(ສພຊ) ໃນໂອກາດເຂົ້າຮ່ວມກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງໄຊຍະບູລີ ສະໄໝທີ VII ໃນວັນທີ 18 ພຶດສະພາ 2023 ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມເມືອງບໍ່ແຕນ ໂດຍການຕ້ອນຮັບຂອງທ່ານບຸນທອງ ວັນນາ ຄະນະປະຈຳພັກເມືອງ, ຮອງເຈົ້າເມືອງບໍ່ແຕນ; ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ຄະນະກອງບັນຊາການ ປກສ-ປກຊ ພະນັກງານອາວຸໂສບຳນານອ້ອມຂ້າງເມືອງເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ບຸນທອງ ວັນນາ ໄດ້ລາຍງານສະພາບລວມໂດຍຫຍໍ້ໃນການນໍາພາ-ຊີ້ນໍາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VII ອົງຄະນະພັກແຂວງ, ມະຕິກອງປະຊຸມໃຫຍ່ ຄັ້ງທີ VII ອົງຄະນະພັກເມືອງ, ແຜນພັດທະນາເສດຖະກິດ-ສັງຄົມ ຕິດພັນກັບການຜັນຂະຫຍາຍ 2 ວາລະແຫ່ງຊາດ, ຍູ້ຂະບວນດ້ານຕ່າງໆມີການຫັນປ່ຽນຢ່າງຕັ້ງໜ້າ ແລະ ມີຜົນສໍາເລັດໃນຫຼາຍດ້ານ. ພ້ອມກັນນັ້ນ ຍັງໄດ້ສະເໜີບາງບັນຫາເປັນຕົ້ນ: ບັນຫາໄພແຫ້ງແລ້ງ ເຮັດໃຫ້ການຕອບສະໜອງອາຫານຂອງສັດລ້ຽງປະເພດງົວ, ຄວາຍ ແມ່ນພົບຄວາມຫຍຸ້ງຍາກ, ຂໍອະນຸມັດ ໂຄງການສ້າງຫ້ອງການຫຼັງໃໝ່ ແລະ ໂຄງການສ້າງທາງເຂົ້າແຫຼ່ງທ່ອງທ່ຽວຕາດສະແນນ, ຈາກນັ້ນ ໄດ້ຮັບຟັງການໂອ້ລົມຂອງປະທານສະພາແຫ່ງຊາດ, ນອກຈາກນັ້ນ ຄະນະ ຍັງໄດ້ຕິດຕາມການກໍ່ສ້າງຕ້ານເຈື່ອນລຽບຕາມຊາຍແດນແມ່ນ້ຳເຫືອງຈຸດໜອງຄອບບ້ານນາຂ່າ ແລະ ໂຄງການສຳປະທານການພັດທະນາແຫຼ່ງທ່ອງທ່ຽວນ້ຳຕົກຕາດຊະແນນຕື່ມອີກ.