ທ່ານ ພົທ. ສຸວອນ ເລືອງບຸນມີ ມີຄຳເຫັນວ່າ: ໃນໄລຍະຜ່ານ ຂະແໜງການທີ່ກ່ຽວຂ້ອງກັບວຽກງານສາສະໜາ ໄດ້ຈັດກອງປະຊຸມປະຈໍາປີ, ເຝິກອົບຮົມ, ສໍາມະນາ ແລະ ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດານິຕິກໍາກ່ຽວຂ້ອງມາແລ້ວຫຼາຍຄັ້ງກໍຕາມ; ແຕ່ເຫັນວ່າບັນຫາປາກົດການຫຍໍ້ທໍ້ທາງສາສະໜາ ກໍຍັງເກີດຂຶ້ນເລື້ອຍໆ, ມີລັກສະນະແຜ່ຂະຫຍາຍເປັນວົງກວ້າງ ແລະ ເລິກແລບກວ່າເກົ່າ. ພ້ອມກັນນັ້ນ, ການແກ້ໄຂບັນຫາປາກົດການຫຍໍ້ທໍ້ທາງສາສະໜາຂອງອົງການປົກຄອງທ້ອງຖິ່ນຫຼາຍບ່ອນ ຍັງບໍ່ມີຄວາມເປັນເອກະພາບ, ບໍ່ໄປຕາມນິຕິກໍາທີ່ໄດ້ກໍານົດໄວ້ ແລະ ຍັງບໍ່ມີລະບຽບຫຼັກການທີ່ຊັດເຈນ.

ກອງປະຊຸມໄດ້ຮັບຟັງການລາຍງານສະພາບການຄຸ້ມຄອງ, ປົກປ້ອງການຈັດຕັ້ງ ແລະ ເຄື່ອນໄຫວຂອງສາສະໜາ; ແລກປ່ຽນບົດຮຽນ ແລະ ທັດສະນະຂອງພາກສ່ວນກ່ຽວຂ້ອງໃນການແກ້ໄຂປາກົດການຫຍໍ້ທໍ້ຕ່າງໆທາງສາສະໜາ ແລະ ການຈັດຕັ້ງຜັນຂະ ຫຍາຍບັນດານິຕິກໍາກ່ຽວຂ້ອງກັບວຽກງານສາສະໜາຂອງກະຊວງ ແລະ ອົງການກ່ຽວຂ້ອງຂັ້ນສູນກາງໃນໄລຍະຜ່ານມາ ເປັນຕົ້ນ: ຜົນການຈັດຕັ້ງປະຕິບັດດໍາລັດ 315/ລບ, ລົງວັນທີ 16/8/2016 ແລະ ຄໍາແນະນໍາກ່ຽວກັບການຈັດຕັ້ງປະຕິບັດດໍາລັດວ່າດ້ວຍການ ປົກປ້ອງ ແລະ ຄຸ້ມຄອງການເຄື່ອນໄຫວສາສະໜາ ຢູ່ ສປປລາວ ສະບັບເລກທີ 16/ພນ, ລົງວັນທີ 09/11/2016 (ກະຊວງພາຍໃນ); ຜົນການຕິດຕາມກວດກາການເຄື່ອນໄຫວວຽກງານສາສະໜາ ຕາມດຳລັດ 315/ລບ, ລົງວັນທີ 16/8/2016 ໄລຍະຜ່ານມາ (ກບຜ); ການຄຸ້ມຄອງອົງການ ຈັດຕັ້ງ NGOs ກັບການເຄື່ອນໄຫວສາສະໜາໄລຍະຜ່ານມາ (ກະຊວງການຕ່າງປະເທດ); ວຽກງານສາສະໜາ ແລະ ຄວາມໝັ້ນຄົງຂອງຊາດ (ຄະນະກຳມະການ ປກຊ-ປກສ ສູນກາງ); ວຽກງານກໍ່ສ້າງຮາກຖານການເມືອງກັບການ ເຄື່ອນໄຫວສາສະໜາ (ກົມກໍ່ສ້າງຮາກຖານການເມືອງ, ກະຊວງປ້ອງກັນປະເທດ); ບາງທັດສະນະໃນການແກ້ໄຂປາກົດການຫຍໍ້ທໍ້ທາງດ້ານສາສະໜາໃນໄລຍະຜ່ານມາ (ສະຫະພັນນັກຮົບເກົ່າແຫ່ງຊາດລາວ); ບາງບົດຮຽນໃນການແກ້ໄຂປາກົດການຫຍໍ້ທໍ້ທາງດ້ານສາສະໜາໃນໄລຍະຜ່ານມາ (ກົມໃຫຍ່ສັນຕິບານ, ກະຊວງປ້ອງກັນຄວາມສະຫງົບ). ຈາກນັ້ນ, ຜູ້ເຂົ້າຮ່ວມໄດ້ສຸມສະຕິປັນຍາປະ ກອບຄໍາຄິດຄໍາເຫັນເອກະພາບ ແລະ ໄປລວງດຽວກັນ ພ້ອມທັງຊອກທິດທາງ ແລະ ວິທີການ ເພື່ອເປັນຂໍ້ມູນໃນການກໍານົດຫຼັກການ ກໍຄືນິຕິກໍາທີ່ເປັນບ່ອນອີງໃຫ້ແກ່ການແກ້ໄຂຂໍ້ຂັດແຍ່ງທີ່ເກີດຂຶ້ນຍ້ອນການເຊື່ອຖືສາສະໜາ ໃຫ້ຫຼຸດໜ້ອຍຖອຍລົງເທື່ອລະກ້າວ ແນ ໃສ່ເຮັດໃຫ້ສາສະນິກະຊົນຈະໄດ້ດໍາລົງຊີວິດດ້ວຍຄວາມສາມັກຄີປອງດອງ, ເປັນກໍາລັງແຮງໃນການພັດທະນາປະເທດຊາດ.

(ຂ່າວ: ນາງ ອາລິນ ສຸພິມມະປະດິດ, ພາບ: ອານຸສອນ ພູມມີທອນ)