(ສພຊ) ໃນວັນທີ 11 ພະຈິກ 2022 ທີ່ສະໜາມກິລາເປຕັງ ແຫ່ງຊາດລາວ ດົງໂດກ, ສະຫະພັນກິລາເປຕັງແຫ່ງຊາດລາວ ໄດ້ຈັດການແຂ່ງຂັນກິລາເປຕັງທົ່ວປະເທດ ຊິງຂັນປະທານສະພາແຫ່ງຊາດ ຄັ້ງທີ 10 ປະຈໍາປີ 2022, ມອບຫຼຽນລາງວັນໃຫ້ນັກກິລາ ທີ່ຊະນະເລີດ ໂດຍທ່ານ ຄຳໃບ ດຳລັດ ຮອງປະທານສະພາແຫ່ງຊາດ, ເຂົ້າຮ່ວມມີຄະນະນຳ, ຄູເຝິກ ແລະ ນັກກິລາຂອງທຸກພາກສ່ວນທີ່ໄດ້ເຂົ້າຮ່ວມການແຂ່ງຂັນ, ພາກສ່ວນອຸປະຖຳ ກໍຄື ບໍລິສັດ ຫ້າງຮ້ານ ທັງພາກລັດ ແລະ ເອກະຊົນ ຕະຫຼອດເຖິງພໍ່ແມ່ປະຊາຊົນບັນດາເຜົ່າ, ບັນດາທ່ານຜູ້ຊົມທຸກທົ່ວໜ້າທີ່ໄດ້ເຂົ້າຮ່ວມເຊຍ ເຮັດໃຫ້ງານແຂ່ງຂັນຄັ້ງນີ້ມີຄວາມຟົດຟື້ນມ່ວນຊື່ນ.
ການແຂ່ງຂັນຄັ້ງນີ້ ມີ 6 ລາຍການຄື: ດ່ຽວຍິງ, ຄູ່ຍິງ, ຄູ່ຊາຍ, ຄູ່ກິຕິມະສັກ VIP ແລະ ທີມຊຸດຊາຍ ເຊິ່ງມີຄະນະນຳ, ຄູເຝິກ ແລະ ນັກກິລາເຂົ້າຮ່ວມທັງໝົດ 374 ຄົນ ຍິງ 161 ຄົນ ທີ່ມາຈາກ 49 ພາກສ່ວນຄື: 9 ແຂວງ, 12 ກະຊວງ, ອົງການ-ສະຖາບັນ 10 ພາກສ່ວນ ແລະ ສະໂມສອນກິລາເປຕັງທົ່ວປະເທດ 18 ພາກສ່ວນ.
ຜົນຂອງການແຂ່ງຂັນ ສາມາດສະຫຼຸບໄດ້ດັ່ງນີ້:
1. ດ່ຽວຊາຍ ທົ່ວໄປ ຊະນະເລີດໄດ້ແກ່: ທ້າວ ແກ້ວອຸດອນ ພະກອນຄຳ ມາຈາກກະຊວງໂຍທາທິການ ແລະ ຂົນສົ່ງ; ຮອງຊະນະເລີດ ໄດ້ແກ່: ທ້າວ ແປບຊີ ແກ້ວວິໄລ ນະຄອນຫຼວງວຽງຈັນ; ອັນດັບທີ III ຮ່ວມ ໄດ້ແກ່: ທ້າວ ປີ້ໂນ ພັນທະລີ ແຂວງຄຳມ່ວນ ແລະ ທ້າວ ວຽງນະຄອນ ປີຍະເດດ ວິທະຍາສາດ ສຸຂະພາບ.
2. ດ່ຽວຍິງ ທົ່ວໄປ ຊະນະເລີດ ໄດ້ແກ່: ນາງ ໄກ່ຄຳ ແກ້ວພິລາ ແຂວງສາລະວັນ (2); ຮອງຊະນະເລີດ ໄດ້ແກ່: ນາງ ໝີ່ໝີ່ ວົງສະຫວັດ ບໍລິສັດພອນສະຫວັນ (2); ອັນດັບ III ຮ່ວມ ໄດ້ແກ່: ນາງ ອາລີ ແສງຈັນເພັດ ແຂວງວຽງຈັນ (1) ແລະ ນາງ ໂບວິລັດ ເທບ ພະກັນ ກະຊວງປ້ອງກັນຄວາມສະຫງົບ.
3. ຄູ່ຊາຍ ທົ່ວໄປ ຊະນະເລີດ ໄດ້ແກ່: ທ້ານ ບຸນຕາມີ ສຸທຳມະວົງ+ທ້າວ ວິລະສັກ ລາດສະວົງ ແຂວງວຽງຈັນ (2); ຮອງຊະນະເລີດ ໄດ້ແກ່: ທ້າວ ພຸດທະລາ ແກ້ວກັນນິກາ+ທ້າວ ຕິ່ງຊັນ ແກ້ວກັນນິກາ ກະເພາະປາດົງໝ້ຽງ; ອັນດັບທີ III ໄດ້ແກ່: ທ້າວ ເທບເທວາ ຈິດປັນຍາ+ທ້າວ ວົງພະຈັນ ລັດຕະນະດວງຈິດ ແຂວງຄຳມ່ວນ ແລະ ທ້າວ ແກ້ວ ອຸດອນ ພະກອນຄຳ+ທ້າວ ດາວັນ ຫລວງລາດ ກະຊວງໂຍທາທິການ ແລະ ຂົນສົ່ງ.
4. ຄູ່ຍິງ ທົ່ວໄປ ຊະນະເລີດ ໄດ້ແກ່: ນາງ ມະນີວັນ ສຸລິຍາ+ນາງໝີ່ໝີ່ ວົງສະຫວັດ ບໍລິສັດ ພອນສະຫວັນ; ຮອງຊະນະເລີດ ໄດ້ແກ່: ຮຕ. ນາງ ລິນດາ ແກ້ວບໍລະກົດ+ວທ. ນາງ ໂບລິວັດ ເທບພະກັນກະຊວງປ້ອງກັນຄວາມສະຫງົບ (1); ຮອງອັນດັບ III ຮ່ວມ ໄດ້ແກ່: ນາງ ນ້ອຍ ມະນີທອນ+ນາງ ມຸກດາວອນ ເທບພະສຸວັນ ສະຖາບັນກິລາກາຍຍະກຳ ສີເກີດ ແລະ ນາງ ສົມມະລາ ຟີມໄມຈັນ+ນາງ ຄອນສະຫວັນ ພະຈັນທາ ແຂວງຄຳມ່ວນ (4).
ໃນຕອນທ້າຍ ທ່ານ ຄຳຫຼ້າ ວິໄລທອງ ປະທານສະຫະພັນກິລາເປຕັງແຫ່ງຊາດລາວ ໄດ້ສະແດງຄວາມຮູ້ບຸນຄຸນ ຕໍ່ທ່ານ ຄຳໃບ ດຳລັດ ທີ່ໄດ້ເສຍສະຫຼະເວລາອັນມີຄ່າເຂົ້າຮ່ວມເປັນປະທານພິທີ ຂໍອວຍພອນໄຊອັນປະເສີດ ແດ່ທ່ານຈົ່ງມີສຸຂະພະລານາໄມສົມບູນແຂງແຮງ ອວຍພອນໃຫ້ບັນດາການນຳທຸກຂັ້ນ, ທຸກຂະແໜງການໃນທົ່ວປະເທດ ຕະຫຼອດເຖິງຄະນະນຳ, ຄູເຝິກ ແລະ ນັກກິລາ, ບັນດາຜູ້ອຸປະຖຳ ພ້ອມດ້ວຍມວນຊົນທີ່ເຂົ້າຮ່ວມໃນຄັ້ງນີ້ ຈົ່ງມີ ສຸຂະພາບແຂງແຮງ ປະກອບສ່ວນໃນການປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອພ້ອມກັນກ້າວຂຶ້ນທຽບທັນບັນດາປະເທດໃນອາຊຽນ.
(ພາບ ແລະ ຂ່າວ: ອານຸສອນ ພູມມີທອນ)