(ສພຊ) ໃນວັນທີ 12 ທັນວາ 2023 ທີ່ຫໍສະພາແຫ່ງຊາດ, ຄະນະບໍລິຫານງານພັກສະພາແຫ່ງຊາດ ໄດ້ຈັດ ກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ XI, ປາຖະ ກະຖາວັນຊາດທີ 2 ທັນວາ ຄົບຮອບ 48 ປີ (02/12/1975-02/12/2023) ແລະວັນເກີດປະທານ ໄກສອນ ພົມ ວິຫານ ຄົບຮອບ 103 ປີ (13/12/1920-13/12/2023) ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ; ມີບັນດາສະຫາຍຄະນະບໍລິ ຫານງານພັກສະພາແຫ່ງຊາດ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກ ຮາກ ຖານ, ສະມາຊິກພັກສົມບູນ, ສະມາຊິກພັກສໍາຮອງ ແລະພະນັກງານ-ລັດຖະກອນພາຍໃນສະພາແຫ່ງຊາດ ເຂົ້າ ຮ່ວມເພື່ອຮັບຟັງການເຜີຍແຜ່ ແລະເຊື່ອມຊຶມມະຕິກອງປະຊຸມ ແລະວັນສໍາຄັນຕ່າງໆຂອງຊາດ ໃຫ້ເຂົ້າໃຈເລິກເຊິ່ງ.

ກອງປະຊຸມໄດ້ຮັບຟັງການປາຖະກະຖາວັນຊາດທີ 2 ທັນວາ ຄົບຮອບ 48 ປີ ແລະວັນເກີດປະທານ ໄກ ສອນ ພົມວິຫານ ຄົບຮອບ 103 ປີ ຈາກສະຫາຍ ສົມສະຫວາດ ເລັ່ງສະຫວັດ ອະດີດກໍາມະການກົມການເມືອງ ສູນກາງພັກ, ອະດີດຮອງນາຍົກລັດຖະມົນຕີ; ເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 7 ສະໄໝທີ XI ໂດຍສະຫາຍ ຄໍາໃບ ດໍາລັດ ກໍາມະການສູນກາງພັກ, ປະທານຄະນະກວດກາພັກສະພາແຫ່ງຊາດ. ຫຼັງຈາກນັ້ນ, ສະຫາຍ ສິງຄໍາ ວົງພະຈັນ ກໍາມະການຄະນະບໍລິຫານງານພັກ, ຫົວໜ້າຄະນະຊ່ວຍວຽກຄະນະບໍລິ ຫານງານພັກສະພາແຫ່ງຊາດ ໄດ້ຜ່ານມະຕິຄະນະປະຈໍາສະພາແຫ່ງຊາດ ວ່າດ້ວຍອະນຸມັດໃຫ້ພະນັກງານຮັບ ອຸດ ໜູນບໍານານ, ປະກາດຕໍາແໜ່ງການນໍາຂັ້ນສູງ, ຕໍາແໜ່ງບໍລິຫານປະເພດ 1, 2, 3 ແລະຍົກຍ້າຍພະນັກງານມາປະຈໍາການຢູ່ສະພາແຫ່ງຊາດ; ຜ່ານຂໍ້ຕົກລົງຂອງຄະນະເລຂາທິການສະພາແຫ່ງຊາດ ວ່າດ້ວຍການແຕ່ງຕັ້ງຕໍາແໜ່ງບໍລິ ຫານປະເພດ 4 ແລະ 5 ພາຍໃນສະພາແຫ່ງຊາດ.

ໂອກາດດັ່ງກ່າວ ສະຫາຍ ປອ. ນາງ ສູນທອນ ໄຊຍະຈັກ ຍັງໄດ້ມີຄໍາເຫັນໂອ້ລົມ ແລະໃຫ້ທິດຊີ້ນໍາຕໍ່ກອງປະຊຸມວ່າ: ຄະນະບໍລິຫານງານພັກສະພາແຫ່ງຊາດທີ່ນໍາພາຢູ່ແຕ່ລະຂົງເຂດ, ບັນດາຮາກຖານພັກ ຈະຕ້ອງໄດ້ເພີ່ມທະວີຄວາມເອົາໃຈໃສ່ໃນການສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ, ພະນັກງານ-ລັດຖະກອນ ທີ່ຢູ່ໃນຂອບເຂດຄວາມຮັບຜິດຊອບຂອງຕົນ; ເປັນເຈົ້າການນໍາພາການຈັດຕັ້ງຜັນຂະຫຍາຍຜົນສໍາເລັດກອງປະຊຸມສະ ໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ຕາມຂອບເຂດຄວາມຮັບຜິດຊອບຂອງແຕ່ລະພາກສ່ວນ ໃຫ້ໄດ້ຮັບຜົນສໍາເລັດ. ວຽກງານສໍາຄັນອີກອັນໜຶ່ງ ແມ່ນການປັບປຸງເນື້ອໃນຂອງມະຕິກອງປະຊຸມສະພາແຫ່ງຊາດທີ່ຮັບຮອງເອົາວຽກງານຕ່າງໆ ເປັນຕົ້ນແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ສອງວາລະແຫ່ງຊາດ, ວຽກງານກວດສອບແຫ່ງລັດ, ວຽກງານກວດກາແຫ່ງລັດ ໃຫ້ສໍາເລັດທັນເວລາ ເພື່ອເປັນນິຕິກໍາທີ່ມີຄວາມສັກສິດ ແລະມີຜົນບັງຄັບຈັດຕັ້ງປະຕິບັດໃຫ້ເກີດໝາກຜົນຕົວຈິງ; ຖອດບົດຮຽນໃນໄລຍະຜ່ານມາ ການປະກາດໃຊ້ກົດໝາຍທີ່ຜ່ານການພິຈາລະນາຮັບຮອງຢູ່ກອງປະຊຸມສະໄໝສາມັນຂອງສະພາແຫ່ງຊາດແຕ່ລະຄັ້ງ ແມ່ນມີຄວາມຊັກຊ້າ, ບໍ່ທັນປະຕິບັດໄດ້ຕາມກໍານົດເວ ລາ 30 ວັນ ພາຍຫຼັງກອງປະຊຸມສະພາແຫ່ງຊາດໄດ້ຮັບຮອງເອົາ ຕາມທີ່ໄດ້ກໍານົດໄວ້ໃນລັດຖະທໍາມະນູນມາດຕາ 60. ສະຫາຍກ່າວຕື່ມອີກວ່າ: ຕາມທິດທາງແຜນການເຄື່ອນໄຫວຂອງສະພາແຫ່ງຊາດໃນປີ 2024 ກໍຄືແຜນການທ້າຍສະໄໝຂອງສະພາແຫ່ງຊາດຊຸດທີ IX ແມ່ນພວກເຮົາມີໜ້າທີ່ວຽກງານສໍາຄັນອັນໜຶ່ງໄດ້ແກ່ການປັບປຸງລັດຖະທໍາມະນູນ ເຊິ່ງເປັນກົດໝາຍແມ່ຂອງບັນດາກົດໝາຍທັງຫຼາຍ; ເພື່ອບັນລຸວຽກງານສໍາຄັນດັ່ງກ່າວ ຈຶ່ງສະເໜີມາຍັງຄະນະບໍລິຫານງານພັກສະພາແຫ່ງຊາດທີ່ຊີ້ນໍາວຽກງານຢູ່ແຕ່ລະຂົງເຂດ, ບັນດາທ່ານຄະນະປະຈໍາ, ບັນດາກໍາມາທິການ ຈົ່ງໄດ້ຮີບຮ້ອນກະກຽມແຜນ ການເຄື່ອນໄຫວຂອງຕົນໃນການຈັດຕັ້ງປະຕິບັດວຽກງານດັ່ງກ່າວ. ວຽກງານທີ່ສໍາຄັນ ແມ່ນການຮັບຟັງຄວາມຄິດຄວາມເຫັນຈາກພະນັກງານ-ລັດຖະກອນພາຍໃນສະພາແຫ່ງຊາດ, ສະພາປະຊາຊົນຂັ້ນແຂວງ ຢ່າງກວ້າງຂວາງ ເພື່ອເຮັດໃຫ້ການປັບປຸງກົດໝາຍຂົງເຂດສະພາແຫ່ງຊາດ ມີຄວາມສອດຄ່ອງກັບສະພາບຕົວຈິງຂອງວຽກງານແຕ່ລະຂົງເຂດຂອງສະພາແຫ່ງຊາດ; ການກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ X ແລະສະມາຊິກສະພາປະຊາຊົນຂັ້ນແຂວງ ຊຸດທີ III ກໍເປັນໜ້າທີ່ການເມືອງສໍາຄັນຂອງສະພາແຫ່ງຊາດ ທີ່ຈະຕ້ອງໄດ້ຈັດຕັ້ງປະຕິບັດເພື່ອຮັບປະກັນໃຫ້ວຽກງານດັ່ງກ່າວ ໄດ້ຮັບຜົນສໍາເລັດເປັນຢ່າງດີ ຈຶ່ງສະເໜີມາຍັງບັນດາສະຫາຍຄະນະບໍລິຫານງານພັກ, ຄະນະປະຈໍາ, ບັນດາກໍາມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກໍາ ສະພາແຫ່ງຊາດ ສຸມໃສ່ກະກຽມວຽກງານດັ່ງກ່າວແຕ່ຫົວທີ. ໃນການມີຄໍາເຫັນໂອ້ລົມຕອນທ້າຍ, ສະຫາຍກ່າວເນັ້ນຕື່ມອີກວ່າ: ຄະນະບໍລິຫານງານພັກສະພາແຫ່ງຊາດ ໄດ້ພິຈາລະນາການສະເໜີຂອງບັນດາຮາກຖານພັກ ແລະໄດ້ຕົກລົງແຕ່ງຕັ້ງຕໍາແໜ່ງບໍລິຫານຈໍານວນໜຶ່ງ ເພື່ອຮັບປະກັນການປະຕິບັດໜ້າທີ່ວຽກງານຂອງບັນດາກໍາມາທິການ, ຄະນະເລຂາທິການ ກໍຄືສະຖາບັນຄົ້ນຄວ້ານິຕິກໍາ ສະພາແຫ່ງຊາດ ໃຫ້ມີບາດກ້າວຫັນປ່ຽນ ໃໝ່ນັບມື້ດີຂຶ້ນ; ສະນັ້ນ, ສະເໜີໃຫ້ບັນດາສະຫາຍທີ່ໄດ້ຮັບການແຕ່ງຕັ້ງ ຈົ່ງເພີ່ມທະວີຄວາມຮັບຜິດຊອບໜ້າທີ່ການ ເມືອງຂອງຕົນ, ບຸກບືນສູ້ຊົນເຮັດໃຫ້ການປະຕິບັດໜ້າທີ່ວຽກງານມີປະສິດທິພາບ, ປະສິດທິຜົນ ນັບມື້ສູງຂຶ້ນ ສົມກັບຄວາມເຊື່ອໝັ້ນ ແລະໄວ້ວາງໃຈຂອງການຈັດຕັ້ງທີ່ໄດ້ມອບໝາຍວຽກງານໃຫ້.

(ພາບ ແລະ ຂ່າວ: ສອນສັກ ວັນວິໄຊ)