(ສພຊ) ເພື່ອແລກປ່ຽນ, ຖອດຖອນບົດຮຽນເຊິ່ງກັນ ແລະ ກັນ ລະຫວ່າງຄະນະສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ (ສພຂ) ໃນການປະສານສົມທົບ ແລະ ແກ້ໄຂວຽກງານຮ່ວມກັນຕາມພາລະບົດບາດ ໃຫ້ມີຄວາມເປັນເອກະພາບ ແລະ ຄຸນນະພາບທີ່ດີຂຶ້ນ; ເພື່ອຍົກສູງຄຸນນະພາບໃນການປະຕິບັດພາລະບົດບາດ, ສິດ ແລະ ໜ້າທີ່ ຂອງກຳມາທິການວຽກງານສະມາຊິກສະພາແຫ່ງຊາດ (ກວສຊ), ຄະນະ ສສຊ ປະຈຳເຂດເລືອກຕັ້ງ ແລະ ສພຂ ໃຫ້ມີປະສິດທິພາບ ແລະ ປະສິດທິຜົນ. ໃນລະຫວ່າງວັນທີ 30-31 ພຶດສະພາ 2022 ທີ່ເມືອງວັງວຽງ ແຂວງວຽງຈັນ ກວສຊ ໄດ້ຈັດກອງປະຊຸມແລກປ່ຽນບົດຮຽນການເຄື່ອນໄຫວວຽກງານ ລະຫວ່າງຄະນະ ສສຊ ປະຈຳເຂດເລືອກຕັ້ງ ແລະ ສພຂ (ພາກເຫນືອ) ໂດຍການເປັນປະທານ ຂອງທ່ານ ສຸບັນ ສະວະບຸດ ປະທານ ກວສຊ, ເຂົ້າຮ່ວມມີບັນດາທ່ານຮອງປະທານ ກວສຊ ແລະຕາງໜ້າຄະນະສະມາຊິກສະພາປະຊາຊົນຂັ້ນແຂວງ (ພາກເໜືຶອ), ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ, ແຂກຖືກເຊີນ ແລະ ພະນັກງານວິຊາການເຂົ້າຮ່ວມ.
ກອງປະຊຸມ ໄດ້ຮັບຟັງກ່ຽວກັບພາລະບົດບາດ, ສິດ ແລະ ໜ້າທີ່ ຂອງ ກວສຊ ຈາກທ່ານ ສຸບັນ ສະວະບຸດ; ການເຄື່ອນໄຫວ ແລະ ການພົບປະປະຊາຊົນ ຂອງ ສສຊ ຈາກທ່ານ ຄຳສິງ ໄຊສົມແພງ ຮອງປະທານ ກວສຊ; ການພົວພັນປະສານງານ ລະຫວ່າງຄະນະປະຈຳສະພາແຫ່ງຊາດ ແລະ ຄະນະປະຈຳສະພາປະຊາຊົນຂັ້ນແຂວງ ຈາກທ່ານ ວຽງແກ້ວ ວັນນະຈັກ ຮອງປະທານ ກວສຊ; ບົດຮຽນການເຄື່ອນໄຫວວຽກງານ ຕາມພາລະບົດບາດ ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສພຂ ຫຼວງນ້ຳທາ; ບົດຮຽນການເຄື່ອນໄຫວວຽກງານ ຕາມພາລະບົດບາດ ຂອງຄະນະ ສສຊ ປະຈຳເຂດເລືອກຕັ້ງ ແລະ ສພຂ ຫົວພັນ; ພົບປະແລກປ່ຽນກັບຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງວັງວຽງ. ນອກຈາກນັ້ນ, ບັນດາຜູ້ເຂົ້າຮ່ວມກໍໄດ້ພ້ອມກັນແລກປ່ຽນຄຳຄິດຄຳເຫັນ ຢ່າງກົງໄປກົງມາ.
ໂອກາດດັ່ງກ່າວ ທ່ານ ສຸບັນ ສະວະບຸດ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງທ່ານໄດ້ຍົກໃຫ້ເຫັນຜົນໄດ້ຮັບ ຂອງບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃຫ້ມີຄວາມຮູ້, ຄວາມເຂົ້າໃຈ ແລະ ກຳໄດ້ບັນດາບົດຮຽນໃນການປະສານສົມທົບ, ແກ້ໄຂວຽກງານຮ່ວມກັນຕາມພາລະບົດບາດ ແລະ ແລກປ່ຽນບົດຮຽນລະຫວ່າງຜູ້ເກົ່າ ແລະ ຜູ້ໃຫມ່ ທີ່ມີບົດຮຽນປະສົບການແຕກຕ່າງກັນ ໃຫ້ສາມາດນຳໄປໝູນໃຊ້ໃນວຽກງານຕາມພາລະບົດບາດ ແລະ ຄວາມຮັບຜິດຊອບຂອງຕົນໄດ້; ໃຫ້ເຂົ້າໃຈຢ່າງເລິກເຊິ່ງ ຕໍ່ພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ສາມາດນຳໄປປັບປຸງແບບແຜນວິທີເຮັດວຽກຂອງຕົນໃຫ້ດີກວ່າເກົ່າ; ພ້ອມກັນຄົ້ນຄວ້າ ແລະ ປະກອບຄໍາເຫັນໃສ່ບັນດາເນື້ອໃນກອງປະຊຸມຄັ້ງນີ້ ໃຫ້ແທດເໝາະກັບຄວາມເປັນຈິງ, ຍົກໃຫ້ເຫັນດ້ານດີ, ດ້ານອ່ອນ, ສາເຫດ ແລະ ສະເໜີວິທີການແກ້ໄຂຢ່າງຈະແຈ້ງ ເພື່ອເປັນບົດຮຽນໃຫ້ແກ່ການແກ້ໄຂວຽກງານໃນຕໍ່ໜ້າ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຈາກໂຄງການເຮວວີຕັດ ແລະ ຄະນະເລາທິການສະພາແຫ່ງຊາດ.
(ພາບ ແລະ ຂ່າວ: ອານຸສອນ ພູມມີທອນ)