ຕອນເຊົ້າ, ວັນທີ 23 ສິງຫາ 2022 ທີ່ຫ້ອງປະຊຸມສະພາປະຊາຊົນແຂວງ ກອງປະຊຸມສະໄໝສາມມັນ ເທື່ອທີ 3 ຂອງສະພາປະຊາຊົນແຂວງ (ສພຂ) ຊຸດທີ II ໄຂຂຶ້ນຢ່າງເປັນທາງການ ໂດຍການເປັນປະທານ ຂອງທ່ານ ທອງສິ ເສົາສຸລິພົມ ປະທານ ສພຂ; ມີ ທ່ານ ຄໍາຜອຍ ວັນນະສານ ເຈົ້າແຂວງ-ແຂວງຜົ້ງສາລີ, ຮອງເຈົ້າແຂວງ, ກໍາມະການປະຈໍາພັກແຂວງ, ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ 2 , ສະມາຊິກສະພາປະຊາຊົນແຂວງ (ສສຂ), ອາດິດການນໍາແຂວງ, ອາດິດ ສສຊ ປະຈໍາເຂດເລືອກຕັ້ງ2, ອາດິດ ສສຂ, ມີ ສະມາຊິກອົງການປົກຄອງແຂວງ, ອົງການແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ, ສະຫະພັນນັກຮົບເກົ່າແຂວງ, ອົງການພັກ-ລັດ, ອົງການລັດທຽບເທົ່າຂັ້ນແຂວງ, ວິສາຫະກິດ, ຫົວໜ່ວຍທຸລະກິດທັງພາກລັດ, ພາກເອກະຊົນ ແລະ ພະນັກງານຊ່ວຍວຽກຄະນະ ສສຂ ປະຈໍາເມືອງເຂົ້າຮ່ວມ.

ກອງປະຊຸມໄດ້ຮັບຟັງທ່ານ ທອງສີ ເສົາສຸລິພົມ ກ່າວໄຂກອງປະຊຸມ ມີບາງຕອນທ່ານໄດ້ກ່າວວ່າ: “ກອງປະຊຸມຄັ້ງນີ້ໄຂຂຶ້ນໃນທ່າມກາງບັນຍາກາດທີ່ທົ່ວພັກ-ລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນ ຊາວແຂວງຜົ້ງສາລີ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX, ບັນດາມະຕິກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX, ມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ, ບັນດາມະຕິກອງປະຊຸມ ສະໄໝສາມັນເທື່ອທີ 2 ຂອງສະພາປະຊາຊົນແຂວງ ຊຸດທີ II, ໂດຍສະເພາະ ແຜນພັດທະນາເສດຖະກິດ-ສັງຄົມ ປະຈໍາປີ 2022 ຕິດພັນກັບ ການຈັດຕັ້ງປະຕິບັດສອງວາລະແຫ່ງຊາດ ແລະ ການຟື້ນຟູຜົນກະທົບຈາກການແຜ່ລະບາດຂອງພະຍາດໂຄວິດ-19 ໃຫ້ຄືນສູ່ສະພາບປົກກະຕິ ແລະ ກອງປະຊຸມສະໄຫມສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງນີ້ ຈະໄດ້ພິຈາລະນາຮັບຮອງບັນ ດາເນື້ອໃນທີ່ສໍາຄັນ ດັ່ງນີ້:

1. ຮັບຟັງການລາຍງານໂດຍສັງເຂບຂອງທ່ານ ເຈົ້າແຂວງ ກ່ຽວກັບສະພາບພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;
2. ຮັບຟັງການລາຍງານໂດຍສັງເຂບຂອງ ທ່ານ ຮອງເຈົ້າແຂວງ ຜູ້ຊີ້ນໍາວຽກງານເສດຖະກິດຂັ້ນແຂວງ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ຕໍ່ກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນໄລຍະທີ 1 ແລະ ການຈັດຕັ້ງປະຕິບັດໄລຍະ 2 ພາຍໃນແຂວງ;
3. ຮັບຟັງການລາຍງານໂດຍສັງເຂບຂອງ ທ່ານ ຮອງເຈົ້າແຂວງ ຜູ້ຊີ້ນໍາວຽກງານວັດທະນະທໍາ-ສັງຄົມຂັ້ນແຂວງ ປະທານກວດກາ ແລະ ຄວບຄຸມຢາເສບຕິດຂັ້ນແຂວງ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ຕໍ່ກັບ ການແກ້ໄຂບັນຫາຢາເສບຕິດ ໃນໄລຍະທີ 1 ແລະ ການຈັດຕັ້ງປະຕິບັດໄລຍະ 2 ພາຍໃນແຂວງ;
4. ຮັບຟັງການລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;
5. ຮັບຟັງການລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022;
6. ຮັບຟັງການລາຍງານຂອງອົງການປົກຄອງແຂວງ ກ່ຽວກັບຜົນ ການປັບປຸງຄຸນນະພາບລະບົບການຮຽນ-ການສອນ ໃນທຸກຊັ້ນທຸກສາຍໃນໄລຍະໃໝ່;
7. ພິຈາລະນາ ແລະ ຮັບຮອງເອົາ ບັນດາຮ່າງນິຕິກໍາໃຕ້ກົດໝາຍທັງໝົດ ຈໍານວນ 04 ສະບັບ. ໃນນີ້ສ້າງໃໝ່ 03 ສະບັບ ແລະ ປັບປຸງ 01 ສະບັບ ມີດັ່ງນີ້;

• ນິຕິກໍາໃຕ້ກົດໝາຍສ້າງໃໝ່ 03 ສະບັບ:
• ຂໍ້ຕົກລົງເຈົ້າແຂວງ ວ່າດ້ວຍການສ້າງກອງທຶນພັດທະນາກິລາກາຍຍະກຳຂອງແຂວງ;
• ຂໍ້ຕົກລົງເຈົ້າແຂວງ ວ່າດ້ວຍການກໍານົດລາຄາຫົວໜ່ວຍຊົດເຊີຍຜົນກະທົບໂດຍກົງຈາກໂຄງການພັດທະນາພື້ນຖານໂຄງລ່າງຢູ່ແຂວງຜົ້ງສາລີ;
• ຂໍ້ຕົກລົງເຈົ້າແຂວງ ວ່າດ້ວຍການຈັດງານບຸນປະເພນີ ຢູ່ແຂວງຜົ້ງສາລີ;
• ນິຕິກຳໃຕ້ກົດໝາຍປັບປຸງ 01 ສະບັບ:
• ຂໍ້ຕົກລົງເຈົ້າແຂວງ ວ່າດ້ວຍການເພີ່ມທະວີໃນການສະກັດກັ້ນຕ້ານ ແລະ ແກ້ໄຂຢາເສບຕິດ ຢູ່ແຂວງຜົ້ງສາລີ;

8. ຮັບຟັງການຊີ້ແຈງກ່ຽວກັບ ຜົນການການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນ ກ່ຽວກັບການນໍາໃຊ້ 7 ມາດຕະການສະກັດກັ້ນ ຕາມກົດໝາຍວ່າດ້ວຍການດຳເນີນຄະດີອາຍາ ຂອງອົງການໄອຍະການປະຊາຊົນແຂວງ;
9. ຮັບຟັງການຊີ້ແຈງກ່ຽວກັບ ຜົນການຈັດຕັ້ງປະຕິບັດ ກ່ຽວກັບການພິຈາລະນາຕັດສິນຄະດີດ້ວຍຜູ້ພິພາກສາຜູ້ດຽວ ຂອງສານປະຊາຊົນແຂວງ;
10. ຮັບຟັງການລາຍງານຂອງຄະນະປະຈໍາສະພາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ໃນໄລະຍະແຕ່ກອງປະ ຊຸມສະໄໝສາມັນ ເທື່ອທີ 2 ຫາ ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II;
11. ພິຈາລະນາ ແລະ ຮັບຮອງເອົາ ການສະເໜີຍົກຍ້າຍ, ແຕ່ງຕັ້ງບຸກຄະລາກອນຂອງອົງການປົກແຂວງ ຜົ້ງສາລີ ຈໍານວນໜຶ່ງ;

ນອກນັ້ນ, ຍັງຈະໄດ້ຮັບຟັງການຊີ້ແຈງຈາກ 15 ພາກສ່ວນ ຕໍ່ຄໍາຊັກຖາມຂອງຄະນະປະຈໍາສະພາປະຊາຊົນແຂວງ. ພ້ອມກັນນັ້ນ, ທານຍັງໄດ້ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນແຂວງ ຈົ່ງໄດ້ນໍາໃຊ້ສິດປະຊາທິປະໄຕ ແລະ ເຊີດຊູຄວາມຮັບຜິດຊອບການເມືອງຂອງຕົນ ໃນການຄົ້ນຄວ້າ, ປະກອບຄໍາເຫັນ ຕໍ່ທຸກບັນຫາຢ່າງຖີ່ຖ້ວນ, ພາວະວິໄສ ແລະ ເລິກເຊິ່ງ ບົນພື້ນຖານແນວທາງນະໂຍບາຍຂອງພັກ, ກົດໝາຍ ແລະ ສະພາບຄວາມເປັນຈິງທາງດ້ານເສດຖະກິດ-ສັງຄົມຂອງແຂວງເຮົາໃນປັດຈຸບັນ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ, ຮັບຮອງຄັ້ງນີ້ມີ ຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ.

ຕາມວາລະກອງປະຊຸມໃນຄາບເຊົ້າໄດ້ພິຈາລະນາ, ຮັບຮອງເອົາການສະເໜີແຕ່ງຕັ້ງ, ຍົກຍ້າຍບຸກຄະລາກອນຂອງອົງການປົກຄອງແຂວງ ໄດ້ຮັບຟັງທ່ານ ທ່ານ ຫຸມເພັງ ຈອມວິສານ ຮອງປະທານ ສພຂ ຂຶ້ນຜ່ານ ລາຍງານຜົນກ່ຽວກັບການຮັບຮອງເອົາການ ສະເໜີຍົກຍ້າຍເຈົ້າເມືອງ-ເມືອງໃໝ່ ໄປຮັບໜ້າທີ່ໃໝ່ຢູ່ພະແນກກະສິກໍາ ແລະ ປ່າໄມ້ແຂວງ; ຜ່ານໜັງສືສະເໜີຂອງເຈົ້າແຂວງ ສະບັບເລກທີ 122/ຂຜລ, ລົງວັນທີ 12 ສິງຫາ 2022 ພິຈາລະນາການຍົກຍ້າຍ ພະນັກງານໄປຮັບໜ້າທີ່ໃໝ່ຢູ່ແຂວງວຽງຈັນ “ພິຈາລະນາການຍົກຍ້າຍ ຂອງທ່ານ ນາງ ດວງຈັນ ຊາມູນຕີ ກໍາມະການພັກແຂວງ, ຫົວໜ້າພະແນກກະສິກໍາ ແລະ ປ່າໄມ້ແຂວງ ໄປຮັບໜ້າທີ່ຢູ່ແຂວງວຽງຈັນ”; ຜ່ານໜັງສືສະເໜີຂອງເຈົ້າແຂວງ ສະບັບເລກທີ 125/ຂຜລ, ລົງວັນທີ 22 ສິງຫາ 2022 ສະເໜີພິຈາລະນາຮັບຮອງເອົາການແຕ່ງຕັ້ງຫົວໜ້າພະແນກກະສິກໍາ ແລະ ປ່າໄມ້ແຂວງ “ພິຈາລະນາ, ຮັບຮອງເອົາການແຕ່ງຕັ້ງ ທ່ານ ສົມຈິດ ສິດທິວົງ ເປັນຫົວໜ້າພະແນກກະສິກໍາ ແລະ ປ່າໄມ່ແຂວງ”; ຮັບຟັງ ທ່ານ ຄໍາຜອຍ ວັນນະສານ ລາຍງານໂດຍສັງເຂບ ກ່ຽວກັບສະພາບພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍໍາປີ 6 ເດືອນຕົ້ນປີ ແລະ ທິດທາງແຜນການ 6​ ເດືອນທ້າຍປີ 2022; ຮັບຟັງທ່ານ ວິສອນ ລາວເມົາ ຮອງເຈົ້າແຂວງ (ຜູ້ຊີ້ນໍາວຽກງານຂົງເຂດເສດຖະກິດ) ລາຍງານກ່ຽວກັບການຈັດຕັ້ງປະຕິບັດ ວາລະແຫ່ງຊາດ ຕໍ່ກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນໄລຍະທີ 1 ແລະ ການຈັດຕັ້ງປະຕິບັດໄລຍະ 2 ພາຍໃນແຂວງ; ຮັບຟັງທ່ານ ຄໍາເຫຼັກ ໃຈອີສານ ຮອງເຈົ້າແຂວງ, ປະທານຄະນະກຳມະການກວດກາ ແລະ ຄວບຄຸມຢາເສບຕິດຂັ້ນແຂວງ ລາຍງານ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ຕໍ່ກັບການ ແກ້ໄຂບັນຫາຢາເສບຕິດ ໃນໄລຍະທີ 1 ແລະ ການຈັດຕັ້ງປະຕິບັດໄລຍະ 2 ພາຍໃນແຂວງ; ຮັບຟັງທ່ານ ທອງສຸກ ເປົາສຸລີ ຫົວໜ້າພະແນກແຜນການ-ການລົງທຶນແຂວງ ລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022; ຮັບຟັງທ່ານ ປອ ວັນໄຊ ສຸກສັນ ຫົວໜ້າພະແນກການເງິນແຂວງ ລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022; ຮັບຟັງທ່ານ ພອນໄຊ ອ່ອນສາ ຫົວໜ້າພະແນກສຶກສາທິການ ແລະ ກິລາແຂວງ ລາຍງານ ກ່ຽວກັບການປັບປຸງຄຸນນະພາບລະບົບການຮຽນ-ການສອນ ໃນທຸກຊັ້ນທຸກສາຍໃນໄລຍະໃໝ່; ຮັບຟັງ ທ່ານ ຫຸມເພັງ ຈອມວິສານ ຮອງປະທານ ສພຂ, ຕາງໜ້າໃຫ້ຄະນະປະຈໍາສະພາປະຊາົຊນແຂວງ ຂຶ້ນປະກອບຄຳເຫັນ ຂອງຄະນະປະຈໍາສະພາປະຊາຊົນແຂວງ ຕໍ່ບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງ ປະຈໍໍາ 6 ເດືອນຕົ້ນປີ 2022 ແລະ ແຜນການ 6 ເດືອນທ້າຍປີ 2022; ການຈັດຕັ້ງປະຕິບັດ ວາລະແຫ່ງຊາດ ຕໍ່ກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດ ໃນໄລຍະທີ 1 ແລະ ການຈັດຕັ້ງປະຕິບັດໄລຍະ 2 ພາຍໃນແຂວງ ແລະ ບົດລາຍງານກ່ຽວກັບການປັບປຸງຄຸນນະພາບລະບົບການຮຽນ-ການສອນ ໃນທຸກຊັ້ນທຸກສາຍໃນໄລຍະໃໝ່.

ກອງປະຊຸມສະໄໝສາມມັນ ເທື່ອທີ 3 ຂອງສະພາປະຊາຊົນແຂວງຜົ້ງສາລີ ຊຸດທີ II ຈະດໍາເນີນໄປເຖິງ ຕອນບ່າຍຂອງວັນທີ 25 ສິງຫາ 2022 ຈຶ່ງຈະສໍາເລັດ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ