​(ສພຊ) – ວັນທີ 20 ກັນຍາ 2024 ທີ່ສະພາແຫ່ງຊາດ ໄດ້ມີພິທີມອບ-ຮັບລາງວັນໃຫ້ແກ່ຜູ້ຊະນະການປະກວດແຂ່ງຂັນອອກແບບເຄື່ອງໝາຍ ຫຼື ໂລໂກ (logo) ຂອງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາ ຊຽນ ຫຼື ໄອປາ (AIPA) ຄັ້ງທີ 45 ທີ່ສະພາແຫ່ງຊາດລາວຈະເປັນເຈົ້າພາບໃນເດືອນຕຸລານີ້, ຕາງໜ້າໃຫ້ແກ່ສະພາແຫ່ງຊາດ ກໍຄືຄະນະຮັບຜິດຊອບອອກແບບໂລໂກໄອປາ 45 ມອບລາງວັນໃຫ້ແກ່ຜູ້ຊະນະໃນການປະກວດ ໂດຍທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ, ຫົວໜ້າອະນຸກຳມະການກອງເລຂາແຫ່ງຊາດໄອປາ 45 ເຊິ່ງມີຜູ້ແຂ່ງຂັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

​ທ່ານ ເຂັມພອນ ອາໂນໄທ ຫົວໜ້າກົມພົວພັນລັດຖະສະພາຫຼາຍຝ່າຍ ໄດ້ລາຍງານໃຫ້ຮູ້ວ່າ: ກຳມາທິການການຕ່າງປະເທດ ກໍຄືຄະນະຮັບຜິດຊອບການອອກແບບໂລໂກໄອປາ 45 ໄດ້ມີການຄົ້ນຄວ້າກຳນົດຂອບເນື້ອໃນ, ຮູບແບບ ແລະ ເງື່ອນໄຂຂອງໂລໂກ ໃຫ້ສອດຄ່ອງກັບຈຸດປະສົງ, ເປົ້າໝາຍ ແລະ ຫົວຂໍ້ຂອງກອງປະຊຸມໄອປາ; ຈາກນັ້ນ, ໄດ້ສະເໜີຄະນະເລຂາທິການສະພາແຫ່ງຊາດ ອອກແຈ້ງການຜ່ານທາງເວັບໄຊ ແລະ ສື່ອອນລາຍຕ່າງໆ ເຖິງບັນດາຫ້າງຮ້ານ, ບໍລິສັດ ແລະບຸກຄົນທີ່ສົນໃຈ ແລະ ມີເງື່ອນໄຂເໝາະສົມ ເຂົ້າຮ່ວມການແຂ່ງຂັນ. ຜ່ານການແຂ່ງຂັນ, ສາມາດຄັດເລືອກຜູ້ຊະ ນະ ໄດ້ແກ່ທ່ານ ສອນໄຊ ແກ້ວມະນີ.

ທ່ານ ສັນຍາ ປຣະເສີດ ໄດ້ສະແດງຄວາມຍ້ອງຍໍຊົມເຊີຍ ພ້ອມທັງກ່າວວ່າ: ການອອກແບບຄັ້ງນີ້ ເປັນການປະ ກອບສ່ວນຢ່າງໃຫຍ່ຫຼວງໃຫ້ແກ່ການເປັນເຈົ້າພາບທີ່ດີຂອງປະຊາຊົນລາວ ກໍຄືບັນດາຫ້າງຮ້ານ, ບໍລິສັດ ທັງພາກລັດ ແລະ ເອກະຊົນ ທັງເປັນການສະແດງໃຫ້ເຫັນເຖິງຫົວຄິດປະດິດສ້າງ ແລະ ຄວາມອາດສາມາດໃນການສ້າງ ແລະ ອອກແບບຂອງປະຊາຊົນລາວ ກໍຄືຊາວໜຸ່ມໄວໜຸ່ມລາວ ເຊິ່ງການອອກແບບຄັ້ງນີ້ ຈະຖືກນຳໃຊ້ເຂົ້າໃນກອງປະຊຸມສະ ມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ທີ່ສະພາແຫ່ງຊາດລາວເປັນເຈົ້າພາບ ແລະ ຈະຖືກເກັບໄວ້ໃນຫ້ອງມູນເຊື້ອ ແລະ ປະຫວັດສາດຂອງສະພາແຫ່ງຊາດ ເພື່ອໃຫ້ຄົນຮຸ່ນຫຼັງໄດ້ເຫັນເຖິງຜົນງານການອອກແບບໃນຄັ້ງນີ້.

(ນາງ ອາລິນ ສຸພິມມະປະດິດ)