(ສພຊ) – ພິທີມອບ-ຮັບລະບົບຖານຂໍ້ມູນຄຸ້ມຄອງຄຳຮ້ອງຂໍຄວາມເປັນທຳຂອງຄະນະປະຈຳສະພາແຫ່ງຊາດ (ຄປຈສພຊ) ໄດ້ຈັດຂຶ້ນໃນວັນທີ 12 ກໍລະກົດ 2024 ເຊິ່ງມອບໂດຍທ່ານ ເມັດທິວ ເຮັຈສ (Matthew Hedges) ຜູ້ອໍານວຍການພາກພື້ນອາຊີ-ປາຊີຟິກ ແລະ ອາເມລິກາ, ມູນນິທິ ເວສມິນສເຕີ ເພື່ອປະຊາທິປະໄຕ (Westminster Foundation for Democracy – WFD) ຮັບໂດຍທ່ານ ຮສ. ປອ. ວຽງວິໄລ ທ່ຽງຈັນໄຊ ຮອງປະທານກຳມາທິການຍຸຕິທຳ; ເຂົ້າຮ່ວມມີຄະນະກົມ, ຄະນະພະແນກ ພ້ອມດ້ວຍພະນັກງານຈຳນວນໜຶ່ງພາຍໃນ ສພຊ ແລະ ພາກສ່ວນທີ່ກ່ຽວຂ້ອງ.

ໃນພິທີ, ທ່ານ ຮສ. ປອ. ວຽງວິໄລ ທ່ຽງຈັນໄຊ ໄດ້ສະແດງຄວາມຂອບໃຈຢ່າງຈິງໃຈມາຍັງມູນນິທິ ເວສມິນສເຕີ ທີ່ໄດ້ສະໜັບສະໜູນດ້ານງົບປະມານໃຫ້ແກ່ການສ້າງຖານຂໍ້ມູນ ແລະ ບໍລິສັດ MTS ທີ່ພະຍາຍາມຂຽນໂປຣແກມຖານຂໍ້ມູນນີ້ຂຶ້ນມາສໍາເລັດໂດຍພື້ນຖານ. ການສ້າງຖານຂໍ້ມູນການຄຸ້ມຄອງຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ໄດ້ລິເລີ່ມນັບແຕ່ກໍາມາທິການຍຸຕິທໍາໄດ້ສ້າງຕັ້ງຂຶ້ນໃນສະພາແຫ່ງຊາດຊຸດທີ VIII ຍ້ອນເຫັນໄດ້ຄວາມສໍາຄັນຂອງວຽກງານການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາຂອງ ຄປຈສພຊ ກໍຄືການຄົ້ນຄວ້າຄໍາຮ້ອງຂໍຄວາມເປັນ ທໍາຂອງແຕ່ລະກໍາມາທິການ ທັງເປັນເຄື່ອງມືຊ່ວຍຄະນະປະຈໍາສະພາແຫ່ງຊາດ ໃນການບັນທຶກ, ໄຈ້ແຍກ, ກວດກາ ແລະ ຄຸ້ມຄອງຂໍ້ມູນຄໍາຮ້ອງຂໍຄວາມເປັນທໍາທີ່ຍື່ນເຂົ້າມາ ໃຫ້ເປັນລະບົບ, ມີຄວາມວ່ອງໄວ ແລະ ມີຄວາມສະດວກຫຼາຍຂຶ້ນ ໂດຍສະເພາະການຕິດຕາມກວດກາ ແລະ ສະໜອງຂໍ້ມູນຄໍາຮ້ອງຂໍຄວາມເປັນທໍາ; ໃນໄລຍະຜ່ານມາ ການບັນທຶກ, ໄຈ້ແຍກ, ກວດກາ ແລະ ການຄຸ້ມຄອງຂໍ້ມູນຄໍາຮ້ອງຂໍຄວາມເປັນທໍາ ແມ່ນປະຕິບັດດ້ວຍຮູບການ ແລະ ວິທີການຈົດບັນທຶກໃສ່ປຶ້ມ ເຮັດໃຫ້ວຽກງານດັ່ງກ່າວມີຄວາມຊັກຊ້າ ແລະ ຫຍຸ້ງຍາກໃນການຕິດຕາມກວດກາຄືນ, ເກັບຮັກສາໃນຮູບແບບເປັນເອກະ ສານ ເຊິ່ງແຕ່ລະປີເພີ່ມຂຶ້ນເປັນຈໍານວນຫຼາຍ ຕ້ອງໄດ້ໃຊ້ພື້ນທີ່ໃນການເກັບຮັກສາ ແລະ ບາງຄັ້ງກໍເສຍຫາຍ, ການເຮັດວຽກມີຄວາມຕ້ອງການພະນັກງານຫຼາຍຄົນມາຮັບຜິດຊອບ ເນື່ອງຈາກຄໍາຮ້ອງຂໍຄວາມເປັນທໍາມີຈໍານວນຫຼາຍ. ດ້ວຍເຫດ ແລະ ຜົນດັ່ງກ່າວ, ​ກໍາມາທິການຍຸຕິທໍາ ໃນນາມເປັນໃຈກາງຮັບຄໍາຮ້ອງຂໍຄວາມເປັນທໍາໃຫ້ແກ່ຄະນະປະຈໍາສະພາແຫ່ງຊາດ ຈຶ່ງໄດ້ຄົ້ນຄວ້າສ້າງຖານຂໍ້ມູນການຄຸ້ມຄອງຄໍາຮ້ອງຂໍຄວາມເປັນທໍາຂຶ້ນມາ ເພື່ອເຮັດໃຫ້ການຄຸ້ມຄອງຂໍ້ມູນ ເຂົ້າ-ອອກ ເປັນລະບົບລວມສູນ, ທັນສະໄໝ ແລະ ສາມາດຕິດຕາມກວດກາການຈໍລະຈອນເອກະສານ, ກໍານົດເວລາໃນແຕ່ລະຂັ້ນຕອນຂອງການຄົ້ນຄວ້າ, ພິຈາລະນາຄໍາຮ້ອງຂໍຄວາມເປັນທໍາ ຢູ່ທຸກບ່ອນ ແລະ ທຸກເວລາ, ສ້າງຄວາມສະດວກ, ວ່ອງໄວ ແລະ ຈັດລະບົບຂໍ້ມູນເອກະສານຄໍາຮ້ອງຂໍຄວາມເປັນທໍາ ໃຫ້ເປັນລະບົບຫຼາຍຂຶ້ນ, ປະຢັດພື້ນທີ່ໃນການເກັບຮັກສາເອກະສານ ແລະ ຫຼຸດຜ່ອນຈໍານວນບຸກຄະລາກອນທີ່ຮັບຜິດຊອບວຽກຄຸ້ມຄອງຄໍາຮ້ອງຂໍຄວາມເປັນທໍາ.

ທ່ານກ່າວຕື່ມວ່າ: ພາຍຫຼັງຖານຂໍ້ມູນການຄຸ້ມຄອງຄໍາຮ້ອງຂໍຄວາມເປັນທໍາ ໄດ້ຖືກນໍາໃຊ້ຢ່າງເປັນລະບົບຄົບຊຸດແລ້ວ ລະບົບດັ່ງກ່າວ ຈະຊ່ວຍແບ່ງເບົາ ແລະ ສ້າງຄວາມຊັດເຈນໃຫ້ແກ່ວຽກງານການຄຸ້ມຄອງຂໍ້ມູນຄໍາຮ້ອງຂໍຄວາມເປັນທໍາ ຫຼາຍຂຶ້ນ; ແຕ່ຄຽງຄູ່ດ້ານດີ, ກໍຍັງມີບາງບັນຫາ ແລະ ສິ່ງທ້າທ້າຍທີ່ຍັງເປັນຫ່ວງ ເປັນຕົ້ນ: 1. ການສ້າງພະນັກງານເພື່ອຮັບຜິດຊອບວຽກງານດັ່ງກ່າວ ໃຫ້ສາມາດສືບທອດປ່ຽນແທນ ແລະ ຮັກສາລະບົບສາມາດໃຫ້ນໍາໃຊ້ໄດ້ຍືນຍົງ; 2. ຄວາມຕ້ອງການດ້ານອຸປະກອນ ເປັນຕົ້ນ: ເຄື່ອງເຊີບເວີ, ຄອມພິວເຕີ, ເຄື່ອງສະແກນ ແລະ ອື່ນໆ ທີ່ຮັບໃຊ້ໃຫ້ແກ່ຖານຂໍ້ມູນ; 3. ງົບປະມານໃນການບໍາລຸງຮັກສາເຄື່ອງເຊີບເວີ, ອິນເຕີເນັດ ແລະ ອື່ນໆ ເພື່ອຮັບປະກັນເຮັດໃຫ້ລະບົບຖານຂໍ້ມູນທີ່ເປັນລະບົບອອນລາຍ ໄດ້ຖືກນໍາໃຊ້ຍາວນານ ແລະ ຍືນຍົງ; 4. ການພັດທະນາລະບົບຕື່ມ ໃຫ້ສາມາດເຊື່ອມຈອດ ແລະ ກວມໄປເຖິງສະພາປະຊາຊົນຂັ້ນແຂວງໃນທົ່ວປະເທດ ເພື່ອໃຫ້ສາມາດຄຸ້ມຄອງ ແລະ ນໍາໃຊ້ຮ່ວມກັນໄດ້, ພ້ອມທັງການພັດທະນາກ້າວໄປສູ່ການຮັບຄໍາຮ້ອງຜ່ານທາງລະບົບອີເລັກໂຕຣນິກ ແລະ ຫັນເປັນລະບົບດິຈິຕອນເຕັມຮູບແບບໃນອະນາຄົດ.

(ຂ່າວ-ພາບ: ກົງທະນູຄຳ ພິພັດເສລີ)