(ສພຊ) ໃນຕອນບ່າຍຂອງວັນທີ 02 ມັງກອນ 2024 ທີ່ສະພາແຫ່ງຊາດ ໄດ້ມີການພົບປະສອງຝ່າຍ ລາວ-ສ.ເກົາຫລີ ເຊິ່ງຝ່າຍລາວນຳໂດຍທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດລາວ ກັບ ທ່ານ ຊໍຊາມຊອກ (Seo Sam Seog) ປະທານກຳມາທິການພິເສດ ດ້ານງົບປະມານ ແລະ ການບັນຊີ ສະພາແຫ່ງຊາດ ສ.ເກົາຫລີ ພ້ອມດ້ວຍຄະນະ ເນື່ອງໃນໂອກາດເດີນ ທາງມາ ຢ້ຽມຢາມ ແລະ ເຄື່ອນໄຫວເຮັດວຽກຢູ່ ສປປລາວ.
ການພົບປະຄັ້ງນີ້ ແມ່ນຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຂອງພວກເຮົາ ເຊິ່ງຈະເປັນ ການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງ ປະເທດ ລາວ-ສ.ເກົາຫຼີ ທີ່ມີມູນເຊື້ອດີງາມມາແຕ່ດົນນານ ແລະ ໄດ້ຮັບການເສີມຂະຫຍາຍຢ່າງຕໍ່ເນື່ອງ ເຊິ່ງສະແດງ ອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆ ລະຫວ່າງສອງປະເທດ; ມີການ ຮ່ວມມືທີ່ດີທາງດ້ານເສດຖະກິດ, ການຄ້າ, ການລົງທຶນ, ສຶກສາ, ສາທາລະນະສຸກ, ທ່ອງທ່ຽວ, ກິລາ ແລະ ອື່ນໆ. ນອກນີ້, ສ.ເກົາຫຼີ ຍັງເປັນປະເທດທີ່ມີການລົງທຶນໃນອັນດັບທີ 5 ຢູ່ ສປປລາວ ໃນຂະແໜງພະລັງງານໄຟຟ້າ, ການ ກໍ່ສ້າງ, ການບໍລິການ, ກະສິກຳ, ອຸດສາຫະກໍາ-ຫັດຖະກໍາ, ການທ່ອງທ່ຽວ, ໂຮງແຮມ ແລະ ຮ້ານອາຫານ, ທະນາ ຄານ ແລະ ອື່ນໆ ພິເສດແມ່ນນັກທ່ອງທ່ຽວຈາກ ສ.ເກົາຫຼີ ເຊິ່ງມີຫຼາຍຖ້ຽວບິນຕໍ່ອາທິດ.
ໃນການພົບປະ, ທັງສອງຝ່າຍໄດ້ແຈ້ງໃຫ້ຮູ້ກ່ຽວກັບສະພາບການທີ່ພົ້ນເດັ່ນໃນການພັດທະນາເສດຖະກິດ -ສັງຄົມຂອງຕົນໃຫ້ກັນ ແລະ ກັນຊາບໂດຍສັງເຂບ, ພິເສດແມ່ນສະພາບການເຄື່ອນໄຫວຂອງກຳມາທິການພິເສດ ດ້ານງົບປະມານ ແລະ ການບັນຊີ ສະພາແຫ່ງຊາດ ສ.ເກົາຫຼີ. ທ່ານ ປອ. ລີເບີ ລີບົວປາວ ໄດ້ສະແດງຄວາມຂອບ ໃຈຕໍ່ສະພາແຫ່ງຊາດ, ລັດຖະບານ ແລະ ປະຊາຊົນ ສ.ເກົາຫຼີ ທີ່ໄດ້ໃຫ້ການຊ່ວຍເຫຼືອ ແກ່ ສປປລາວ ມາຕະຫຼອດ ເປັນຕົ້ນການເກັບກູ້ລະເບີດບໍ່ທັນແຕກ (UXO), ການຊ່ວຍເຫຼືອເພື່ອການພັດທະນາ (ODA), ການຊ່ວຍເຫຼືອ ດ້ານສາທາລະນະສຸກ ແລະ ອື່ນໆ; ພິເສດ ໄດ້ຮັບເອົາແຮງງານລາວໄປອອກແຮງງານຢູ່ ສ.ເກົາຫຼີ ເປັນຈຳນວນຫຼາຍ ເຊິ່ງເປັນການສ້າງວຽກເຮັດງານທໍາ ແລະ ລາຍຮັບໃຫ້ແກ່ປະຊາຊົນລາວ ເວົ້າລວມ, ເວົ້າສະເພາະ ເປັນການປະກອບ ສ່ວນໃນການພັດທະນາເສດຖະກິດ-ສັງຄົມຂອງ ສປປລາວ ໃຫ້ຂະຫຍາຍຕົວ.
ໃນໄລຍະຜ່ານມາ, ໄດ້ມີການແລກປ່ຽນຄະນະຜູ້ແທນຢ້ຽມຢາມ ເຊິ່ງກັນ ແລະກັນ ໃນລະດັບປະທານ ສະພາແຫ່ງຊາດ, ປະທານກໍາມາທິການ ແລະ ຄະນະມິດຕະພາບລັດຖະສະພາ ລາວ-ສ.ເກົາຫຼີ ຢ່າງເປັນປົກກະຕິ ເປັນຕົ້ນ: ປີ 2015 ທ່ານປະທານສະພາແຫ່ງຊາດ ສ.ເກົາຫຼີ ຢ້ຽມຢາມ ສປປລາວ, ປີ 2022 ທ່ານຮອງປະທານສະ ພາແຫ່ງຊາດ ສ.ເກົາຫຼີ ມາຢ້ຽມຢາມລາວ; ປີ 2023 ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງ ແວດລ້ອມ, ຄະນະມິດຕະພາບລັດຖະສະພາ ລາວ-ສ.ເກົາຫຼີ ແລະ ປະທານກໍາມາທິການວັດທະນະທໍາ-ສັງຄົມ ຂອງສະພາແຫ່ງຊາດລາວ ໄປຢ້ຽມຢາມ ແລະ ເຮັດວຽກ ຢູ່ ສ.ເກົາຫຼີ; ເດືອນກໍລະກົດ 2023 ທ່ານ ປັກ ບ່ຽງຊອກ (Park Byeong-Seug) ອະດີດປະທານສະພາແຫ່ງຊາດ ແຫ່ງ ສ.ເກົາຫຼີ ພ້ອມຄະນະ ມາຢ້ຽມຢາມ ແລະ ເຮັດວຽກ ຢູ່ ສປປລາວ. ໃນໄລຍະຜ່ານມາ ກໍາມາທິການແຜນການ, ການເງິນ ແລະ ການກວດສອບ ກໍໄດ້ຮັບການຊ່ວຍເຫຼືອເຝິກ ອົບຮົມດ້ານວິຊາການ ແລະ ອຸປະກອນຮັບໃຊ້ຫ້ອງການ ຈາກອົງການໂກຍກາ (KOICA) ປະຈໍາ ສປປລາວ ຄື: ພະນັກ ງານ 3 ທ່ານ ໄປເຝິກອົບຮົມໃນຫົວຂໍ້ SMEs ຢູ່ ສ.ເກົາຫຼີ 2 ຄັ້ງ, ເຂົ້າຮ່ວມເຝິກອົບຮົມຢູ່ລາວ ໃນຫົວຂໍ້ ການປະ ເມີນວິສາຫະກິດຜ່ານລະບົບອອນລາຍ 2 ຄັ້ງ, ໄດ້ຮັບ Laptop ແລະ Tablet ຈໍານວນໜຶ່ງ.
(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)