫຍ່ 3 ຂັ້ນ ເພື່ອເຮັດໃຫ້ການກະກຽມ ແລະ ດຳເນີນກອງປະຊຸມໃຫຍ່ຄະນະຊາວໜຸ່ມ ປະຊາຊົນປະຕິວັດລາວ (ຄຊປປລ) ຂັ້ນກະຊວງ, ອົງການ, ນະຄອນຫຼວງ, ແຂວງ, ນະຄອນ. ເມືອງ ແລະ ຮາກ ຖານ ມີຄວາມເປັນເອກະພາບ, ປະຕິບັດຢ່າງຖືກຕ້ອງຕາມກົດໝາຍວ່າດ້ວຍ ຄະນະຊາວໜຸ່ມ ປະຊາຊົນປະຕິວັດ ລາວ, ກົດລະບຽບຄະນະຊາວໜຸ່ມປະຊາຊົນປະຕິວັດລາວ ໃຫ້ທ່ວງທັນກັບເວລາ ແລະ ຕິດພັນກັບການປັບປຸງ ຄຊປປລ ແຕ່ລະຂັ້ນ ໃຫ້ມີຄວາມໜັກແໜ້ນເຂັ້ມແຂງ, ມີຂະບວນການຕໍ່ເນື່ອງ ເພື່ອສ້າງເງື່ອນໄຂໃຫ້ແກ່ການດຳ ເນີນກອງປະຊຸມໃຫຍ່ຂອງອົງຄະນະພັກຂັ້ນຕ່າງໆ ກໍຄືການກະກຽມກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ IX ທີ່ຈະມາເຖິງນີ້.

ຄະນະດັ່ງກ່າວ ໄດ້ລົງຕິດຕາມຊຸກຍູ້ວຽກງານກະກຽມດຳເນີນກອງປະຊຸມໃຫຍ່ 3 ຂັ້ນຢູ່ສະພາແຫ່ງຊາດ ໂດຍໄດ້ເຮັດວຽກຮ່ວມກັບສະຫາຍ ໄກມະນິນ ເທບບົວລີ ຮອງເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ຄະນະ ເຊິ່ງສະຫາຍ ໄກມະນິນ ເທບບົວລີ ໄດ້ລາຍງານການຈັດຕັ້ງປະຕິບັດວຽກງານຊາວໜຸ່ມຂອງ ສພຊ ໃນ ໄລຍະຜ່ານມາ, ວຽກງານຂະບວນການ, ວຽກງານ 4 ບຸກ ຕິດພັນກັບວຽກງານວິຊາສະເພາະ ແລະ ທິດທາງແຜນ ການໃນຕໍ່ໜ້າ; ການກະກຽມດຳເນີນກອງປະຊຸມໃຫຍ່ຂອງຊາວໜຸ່ມສະພາແຫ່ງຊາດ ແລະ ໜ່ວຍຊາວໜຸ່ມຮາກ ຖານພາຍໃນ ສພຊ. ສະຫາຍ ນວນທອງ ສຸວັນວິໄຊ ແລະ ຄະນະ ໄດ້ມີຄຳຖາມເຈາະຈີ້ມກ່ຽວ ກັບປາກົດການຫຍໍ້ ທໍ້ຂອງຊາວໜຸ່ມ ເຊັ່ນ: ບັນຫາຢາເສບຕິດ, ຄ່ານິຍົມຂອງຊາວໜຸ່ມ. ຈາກນັ້ນ, ກໍໄດ້ພ້ອມກັນປະກອບຄຳຄິດຄຳ ເຫັນຢ່າງສ້າງສັນ ແລະ ກົງໄປກົງມາ ເພື່ອຊອກຫາວິທີແກ້ໄຂໃຫ້ຖືກຕ້ອງສອດຄ່ອງ ແລະ ແທດເໝາະ, ທັນເວລາ.

ການລົງມາຊຸກຍູ້ວຽກງານກະກຽມດຳເນີນກອງປະຊຸມໃຫຍ່ 3 ຂັ້ນຢູ່ສະພາແຫ່ງຊາດຄັ້ງນີ້ ແມ່ນເພື່ອກະ ກຽມຄວາມພ້ອມທາງດ້ານຂະບວນການ, ດ້ານເນື້ອຂອງກອງປະຊຸມ ແລະ ດ້ານບຸກຄະລາກອນ ເພື່ອເຮັດໃຫ້ກອງ ປະຊຸມໃຫຍ່ຊາວໜຸ່ມສະພາແຫ່ງຊາດ ປະສົບຜົນສຳເລັດຕາມຈຸດປະສົງ ແລະ ຄາດໝາຍທີ່ວາງໄວ້.

(ຂ່າວ ແລະ ພາບ: ນາງ ໄຊໂສພາພອນ ມິ່ງມຸງຄຸນ)