(ສພຊ) – ລະຫວ່າງວັນທີ 29 ສິງຫາ – 4 ກັນຍາ 2024 ທ່ານ ປອ. ບຸນຕາ ອ່ອນນາວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ແຂວງໄຊຍະບູລີ ໄດ້ເຂົ້າຮ່ວມກອງປະຊຸມເວທີປຶກສາຫາລືແລກປ່ຽນມິດຕະພາບ ລະ ຫວ່າງສະມາຊິກລັດຖະສະພາສາກົນ ຢູ່ນະຄອນຫຼວງປັກກິ່ງ ແລະ ນະຄອນຊຽງໄຮ້ ທີ່ຈັດໂດຍສະມາຄົມມິດຕະພາບນາ ນາຊາດແຫ່ງ ສປຈີນ ພາຍໃຕ້ຫົວຂໍ້ “ການເສີມສ້າງຄູ່ຮ່ວມມືສາກົນ ເພື່ອການພັດທະນາແບບຍືນຍົງ” ເຊິ່ງມີຜູ້ແທນຕາງໜ້າ 43 ປະເທດເຂົ້າຮ່ວມ; ບັນດາຄະນະຜູ້ແທນໄດ້ຮ່ວມກັນແລກປ່ຽນຄໍາຄິດຄໍາເຫັນ ແລະ ປຶກສາຫາລືໃນຫຼາຍຫົວຂໍ້ຍ່ອຍ. ນອກຈາກນີ້, ຜູ້ແທນສະພາແຫ່ງຊາດ ສປປລາວ ຍັງໄດ້ເຂົ້າຮ່ວມເວທີປຶກສາຫາລືຍ່ອຍທີ 4 ໃນຫົວຂໍ້ “ການຮ່ວມມື ໜຶ່ງແລວ ໜຶ່ງເສັ້ນທາງ ທີ່ມີຄຸນນະພາບ ແລະ ການຮ່ວມມືສາກົນເພື່ອການພັດທະນາແບບຍືນຍົງ” ໂດຍສະເໜີໂຄງການທາງລົດໄຟ ລາວ-ຈີນ ເປັນຕົວແບບໃນຂອບການຮ່ວມມື ໜຶ່ງແລວ ໜຶ່ງເສັ້ນທາງ ທີ່ສະແດງໃຫ້ເຫັນຜົນປະ ໂຫຍດອັນໃຫຍ່ຫຼວງ ພາຍຫຼັງເປີດບໍລິການມາໄດ້ເກືອບ 3 ປີ ພ້ອມທັງສິ່ງທ້າທາຍໃນການຄຸ້ມຄອງບໍລິຫານ ທັງທາງດ້ານເຕັກນິກ, ບຸກຄະລາກອນ ແລະ ໜີ້ສິນ ເພື່ອໃຫ້ມີຄວາມຍືນຍົງ.

ນອກຈາກນັ້ນ, ຄະນະຜູ້ແທນທັງໝົດ ຍັງໄດ້ມີໂອກາດຢ້ຽມຢາມພື້ນຖານການພັດທະນາເສດຖະກິດ-ສັງຄົມ ໂດຍການໄປທັດສະນະສຶກສາພື້ນຖານການຜະລິດ 2 ແຫ່ງ ຢູ່ນະຄອນຊຽງໄຮ້ ຄື: ໂຮງງານຜະລິດຍົນ COMAC ເປັນຜູ້ຜະລິດຍົນຂົນສົ່ງຜູ້ໂດຍສານ ແລະ ໂຮງງານ SAIC ເຊິ່ງເປັນຜູ້ຜະລິດຍານພາຫະນະທາງບົກໃຫຍ່ທີ່ສຸດ, ມີຫຼາຍຍີ່ຫໍ້ ແລະ ຈຳໜ່າຍຫຼາຍທີ່ສຸດໃນປະເທດຈີນ; ທັດສະນະສຶກສາໝູ່ບ້ານຫວູຟາງ ທີ່ເປັນຕົວແບບດ້ານການພັດທະນາຊົນນະ ບົດແບບຍືນຍົງ ໂດຍການສ້າງຄວາມເຂັ້ມແຂງດ້ວຍຕົນເອງ ແລະ ມີພາກລັດສະໜັບສະໜູນດ້ານນະໂຍບາຍ; ພົບປະເຮັດວຽກກັບທ່ານ ເສິນ ຈິໜິງ (Chen Jining) ເລຂາຄະນະພັກນະຄອນຊຽງໄຮ້; ຢ້ຽມຢາມສະພາປະຊາຊົນນະຄອນຊຽງໄຮ້ ແລະ ສະຖານທີ່ຈັດກອງປະຊຸມໃຫຍ່ພັກກອມມູນິດຈີນ.