ຕອນເຊົ້າວັນທີ 1 ສິງຫາ 2023 ສະພາປະຊາຊົນແຂວງຫລວງນ້ຳທາ ໄດ້ຈັດພິທີເປີດສ້າງຂະບວນການແຂ່ງຂັນກິລາເປຕັງຍິງ – ຊາຍ ຊິງຂັນປະທານສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ ຢູ່ທີເດີນກິລາເປຕັງແຟນໃຫມ່ ໃຫ້ກຽດເຂົ້າຮ່ວມພິທີມີ ທ່ານ ພັທ ສົມພອນ ສຸວັນນະກາສີ ປະທານສະຫະພັນກິລາເປຕັງແຂວງ, ມີນັກກິລາເປຕັງຍິງ-ຊາຍ ຈາກພະແນກການຂອງແຂວງ, ກົມກອງ, ຫ້ອງການ, ໂຮງຮຽນ, ບໍລິສັດຫ້າງຮ້ານ ແລະ ພໍ່ແມ່ປະຊາຊົນຊາວແຂວງຫຼວງນ້ຳທາ ເຂົ້າຮ່ວມຢ່າງເປັນຂະບວນຟົດຟື້ນ. 
ຈຸດປະສົງໃນພິທີມື້ນີ້ ເພື່ອເຕົ້າໂຮມສ້າງຂະບວນການອອກກຳລັງກາຍ ແລະ ແຂ່ງຂັນກິລາຂໍ່ານັບຮັບຕ້ອນ ການສະເຫຼີມສະຫຼອງສອງວັນສຳຄັນປະຫວັດສາດທີ່ເຕີບໂຕມາພ້ອມການຕໍ່ສູ້ກູ້ຊາດຄື: ວັນປະກາດໃຊ້ລັດຖະທໍາມະນູນແຫ່ງ ສປປ ລາວ ຄົບຮອບ 32 ປີ( 15 ສິງຫາ 1991 – 15 ສິງຫາ 2023) ແລະ ວັນສ້າງຕັ້ງສະພາປະຊາຊົນຂັ້ນແຂວງ ຄົບຮອບ 45 ປີ ( 4 ສິງຫາ 1978 – 4 ສິງຫາ 2023 ) ໃຫ້ມີຄວາມໝາຍນສໍາຄັນ, ມີບັນຍາກາດຟົດຟື້ນ ແລະ ມ່ວນຊື່ນ, ເຮັດໃຫ້ມວນຊົນຊາວແຂວງຫຼວງນ້ຳທາ ໄດ້ມີໂອກາດໄດ້ອອກກຳລັງກາຍເພື່ອສຸຂະພາບ, ສ້າງມິດຕະພາບ ແລະ ຮັດແໜ້ນຄວາມສາມັກຄີ ແລະ ມີບັນຍາກາດກຽມພ້ອມຮັບໃຊ້ 2 ໜ້າທີ່ຍຸດທະສາດຂອງຊາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ ແລະ ການແຂ່ງຂັນກິລາເປຕັງຍິງ – ຊາຍ ໃນຄັ້ງນີ້ລວມທັງໝົດ 47 ທິມ, ທິມຍິງ 18 ທິມ ແລະ ຈະໄດ້ດໍາເນີນການແຂ່ງຂັນເປັນເວລາ 3 ວັນເຕັມ.
ໃນໂອກາດສ້າງຂະບວນການແຂ່ງຂັນກິລາເປຕັງຍິງ – ຊາຍ ຊິງຂັນປະທານສະພາປະຊາຊົນແຂວງ ນີ້ທາງຮ້ານຂາຍລົດໂຟຕ໋ອນ ແຂວງຫລວງນ້ຳທາ ໄດ້ໃຫ້ການສະໜັບສະໜູນນ້ຳດື່ມຈຳນວນ 10 ແກັດ, ເພື່ອໝູນໃຊ້ເຂົ້າໃນຂະບວນການແຂ່ງຂັນກິລາ ໃນການສະເຫລີມສະຫລອງວັນປະກາດໃຊ້ລັດຖະທໍາມະນູນແຫ່ງ ສປປ ລາວ ຄົບຮອບ 32 ປີ ແລະ ວັນສ້າງຕັ້ງສະພາປະຊາຊົນຂັ້ນແຂວງ ຄົບຮອບ 45 ປີ.
ໂດຍ: ວັນນີ ແຝງບົວວັນ