ພິທີເຊັນຂໍ້ຕົກລົງວ່າດ້ວຍການພົວພັນ ລະຫວ່າງ ຄະນະປະຈຳສະພາປະຊາຊົນແຂວງ ກັບ ຄະນະປະຈຳແນວລາວສ້າງຊາດແຂວງ ໄດ້ມີຂຶ້ນໃນຕອນເຊົ້າ ຂອງວັນທີ 22 ກັນຍາ 2022 ທີ່ຫ້ອງປະຊຸມ ຄະນະປະຈຳ ສະພາປະຊາຊົນແຂວງ ຫົວພັນ ໂດຍການເຂົ້າຮ່ວມເປັນສັກຂີພິຍານຂອງທ່ານ ຄະນະປະຈຳ ສະພາປະຊາຊົນແຂວງ, ຄະນະປະຈຳ ແນວລາວສ້າງຊາດແຂວງ ພ້ອມດ້ວຍເລຂາທິການສະພາປະຊາຊົນແຂວງ, ຫົວໜ້າ-ຮອງຫົວໜ້າຂະແໜງຕະຫລອດຮອດ ວິຊາການພາຍໃນຂະແໜງການທີ່ກ່ຽວຂ້ອງ ຂອງທັງສອງຝ່າຍເຂົ້າຮ່ວມ.

          ໃນພິທີ ໄດ້ຮັບຟັງການຜ່ານຮ່າງບົດສະຫລຸບຫຍໍ້ ການຈັດຕັ້ງປະຕິບັດວຽກງານ ວ່າດ້ວຍການພົວພັນ ລະຫວ່າງ ຄະນະປະຈຳ ສະພາປະຊາຊົນແຂວງ ແລະ ຄະນະປະຈຳ ແນວລາວສ້າງຊາດ ແຂວງ ໃນໄລຍະຜ່ານມາ ຈາກທ່ານ ອິນ ວິໄລພອນ ຫົວໜ້າຂະແໜງ ວັດທະນະທຳ, ສັງຄົມ ແລະ ບັນດາເຜົ່າ ສະພາປະຊາຊົນແຂວງ. ຈາກນັ້ນ; ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳຄິດຄຳເຫັນ, ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ ໂດຍສະເພາະ ການຈັດຕັ້ງປະຕິບັດ ຕາມພາລະບົດບາດ, ສິດ ແລະ ໜ້າທີ່ ຕາມເນື້ອໃນການພົວພັນ ລະຫວ່າງ ຄະນະປະຈຳ ສະພາປະຊາຊົນແຂວງ ກັບ ຄະນະປະຈຳ ແນວລາວສ້າງຊາດ ແຂວງ ໃນໄລຍະຜ່ານມາ ມີຂໍ້ສະດວກ ແລະ ຂໍ້ຫຍຸ້ງຍາກ ເພື່ອຖອດຖອນບົດຮຽນ ແລະ ສືບຕໍ່ປັບປຸງແກ້ໄຂໃຫ້ດີຂຶ້ນກວ່າເກົ່າ.

            ພິທີເຊັນຂໍ້ຕົກລົງຄັ້ງນີ້, ທ່ານ ສີຄຳ ບຸນມີໄຊ ປະທານຄະນະກຳມະການ ວັດທະນະທຳ, ສັງຄົມ ແລະ ບັນດາເຜົ່າ ໄດ້ຜ່ານ ຂໍ້ຕົກລົງ ວ່າດ້ວຍການພົວພັນ ລະຫວ່າງ ຄະນະປະຈຳສະພາປະຊາຊົນແຂວງ ກັບ ຄະນະປະຈຳແນວລາວສ້າງຊາດແຂວງ ເຊິ່ງລົງນາມໂດຍຝ່າຍ ສະພາປະຊາຊົນແຂວງ ແມ່ນທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານ ສະພາປະຊາຊົນແຂວງ ແລະ ຝ່າຍ ແນວລາວສ້າງຊາດແຂວງ ແມ່ນທ່ານ ວົງເພັດ ກຽນສິງຮັກ ຄະນະປະຈຳພັກແຂວງ, ປະທານແນວລາວສ້າງຊາດ ແຂວງຫົວພັນ.

ຂໍ້ຕົກລົງສະບັບດັ່ງກ່າວ, ປະກອບດ້ວຍ 5 ໝວດ 25 ມາດຕາ ເຊິ່ງໄດ້ກຳນົດການນຳໃຊ້ສຳລັບການປະສານງານຮອບດ້ານ ລະຫວ່າງ ຄະນະປະຈຳ ສະພາປະຊາຊົນແຂວງ ກັບ ຄະນະປະຈຳ ແນວລາວສ້າງຊາດ ແຂວງ ເປັນຕົ້ນແມ່ນການປະສານສົມທົບ ໃນການຄົ້ນຄວ້າ, ປຶກສາຫາລື ເພື່ອເປັນເອກະພາບ ໃນການລົງຕິດຕາມວຽກງານທີ່ມີການພົວພັນພາລະບົດບາດ ແລະ ຄວາມຮັບຜິດຊອບ ຂອງສະພາປະຊາຊົນແຂວງ ແລະ ແນວລາວສ້າງຊາດແຂວງ.

( ພາບ ແລະ ຂ່າວໂດຍ ນາງ ປຸ້ຍນິຕາ ເພັງມີໄຊ ).