ໃນລະຫວ່າງວັນທີ 08-09 ສິງຫາ 2024 ທີ່ຫ້ອງປະຊຸມສະພາປະຊາຊົນແຂວງ ຜົ້ງສາລີ ໄດ້ຈັດກອງປະຊຸມຝຶກອົບຮົມຂື້ນກ່ຽວກັບຄວາມຮູ້ພື້ນຖານດ້ານວຽກງານຫ້ອງສະໝຸດ ໃຫ້ພະນັກງານວິຊາການ ສະພາປະຊາຊົນແຂວງ ໂດຍການເປັນປະທານຮ່ວມຂອງທ່ານ ຄໍາແທ່ນ ວິລະກຸນ ຮອງໜ້າສະຖາບັນຄົ້ນຄວ້ານິຕິກຳ ຂອງສະພາແຫ່ງຊາດ  ແລະ ທ່ານ ຫຸມເພັງ ຈອມວິສານ ຮອງປະທາສະພາປະຊາຊົນແຂວງ, ເຂົ້າຮ່ວມມີ ຮອງເລຂາທິການສະພາປະຊາຊົນແຂວງ, ຫົວໜ້າສູນ, ຮອງສູນ, ນັກວິທະຍາກອນ ແລະ ນັກສຳມະນາກອນ ສະພາປະຊາຊົນແຂວງ ເຂົ້າຮ່ວມ

ການຝຶກອົບຮົມຄັ້ງນີ້ ກໍເພື່ອສ້າງຄວາມເຂັ້ມແຂງໃຫ້ແກ່ພະນັກງານສະພາປະຊາຊົນຂັ້ນແຂວງຕໍ່ກັບວຽກງານຫ້ອງສະໝຸດ ໃຫ້ມີຄວາມຮັບຮູ້, ຄວາມສາມາດໃນການຈັດຕັ້ງຫ້ອງອ່ານ ແລະ ສາມາດຄຸ້ມຄອງນໍາໃຊ້ຫ້ອງອ່ານນີ້ໃຫ້ມີ ປະສິດທິພາບ ແລະ ປະສິດທິຜົນສູງໃນອານາຄົດ, ໃນວາລະກອງປະຊຸມ ປະທານກອງປະຊຸມຍັງໄດ້ມີການມອບ-ຮັບປື້ມຈໍານວນໜື່ງກ່ຽວກັບຫ້ອງສະໝຸດ ໃຫ້ແກ່ສະພາປະຊາຊົນແຂວງ ນໍາໃຊ້ເຂົ້າໃນຫ້ອງສະໝຸດຕື່ມອີກ.

ກອງປະຊຸມຝຶກອົບຮົມຄັ້ງນີ້ແມ່ນໃຫ້ກຽດຂຶ້ນບັນລະຍາຍເອກະສານສໍາຄັນຕ່າງໆ ຂອງ ທ່ານ ນາງ ປານຄໍາ ຂະຫຍອງເອກ ຫົວໜ້າສູນຝຶກອົບຮົມ ແລະ ຂໍ້ມູນຂ່າວສານ ແລະ ນັກວິທະຍາກອນ ຈາກສະພາແຫ່ງຊາດ ເຊິ່ງລົງເລິກໃນ 4 ຫົວຂໍ້ ທັງພາກທິດສະດີ ແລະ ພາກປະຕິບັດຕົວຈິງມີດັ່ງນີ້:

1) ຄວາມໝາຍ ແລະ ຄວາມສໍາຄັນຂອງຫ້ອງສະໝຸດ;

2) ການຈໍ້າກາ, ການໄຈ້ແຍກປື້ມ ແລະ ການລົງທະບຽນ ປື້ມ, ວາລະສານ, ໜັງສືພິມ;

3) ການຕິສັນ, ຕິດຊອງ, ການຈັດມ້ຽນປື້ມ, ວາລະສານ, ໜັງສືພິມ;

4) ການໃຫ້ບໍລິການຫ້ອງສະໝຸດ.

ຫຼັງຈາກຄູຝືກບັນຍາຍແຕ່ລະຫົວຂໍ້ແລ້ວ ໄດ້ນໍາພານັກສໍາມະນາກອນປະຕິບັດຕົວຈິງເພື່ອເປັນຄວາມຮູ້ພື້ນຖານ ແລະ ໄດ້ມີການສົນທະນາແລກປ່ຽນບົດຮຽນ.​ ນອກຈາກນັ້ນ, ຍັງໄດ້ນໍາພານັກສໍາມະນາກອນຈັດມ້ຽນປຶ້ມ ຢູ່ໃນຫ້ອງສະໝຸດຂອງສະພາປະຊາຊົນແຂວງ ຕື່ມອີມ.

ມາໃນຕອນທ້າຍກອງປະຊຸມ, ປະທານກອງປະຊຸມ ໄດ້ຮຽກຮ້ອງມາຍັງນັກສຳມະນາກອນທຸກທ່ານ ຈົ່ງພ້ອມກັນ ນໍາເອົາບົດຮຽນທີ່ໄດ້ຮັບການຝຶກອົບຮົມໃນຄັ້ງນີ້ ໄປນໍາໃຊ້ເຂົ້າໃນວຽກງານຕົວຈິງ ເພື່ອເຮັດໃຫ້ສາມາດເປີດເປັນຫ້ອງສະໝຸດເປັນລະບົບຄົບຊຸດ ແລະ ສາມາດເປັນບ່ອນສະໜອງຂໍ້ມູນທີ່ສໍາຄັນ ໃຫ້ແກ່ຜູ້ທີ່ມີຄວາມສົນໃຈ, ສຶກສາຄົ້ນຄວ້າ ໂດຍສະເພາະ ແມ່ນສະໜອງໃຫ້ ສສຂ ແລະ ພາກສ່ວນກ່ຽວຂ້ອງ.

(ພາບ-ຂ່າວ: ສູນທອງ)