ວັນທີ 23 ຕຸລາ ນີ້, ທີ່ສະພາປະຊາຊົນແຂວງສາລະວັນ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດ ພະນັກງານ-ລັດຖະກອນ ຂອງສະພາປະຊາຊົນແຂວງສາລະວັນ ປະຈໍາປີ 2024; ໂດຍການເປັນປະທານກອງປະຊຸມຂອງທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ; ເຂົ້າຮ່ວມມີທ່ານຮອງປະທານສະພາປະຊາຊົນແຂວງ, ທ່ານຮອງປະທານຄະນະກໍາມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ຕະຫຼອດຮອດ ພະນັກງານ-ລັດຖະກອນ ພາຍໃນ ສະພາປະຊາຊົນແຂວງ ເຂົ້າຮ່ວມໃນຄັ້ງນີ້;
ໃນທີ່ປະຊຸມ ທ່ານ ບຸນໂຮມ ບົວວິໄລ ຮອງເລຂາທິການ ສະພາປະຊາຊົນແຂວງ ໄດ້ຜ່ານເອກະສານ 3 ສະບັບ ມີ ຂໍ້ຕົກລົງ ຂອງຄະນະປະຈໍາ ສະພາປະຊາຊົນແຂວງ ສະບັບເລກທີ 434/ຄຈສຂ.ສວ ລົງວັນທີ 14 ຕຸລາ 2024 ວ່າດ້ວຍການອະນຸມັດດໍາເນີນກອງປະຊຸມ ປະເມີນຜົນພະນັກງານ-ລັດຖະກອນ ຂອງສະພາປະຊາຊົນແຂວງ ປະຈໍາປີ 2024, ຂໍ້ຕົກລົງ ຂອງຄະນະປະຈໍາ ສະພາປະຊາຊົນແຂວງ ສະບັບເລກທີ 432/ຄຈສຂ.ສວ ລົງວັນທີ 14 ຕຸລາ 2024 ວ່າດ້ວຍການແຕ່ງຕັ້ງຄະນະຊີ້ນໍາ ແລະ ຄະນະປະເມີນຜົນ ພະນັກງານ-ລັດຖະກອນ ຂອງສະພາປະຊາຊົນແຂວງ ປະຈໍາປີ 2024 ແລະ ແຜນດໍາເນີນ ສະບັບເລກທີ 432/ຄຈສຂ.ສວ ລົງວັນທີ 14 ຕຸລາ 2024 ກ່ຽວກັບການປະເມີນ ພະນັກງານ-ລັດຖະກອນ ຂອງສະພາປະຊາຊົນແຂວງ ປະຈໍາປີ 2024 ແລະ ຮັບຟັງການຜ່ານເອກະສານແບ່ງຈຸດໍາເນີນການປະເມີນ ໂດຍແບ່ງເປັນ 6 ຈຸ ລວມມີຜູ້ປະເມີນທັງໝົດ 44 ທ່ານ, ຍິງ 23 ທ່ານ; ກໍານົດເງື່ອນໄຂຂອງຜູ້ປະເມີນ ຕ້ອງເປັນລັດຖະກອນສົມບູນ ປະຈໍາການຢ່າງໜ້ອຍ 9 ເດືອນຂຶ້ນໄປ, ບໍ່ຢູ່ໃນໄລຍະຖືກມາດຕະການທາງວິໄນ; ສໍາລັບມາດຖານການປະເມີນໃຫ້ຄະແນນ ປະກອບມີ ດີຫຼາຍ ແມ່ນໃຫ້ຄະແນນ ແຕ່ 9-10; ດີ ແມ່ນໃຫ້ຄະແນນ ແຕ່ 8-8,5; ກາງ ແມ່ນໃຫ້ຄະແນນ ແຕ່ 5-7,5; ອ່ອນ ແມ່ນໃຫ້ຄະແນນ ແຕ່ 3-5,5; ອ່ອນຫຼາຍ ແມ່ນໃຫ້ຄະແນນ ແຕ່ 1-2,5; ຂັ້ນຕອນການປະເມີນ ມີປະເມີນໃຫ້ຄະແນນຕົນເອງ ແລະ ປະເມີນໃຫ້ຄະແນນເພື່ອນຮ່ວມງານ ຕາມແບບຟອມ; ຜູ້ປະເມີນຕ້ອງຜ່ານແບບພິມປະເມີນຜົນໃຫ້ຄະແນນຕົນເອງ ແລະ ແບບພິມປະເມີນໃຫ້ຄະແນນເພື່ອນຮ່ວມງານ, ພ້ອມປະກອບຄໍາເຫັນປະເມີນດ້ານດີ, ຂໍ້ຄົງຄ້າງ ແລະ ວິທີແກ້ໄຂ ຂອງຕົນເອງ ແລະ ເພື່ອນຮ່ວມງານ;
ຜົນການປະເມີນປະຈໍາປີ 2024 ນີ້, ເພື່ອໃຫ້ເຫັນເຖິງຄຸນນະພາບ, ປະລິມານ, ແລະ ຈັນຍາບັນຂອງການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ທີ່ດໍາລົງຕໍາແໜ່ງບໍລິຫານ ແລະ ຕໍາແໜ່ງວິຊາການ; ທັງເປັນບ່ອນອີງໃຫ້ແກ່ການສະເໜີເລື່ອນຊັ້ນ-ຂັ້ນເງິນເດືອນປົກກະຕິ (ງວດ I ແລະ ງວດ III ປີ 2025), ດັດແກ້ຊັ້ນ-ຂັ້ນຕາມໃບປະກາດ, ການສະເໜີພົ້ນຊັ້ນ, ບໍາເນັດ, ບໍານານ, ຍົກຍ້າຍ ແລະ ນະໂຍບາຍອື່ນໆ; ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານໃຫ້ມີປະສິດທິຜົນດີຂຶ້ນ;
ພາບ-ຂ່າວ: ດີລໍາພົນ ພົມມະຈັນ