(ສພຊ) ວັນທີ 15 ກຸມພາຜ່ານມາ, ທີ່ສະພາແຫ່ງຊາດ ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ຕາງໜ້າຄູ່ຮ່ວມພັດທະນາ ນໍາໂດຍທ່ານ ຢຽນ ເລີດ ເຄນ ແຮມ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງສະຫະພັນເຢຍລະມັນ ປະຈໍາ ສປປລາວ ພ້ອມດ້ວຍບັນດາທ່ານຄະນະຜູ້ແທນສະຫະພາບເອີຣົບ ປະຈໍາ ສປປລາວ, ຜູ້ຕາງໜ້າອົງການຮ່ວມມື ແລະ ພັດທະນາສະວິດເຊີແລນ, ອົງການ GIZ ເພື່ອປຶກສາຫາລກ່ຽວກັບການຈັດຕັ້ງປະຕິບັດໂຄງການ CEGGA ຂອງສະພາແຫ່ງຊາດລາວ ແລະ ທິດທາງການຮ່ວມມືໃນຕໍ່ໜ້າ; ພ້ອມກັນນີ້, ກໍເປັນໂອກາດໃນການຍາດແຍ່ງຊຸກຍູ້ການຮ່ວມ ມືຈາກໂຄງການທີ່ກໍາລັງເປັນຄູ່ຮ່ວມພັດທະນາກັບສະພາແຫ່ງຊາດໂດຍກົງ.

ທ່ານ ນາງ ສີໃສ ລືເດດມູນສອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຄະນະຜູ້ແທນຄູ່ຮ່ວມພັດທະນາ ເຖິງແມ່ນວ່າໂຄງການດັ່ງກ່າວບໍ່ໄດ້ເຊັນບົດບັນທຶກຮ່ວມກັນຢ່າງ ເປັນທາງການກໍຕາມ ແລະ ກໍໄດ້ຜ່ານຂັ້ນຕອນການຕົກລົງຢ່າງເປັນເອກະສັນພາຍໃນສະພາແຫ່ງ ຊາດ ແລະ ກໍໄດ້ປະຕິບັດມາແຕ່ປີ 2018 ໄດ້ຈໍານວນ 20 ກວ່າກິດຈະກໍາໃນໄລຍະຜ່ານມາ ເຊິ່ງຜ່ານການປະຕິບັດໂຄງການ CEGGA ເຫັນວ່າສອດຄ່ອງກັບພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ສ່ວນການເຊັນບົດບັນທຶກຮ່ວມກັນນັ້ນ ສະພາແຫ່ງຊາດພວມດຳເນີນການກະກຽມຢູ່ເພາະສະພາແຫ່ງຊາດເປັນກົງຈັກທີ່ໃຫຍ່ລວມທັງສະພາທ້ອງຖິ່ນ. ໂຄງການດັ່ງກ່າວແມ່ນການມີສ່ວນຮ່ວມຂອງປະຊາຊົນໃນການປົກຄອງ, ຄວາມໂປ່ງໃສ ແລະ ລະບຽບກົດໝາຍຂອງລັດ ແລະ ໂຄງການດັ່ງກ່າວຍັງໄດ້ເສີມສ້າງການພັດທະນາຄວາມສາມາດໃຫ້ແກ່ວິຊາການຂອງສະພາແຫ່ງຊາດລາວ ໃນການເປັນເສນາທິການໃຫ້ແກ່ສະພາແຫ່ງຊາດລາວ ແລະ ຈັດຕັ້ງປະຕິບັດໂດຍ GIZ ເຊິ່ງມີສະຫະພາບເອີຣົບ, ເຢຍລະມັນ ແລະ ສະວິດເຊີແລນ ເປັນຜູ້ໃຫ້ທຶນ.

ທ່ານ ຢຽນ ເລີດ ເຄນ ແຮມ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມ ທັງໃຫ້ຮູ້ເຖິງການປະຕິບັດໂຄງການ CEGGA ຢູ່ ສປປລາວ, ສະນັ້ນ, ຕ້ອງມີຄວາມເຂົ້າໃຈໃນ ການຈັດຕັ້ງປະຕິບັດໂຄງການດັ່ງກ່າວວ່າຈະເຮັດກິດຈະກໍາໃດກ່ອນ; ທ່ານທູດຍັງກ່າວຕື່ມອີກວ່າເຖິງແມ່ນວ່າຈະບໍ່ທັນມີການເຊັນບົດບັນທຶກເປັນທາງການກໍຕາມ ແຕ່ທັງສອງຝ່າຍກໍໄດ້ມີການຈັດ ຕັ້ງກິດຈະກໍາຮ່ວມກັນຈໍານວນໜຶ່ງໃນປີ 2018 ເຊິ່ງເປັນໝາກຜົນອັນດີຂອງການປະຕິບັດໂຄງການ CEGGA, ແນວໃດກໍຕາມເບື້ອງຂອງຜູ້ໃຫ້ທຶນແມ່ນມີຄວາມຈໍາເປັນຈະຕ້ອງຮັບປະກັນວ່າ ທຸກພາກສ່ວນບໍ່ວ່າຈະເປັນຜູ້ໃຫ້ທຶນ ແລະ ຜູ້ຈັດຕັ້ງປະຕິບັດຕ້ອງໄປໃນທາງດຽວກັນ ພ້ອມທັງຫວັງວ່າສະພາແຫ່ງຊາດຈະພິຈາລະນາຄືນກ່ຽວກັບການເຊັນບົດບັນທຶກຮ່ວມ ເພາະມັນມີຄວາມສໍາຄັນຫລາຍຕໍ່ຜູ້ໃຫ້ທຶນ; ນອກຈາກນັ້ນ, ກໍໄດ້ສະເໜີໃຫ້ມີການຈັດກອງປະຊຸມຮ່ວມລະຫວ່າງຜູ້ຈັດຕັ້ງປະຕິບັດໂຄງການ ແລະ ຜູ້ໃຫ້ທຶນ ເພື່ອເປັນການພົບປະ, ແລກປ່ຽນ ແລະ ປຶກສາຫາຫລືຮ່ວມກັນ.

ໃນການພົບປະ, ກໍໄດ້ຮັບຟັງຄໍາເຫັນຈາກຜູ້ຕາງໜ້າຂອງບັນດາໂຄງການຮ່ວມ ແລະ ໄດ້ປຶກ ສາຫາຫລືກ່ຽວກັບການຈັດຕັ້ງປະຕິບັດ ແລະ ທິດທາງໃນຕໍ່ໜ້າຂອງການປະຕິບັດໂຄງການ ເພື່ອ ເຮັດແນວໃດໃຫ້ການຈັດຕັ້ງປະຕິບັດໂຄງການໃຫ້ໄດ້ຮັບໝາກຜົນ ແລະ ປະສິດທິພາບສູງທີ່ສຸດ.

(ສົມນຶກ ແກ້ວໄຊຍະຈັກ)