(ສພຊ) ໃນວັນທີ 7 ພະຈິກ 2022 ທີ່ສະພາແຫ່ງຊາດ, ສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບຄະນະຜູ້ແທນຄະນະປະສານງານທົ່ວປະເທດ ອະດີດທະຫານອາສາສະໝັກ-ຊ່ຽວຊານ ຫວຽດນາມຊ່ວຍເຫຼືອການປະຕິວັດລາວ ທີ່ມາຢ້ຽມຢາມຄັ້ງນີ້ ຢູ່ໃນບັນຍາກາດທີ່ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມພ້ອມກັນສະເຫຼີມສະຫຼອງ ປີສາມັກຄີ ມິດຕະພາບ ລາວ-ຫວຽດນາມ ປີ 2022 ຢ່າງເປັນຂະບວນຟົດຟື້ນ ແລະ ມີຄວາມໝາຍສໍາຄັນອັນເລິກເຊິ່ງ.

ສະຫາຍ ປະທານສະພາແຫ່ງຊາດ ແຫ່ງ ສປປລາວ ໄດ້ກ່າວສະແດງຄວາມຕ້ອນຮັບວ່າ: ຕາງໜ້າໃຫ້ສະພາແຫ່ງຊາດ ແຫ່ງ ສປປລາວ ກໍຄື ປະຊາຊົນລາວບັນດາເຜົ່າ, ຂໍສະແດງຄວາມຮູ້ບຸນຄຸນຢ່າງລົ້ນເຫຼືອ ຕໍ່ບັນດາສະຫາຍ ອະດີດທະຫານອາສາສະໝັກ-ຊ່ຽວຊານ ຫວຽດນາມຊ່ວຍເຫຼືອ ການປະຕິວັດລາວ ທີ່ໄດ້ສະຫຼະເລືອດເນື້ອ, ຄວາມສຸກສ່ວນຕົວ ຄຽງບ່າຄຽງໄຫຼ່, ຮ່ວມສຸກ, ຮ່ວມທຸກ, ຮ່ວມຂຸມຄອງດຽວກັນກັບປະຊາຊົນລາວຕໍ່ສູ້ກູ້ຊາດ ຕ້ານສັດຕູຜູ້ມາຮຸກຮານໃນປາງສົງຄາມ ຈົນເຮັດໃຫ້ປະເທດຊາດໄດ້ຮັບການປົດປ່ອຍຢ່າງສົມບູນ. ພັກ, ລັດ ແລະ ປະຊາຊົນລາວບັນດາເຜົ່າ ເວລາໃດກໍຈະຈົດຈຳບຸນຄຸນ, ຄວາມງາມຄວາມດີຂອງບັນດາສະຫາຍ ແລະ ຈະສືບຕໍ່ສຶກສາອົບຮົມຊາວໜຸ່ມ, ເຍົາວະຊົນ ແລະ ປະຊາຊົນສອງຊາດ ລາວ-ຫວຽດນາມ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ສາຍພົວພັນອັນພິເສດ ລາວ-ຫວຽດນາມ ທີ່ຫາຍາກ ແລະ ມີໜຶ່ງດຽວໃນໂລກ ໂດຍສະເພາະແມ່ນການເສຍສະຫຼະອັນໃຫຍ່ຫຼວງ ຂອງການນໍາປະຕິວັດຮຸ່ນກ່ອນ ເພື່ອເສີມຂະຫຍາຍສາຍພົວພັນອັນພິເສດ, ບໍລິສຸດຜຸດຜ່ອງ ລະຫວ່າງ ສອງປະເທດ ດັ່ງຄຳເວົ້າທີ່ວ່າ “ເຂົ້າເມັດຫັກ ຜັກເສັ້ນແບ່ງ” ເປັນການປູກຝັງ ໃຫ້ລູກຫຼານຮຸ່ນໜຸ່ມ ຂອງສອງປະເທດ ມີຄວາມເຂົ້າໃຈ, ມີຄວາມຮັບຜິດຊອບ, ຖະນຸຖະໜອມ ແລະ ປົກປັກຮັກສາ ສາຍພົວພັນພິເສດດັ່ງກ່າວ ໃຫ້ຍືນຍົງຄົງຕົວຕະຫຼອດກາລະນານ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)