(ສພຊ) ໃນວັນທີ 8 ກຸມພາ 2023 ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ອົງການປົກຄອງ, ພະນັກງານຫຼັກແຫຼ່ງຂອງເມືອງເຟືອງ ແຂວງວຽງຈັນ ໂອກາດດັ່ງກ່າວ ທ່ານ ປະທານສະພາແຫ່ງຊາດ ໄດ້ມີບາງຄໍາເຫັນເນັ້ນຕໍ່ຄະນະພັກ, ຄະນະນໍາ ຂອງເມືອງເຟືອງ ດັ່ງນີ້:

1. ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ: (1) ຄະນະພັກ, ອົງການປົກຄອງເມືອງ ຈະຕ້ອງໄດ້ສືບຕໍ່ຍຶດໝັ້ນ ແລະ ເດັດດ່ຽວນໍາພາ ພາລະກິດປົກປັກຮັກສາທ້ອງຖິ່ນຂອງຕົນ ດ້ວຍການຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ໃຫ້ເຂັ້ມແຂງ, ໜັກແໜ້ນ; ສະກັດກັ້ນ ອາດຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງສໍາມະໂນຄົວ, ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ; (2) ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ III ຂອງເມືອງເຟືອງ ໄດ້ກໍານົດທ່າແຮງບົ່ມຊ້ອນຂອງເມືອງໃນຫຼາຍດ້ານ ສະນັ້ນ, ສະເໜີໃຫ້ຄະນະພັກ, ອົງການປົກຄອງເມືອງ ເພີ່ມທະວີການນໍາພາ-ຊີ້ນໍາຂະແໜງການທີ່ກ່ຽວຂ້ອງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງເມືອງ ເພື່ອສຸມທຶນຮອນເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ: ການປູກເຂົ້າ, ພືດຜັກ, ໄມ້ໃຫ້ໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປູກຫຍ້າເພື່ອລ້ຽງສັດ; ການລ້ຽງສັດໃຫຍ່ເປັນສິນຄ້າ, ການລ້ຽງປາ ແລະ ອື່ນໆ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ, ສະຫະກອນແບບໃໝ່ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະ ມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫຼ່ງທຶນ ແລະ ການເຂົ້າເຖິງຕະຫຼາດທີ່ມີປະສິດທິພາບ ເຊິ່ງຈະກາຍເປັນຖານລາຍຮັບງົບປະມານຂອງເມືອງ ໃນຕໍ່ໜ້າ; (3) ທ່າແຮງດ້ານການທ່ອງທ່ຽວທຳມະຊາດ-ວັດທະນະທຳຂອງເມືອງເຟືອງ ກໍມີຫຼາຍດ້ານ ສະນັ້ນ, ຄະນະພັກ, ອົງການປົກຄອງເມືອງ ຈະຕ້ອງໄດ້ເອົາໃຈໃສ່ນໍາພາຊີ້ນໍາ ໃນການປົກປັກຮັກສາແຫຼ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງແຫຼ່ງທ່ອງທ່ຽວ ໃຫ້ຄົງຢູ່ຍາວນານຮອດເຊັ່ນລູກເຊັ່ນຫຼານເຮົາຕະຫຼອດໄປ. ພ້ອມກັນນັ້ນ ກໍເອົາໃຈໃສ່ຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການທ່ອງທ່ຽວດັ່ງກ່າວ ໂດຍສະເພາະການຜະລິດຫັດຖະກໍາ, ການປຸງແຕ່ງຜົນຜະລິດກະສິກໍາ ທີ່ມີການຫຸ້ມຫໍ່, ເປັນເອກະລັກຂອງເມືອງ ເພື່ອເປັນຂອງຕ້ອນຂອງຝາກແຂກຄົນ ທີ່ມາທ່ອງທ່ຽວເມືອງເຟືອງ; (4) ຄະນະພັກ, ອົງການປົກຄອງເມືອງເຟືອງ ຈະຕ້ອງໄດ້ເອົາໃຈໃສ່ ລົງເລິກຕິດຕາມກວດກາເບິ່ງຄຸນນະພາບການສຶກສາຢູ່ໂຮງຮຽນ ໃຫ້ຮັບປະກັນດ້ານມາດຕະຖານ; ການພັດທະນາການສຶກສາຂອງຂະແໜງວິຊາສະເພາະດ້ານຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາ, ສາມາດສ້າງວຽກເຮັດງານທໍາໃຫ້ແກ່ລູກຫຼານ ທີ່ຮຽນຈົບວິຊາສະເພາະຂະແໜງຕ່າງໆ ໃຫ້ມີວຽກເຮັດງານທໍາ; (5) ສະເໜີໃຫ້ ຄະນະພັກ, ອົງການປົກຄອງເມືອງ ເພີ່ມທະວີຄວາມເອົາໃຈໃສ່ ໃນການສ້າງເງື່ອນໄຂໃຫ້ພໍ່ແມ່ປະຊາຊົນ ສາມາດເຂົ້າເຖິງການປິ່ນປົວຢ່າງກວ້າງຂວາງ, ສະດວກ ແລະ ມີປະສິດທິພາບ; ເອົາໃຈໃສ່ປັບປຸງໂຮງໝໍເມືອງ, ໂຮງໝໍນ້ອຍ ດ້ວຍການປະກອບອຸປະກອນ, ເຄື່ອງມືດ້ານການແພດ ທີ່ສາມາດຍົກສູງປະສິດສິພາບໃນການປິ່ນປົວໃຫ້ສູງຂຶ້ນ; ເພີ່ມຄວາມສາມາດໃນການເຝົ້າລະວັງຕິດຕາມ, ບົ່ງມະຕິ, ຊອກຄົ້ນຫາ ແລະ ໂຕ້ຕອບກໍລະນີພະຍາດລະບາດໃຫ້ໄດ້ໄວ; (6) ມາຮອດປັດຈຸບັນ ສະພາບການລະບາດຂອງພະຍາດໂຄວິດ-19 ໄດ້ກັບຄືນສູ່ປົກກະຕິແລ້ວ ຈຶ່ງມີຄວາມຈໍາເປັນໃນການຊຸກຍູ້ການຮຽນຂອງລູກຫຼານ, ປັບປຸງຄຸນນະພາບການສຶກສາໃຫ້ສູງຂຶ້ນ, ເອົາໃຈໃສ່ການສ້າງ ແລະ ສ້ອມແປງໂຮງຮຽນ ເພື່ອອໍານວຍຄວາມສະດວກໃຫ້ແກ່ລູກຫຼານໄດ້ເຂົ້າຮຽນ, ປະກອບປື້ມແບບຮຽນ, ອຸປະກອນການຮຽນ ພ້ອມທັງສ້າງເງື່ອນໄຂການເຂົ້າເຖິງການສຶກສາ ແລະ ຂະຫຍາຍຕາໜ່າງການສຶກສາ ໃຫ້ມີຄຸນນະພາບນັບມື້ສູງຂຶ້ນ ແລະ ທົ່ວເຖິງຢູ່ເຂດຫ່າງໄກສອກຫຼີກ; (7) ສະເໜີໃຫ້ຄະນະພັກ, ອົງການປົກຄອງເມືອງເຟືອງ ເອົາໃຈໃສ່ການຄົ້ນຄວ້າປັບປຸງກົງຈັກການຈັດຕັ້ງຂອງຕົນ ໃຫ້ມີປະສິດທິພາບ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ, ຮັບປະກັນການປະຕິບັດໜ້າທີ່ວຽກງານ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍ ຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດດີຂຶ້ນເລື່ອຍໆ. ສ້າງເງື່ອນໄຂໃຫ້ປະຊາຊົນບັນ ດາເຜົ່າ ສາມາດເຂົ້າຮ່ວມ, ປະກອບຄໍາເຫັນ, ຕິດຕາມກວດກາການບໍລິຫານລັດ ຕາມແນວທາງຂອງພັກ.

2. ວຽກງານການກໍ່ສ້າງຮາກຖານການເມືອງ: (1) ການກໍ່ສ້າງຮາກຖານການເມືອງ ເປັນວຽກງານທີ່ມີຄວາມສໍາຄັນຫຼາຍ. ສະນັ້ນ, ຄະນະພັກ, ອົງການປົກຄອງເມືອງເຟືອງ ຈະຕ້ອງໄດ້ເພີ່ມທະວີຄວາມເອົາໃຈໃສ່ວຽກງານການກໍ່ສ້າງຮາກຖານການເມືອງ, ລົງໃກ້ຊິດຕິດແທດກັບພໍ່ແມ່ປະຊາຊົນ ຢ່າງແທດເຖິງ; (2) ການກໍ່ສ້າງຮາກຖານການເມືອງ ມີຄວາມຕິດພັນກັບ ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການພັດທະນາເສດຖະກິດ-ສັງຄົມ. ສະນັ້ນ, ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເພີ່ມທະວີຄວາມເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເປັນເງື່ອນໄຂຂອງການສ້າງສາພັດທະນາເມືອງເຟືອງ; (3) ຄະນະພັກ, ອົງການປົກຄອງເມືອງ ຕ້ອງກໍາແໜ້ນຮາກຖານການເມືອງຂອງຕົນ, ຮັບຮູ້ໄດ້ເຖິງບັນຫາທີ່ຈະເປັນຊ່ອງວ່າງ ທີ່ຄົນບໍ່ດີສວຍໃຊ້ເຂົ້າໃນການແຊກແຊງ, ມ້າງເພທໍາລາຍຮາກຖານການເມືອງ ເປັນຕົ້ນ ພະຍາດອາດຍາສິດຂອງພະນັກງານ, ປາກົດການຫຍໍ້ທໍ້ໃນກົງຈັກລັດ, ການສໍ້ລາດບັງຫຼວງ ແລະ ອື່ນໆ, ບັນຫາດັ່ງກ່າວ ຕ້ອງມີທິດທາງໃນການແກ້ໄຂຢ່າງເປັນຮູບປະທໍາ.

3. ການພັດທະນາຊົນນະບົດ: (1) ການພັດທະນາຊົນນະບົດ ແລະ ແກ້ໄຂຄວາມທຸກຍາກ ເນື້ອແທ້ແມ່ນການປົວແປງຊີວິດການເປັນຢູ່ ແລະ ຍົກລະດັບຄຸນນະພາບຊີວິດຂອງປະຊາຊົນ ເລີ່ມແຕ່ຮາກຖານຂຶ້ນມາ ໃຫ້ນັບມື້ດີຂຶ້ນ; (2) ການລົງທຶນຂອງລັດເຂົ້າໃນການກໍ່ສ້າງພື້ນຖານໂຄງລ່າງ ເຖິງວ່າທຶນຮອນ, ງົບປະມານ ມີຈໍາກັດ ແຕ່ພັກ-ລັດ ກໍໄດ້ຈັດສັນໃຫ້ວຽກງານດັ່ງກາວ ຈຶ່ງສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຕິດຕາມ, ກວດກາ ແລະ ຄຸ້ມຄອງການນໍາໃຊ້ທຶນຮອນດັ່ງກ່າວ ໃຫ້ຕິດພັນກັບການພັດທະນາແທ້ ແລະ ນໍາຜົນປະໂຫຍດຕົວຈິງມາໃຫ້ປະຊາຊົນ; (3) ຄະນະພັກ, ອົງການປົກຄອງເມືອງ ຈະຕ້ອງໄດ້ເອົາໃຈໃສ່ນໍາພາ ຂະແໜງການທີ່ກ່ຽວຂ້ອງ ຄົ້ນຄວ້າຈັດສັນທີ່ດິນ ເພື່ອນໍາໃຊ້ເຂົ້າໃນການຜະລິດກະສິກໍາເປັນສິນຄ້າປະເພດຕ່າງໆ ຢ່າງມີປະສິດທິຜົນ ເພື່ອສຸມທຶນຮອນ, ເຕັກນິກ ແລະ ນໍາພາປະຊາຊົນ ເຮັດການຜະລິດ ເພື່ອສ້າງອາຊີບ, ສ້າງລາຍຮັບ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

4. ວຽກງານ 3 ສ້າງ: ວຽກງານສາມສ້າງ ເປັນວຽກງານທີ່ມີຄວາມສໍາຄັນ ໃນການສ້າງຄວາມເຂັ້ມແຂງໃຫ້ແກ່ ທ້ອງຖິ່ນຮາກຖານ ເພື່ອເສີມຂະຫຍາຍສິດເປັນເຈົ້າຂອງທ້ອງຖິ່ນຮາກຖານ ດ້ວຍການມອບສິດ, ມອບຄວາມຮັບຜິດຊອບ ໃນການບໍລິຫານລັດ ແລະ ການຄຸ້ມຄອງເສດຖະກິດ-ສັງຄົມ ເພື່ອຍົກສູງຄວາມສາມາດໃນການກຸ້ມຕົນເອງໃຫ້ນັບມື້ຫຼາຍຂຶ້ນ ເພື່ອບັນລຸຜົນສໍາເລັດດັ່ງກ່າວ ສິ່ງທີ່ຄະນະພັກ, ອົງການປົກຄອງເມືອງ ຈະຕ້ອງໄດ້ເອົາໃຈໃສ່ ແມ່ນການຫັນພະນັກງານ, ຫັນງົບປະມານ ໄປເພີ່ມໃຫ້ທ້ອງຖິ່ນ ເປັນຕົ້ນ ແມ່ນຂັ້ນເມືອງ ແລະ ໄປນໍາພາເຮັດຕົວຈິງຢູ່ຮາກຖານບ້ານ.

ໂອກາດດັ່ງກ່າວ, ທ່ານ ປະທານສະພາແຫ່ງຊາດ ຍັງໄດ້ນໍາເອົາຜົນສໍາເລັດການດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ໄດ້ດໍາເນີນໃນລະຫວ່າງວັນທີ 5-30 ທັນວາ 2022 ຜ່ານມາ ເຊິ່ງກອງປະຊຸມໄດ້ພິຈາລະນາ, ຮັບຮອງເອົາບັນຫາສໍາຄັນພື້ນຖານຂອງປະເທດຊາດ ຫຼາຍວຽກງານ ເປັນຕົ້ນ: ການພິຈາລະນາຮັບຮອງເອົາບົດລາຍງານຂອງລັດຖະບານ; ການຈັດຕັ້ງປະຕິບັດ 2 ວາລະແຫ່ງຊາດ; ການສ້າງວິຊາຊີບ ການພັດທະນາສີມືແຮງງານ ແລະ ວຽກເຮັດງານທໍາໃຫ້ປະຊາຊົນ; ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ແຜນການ ປະຈໍາປີ 2023 ຂອງອົງການກວດສອບແຫ່ງລັດ, ອົງການກວດກາແຫ່ງລັດ, ສານປະຊາຊົນສູງສຸດ, ໄອຍະການປະຊາຊົນສູງສຸດ; ການພິຈາລະນາ, ຮັບຮອງເອົາການສ້າງ ແລະ ປັບປຸງກົດໝາຍ ຈໍານວນ 12 ສະບັບ ໃນນັ້ນ, ສ້າງໃໝ່ 3 ສະບັບ ແລະ ປັບປຸງ 9 ສະບັບ; ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ແຜນການ ປະຈໍາປີ 2023 ຂອງສະພາແຫ່ງຊາດ; ການປັບປຸງແຜນການສ້າງ ແລະ ປັບປຸງກົດໝາຍ ແຕ່ປີ 2023-2025; ການຊີ້ແຈງຂອງລັດຖະບານ ແລະ ພາກສ່ວນກ່ຽວຂ້ອງ ຕໍ່ຄໍາຊັກຖາມຂອງ ສະມາຊິກສະພາແຫ່ງຊາດ.

ໂອກາດດັ່ງກ່າວ ຄະນະໄດ້ນຳເອົາຄອມພິວເຕີຈຳນວນ 5 ຊຸດ ມູນຄ່າ 25 ລ້ານກີບ ມອບໃຫ້ເມືອງເຟືອງ ແຂວງວຽງຈັນອີກດ້ວຍ.