(ສພຊ) – ຕອນບ່າຍວັນທີ 30 ຕຸລາຜ່ານມາ, ສະ ຫາຍ ສັນຍາ ປຣະເສີດ ຄະນະປະຈຳສະພາແຫ່ງຊາດ, ປະ ທານກຳມາທິການການຕ່າງປະເທດ (ກຕທ) ໄດ້ຕ້ອນຮັບການເຂົ້າພົບປະຂອງສະຫາຍ ຫງວຽນ ມິ່ງ ເຕິ່ມ ໃນໂອ ກາດທີ່ໄດ້ຮັບການແຕ່ງຕັ້ງມາດຳລົງຕຳແໜ່ງເປັນເອກອັກ ຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ.ຫວຽດ ນາມ ປະຈຳ ສປປລາວ ຄົນໃໝ່.

ສະຫາຍ ສັນຍາ ປຣະເສີດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍສະຫາຍ ຫງວຽນ ມິ່ງ ເຕິ່ມ ທີ່ໄດ້ຖືກແຕ່ງຕັ້ງມາປະຕິບັດໜ້າທີ່ການທູດຢູ່ ສປປລາວ ພ້ອມທັງຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມ ມືລະ ຫວ່າງສອງປະເທດຕັ້ງແຕ່ອະດີດຈົນເຖິງປັດຈຸບັນ ຍັງສືບຕໍ່ຮັດແໜ້ນ ແລະ ເສີມຂະຫຍາຍຂຶ້ນຢ່າງບໍ່ຢຸດຢັ້ງ ສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນການນໍາຂັ້ນສູງລະຫວ່າງສອງພັກ, ສອງລັດ ນັບທັງສູນກາງ ແລະ ທ້ອງຖິ່ນ ຢ່າງປົກກະຕິ ແລະ ຕໍ່ເນື່ອງ; ພ້ອມ ກັນນີ້, ຍັງໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນເຊິ່ງກັນແລະກັນກ່ຽວກັບທິດທາງໃນການຮ່ວມມືຕໍ່ໜ້າລະຫວ່າງສອງອົງການນິຕິບັນຍັດຂອງສອງປະເທດ ໃຫ້ນັບມື້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.

ໃນໂອກາດນີ້, ສະຫາຍປະທານ ກຕທ ກໍໄດ້ສະແດງຄວາມຮູ້ບຸນຄຸນເປັນຢ່າງສູງ ແລະ ຂອບໃຈຢ່າງຈິງໃຈມາຍັງພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອອັນໃຫຍ່ ຫຼວງ, ລໍ້າຄ່າ ແລະ ທັນການ ແກ່ປະຊາຊົນລາວ ໃນພາລະ ກິດຕໍ່ສູ້ກູ້ຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ.

ສະຫາຍ ຫງວຽນ ມິ່ງ ເຕິ່ມ ກໍໄດ້ສະແດງຄວາມຂອບໃຈຢ່າງສູງທີ່ສະຫາຍ ສັນຍາ ປຣະເສີດ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ພ້ອມທີ່ຈະປະຕິບັດໜ້າທີ່ຂອງຕົນໃນຖານະເອກອັກຄະລັດຖະທູດໃນການສືບຕໍ່ຊຸກຍູ້ສົ່ງເສີມສາຍພົວພັນສອງຊາດໃຫ້ນັບມື້ນັບຈະເລີນເກີດດອກອອກຜົນຂຶ້ນຍິ່ງໆ.

(ຂ່າວ-ພາບ: ກຕທ)