(ສພຊ) ວັນທີ 3 ທັນວາ 2022 ທີ່ສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງບັນດາທ່ານເອກອັກຄະລັດຖະທູດ ແຫ່ງ ສປປລາວ ທີ່ຈະໄປປະຈໍາການຢູ່ຕ່າງປະ ເທດ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປລາວ ທີ່ຖືກແຕ່ງຕັ້ງຈາກປະທານປະເທດໃຫ້ໄປປະຕິບັດໜ້າທີ່ຢູ່ຕ່າງປະເທດ ຕາມລັດຖະດໍາລັດຂອງປະທານປະເທດ. ການແຕ່ງຕັ້ງດັ່ງກ່າວ ແມ່ນໄດ້ສະແດງເຖິງຄວາມໄວ້ວາງໃຈ, ຄວາມເຊື່ອໝັ້ນຕໍ່ຄວາມຮັບຜິດຊອບໃນດ້ານໜ້າທີ່ການເມືອງ, ຄວາມຮູ້ຄວາມສາມາດ, ບົດບາດ, ປະສົບການຂອງບັນດາທ່ານ. ພັກ, ລັດຖະບານ ແລະ ປະຊາຊົນລາວ ມອບໜ້າທີ່ອັນສໍາຄັນໃຫ້ບັນດາທ່ານເປັນຜູ້ຕາງໜ້າທາງການຂອງ ສປປລາວ ຢູ່ຕ່າງປະເທດນີ້ ແມ່ນກ່ຽດອັນສູງສົ່ງ, ທັງເປັນຄວາມຮັບຜິດຊອບໃນການນໍາເອົາແນວທາງການຕ່າງປະເທດຂອງລາວ ກໍຄືສະພາບຄວາມເປັນຈິງ ຂອງປະເທດ ໄປເຜີຍແຜ່ໃຫ້ຕ່າງປະເທດຮູ້ ແລະ ເຂົ້າໃຈເຖິງຄວາມເປັນຈິງຂອງປະເທດເຮົາ.

ທ່ານປະທານສະພາແຫ່ງຊາດ ໄດ້ສະເໜີໃຫ້ບັນດາທ່ານເອກອັກຄະລັດຖະທູດ ຈົ່ງເອົາໃຈໃສ່ບາງບັນຫາດັ່ງນີ້: ຍຶດໝັ້ນແນວທາງການຕ່າງປະເທດ ຂອງພັກ, ລັດຖະທໍາມະນູນ, ບັນດາກົດໝາຍ ແລະ ນະໂຍບາຍຕ່າງໆ ຂອງ ສປປລາວ; ປົກປ້ອງອໍານາດອະທິປະໄຕ, ຄວາມໝັ້ນຄົງ, ກຽດສັກສີ ແລະ ຜົນປະໂຫຍດຂອງຊາດ ຕະຫຼອດຮອດສິດ ແລະ ຜົນປະໂຫຍດອັນຊອບທໍາ ຂອງພົນລະເມືອງລາວ ແລະ ນິຕິບຸກຄົນ ຂອງ ສປປລາວ ຢູ່ຕ່າງປະເທດ; ເສີມຂະຫຍາຍສາຍພົວພັນມິດຕະພາບທີ່ດີລະຫວ່າງ ສປປລາວ ກັບຕ່າງປະເທດ ທັງທາງດ້ານການເມືອງ, ວັດທະນະທໍາ-ສັງຄົມ ແລະ ເສດຖະກິດ, ຕ້ອງຖືສໍາຄັນການເຄື່ອນໄຫວການທູດດ້ານການເມືອງ ຕ້ອງໄປຄຽງຄູ່ກັບການທູດທາງດ້ານເສດຖະກິດ, ການທູດປ້ອງກັນເຫດ, ເພື່ອເພີ່ມມິດ ຫຼຸດຜ່ອນສັດຕູ; ຕິດຕາມ ແລະ ລາຍງານສະພາບການທີ່ພົ້ນເດັ່ນຂອງລັດຖະສະພາບັນດາປະເທດທີ່ຕົນຮັບຜິດຊອບ, ສະພາບການພາກພື້ນ ແລະ ສາກົນ ແລະ ອື່ນໆ ທີ່ກ່ຽວຂ້ອງ ລວມທັງການຄົ້ນຄວ້າໃຫ້ທັດສະນະທີ່ເໝາະສົມ, ຖືກຕ້ອງ ແລະ ສອດຄ່ອງໃນສະພາບແຕ່ລະໄລຍະ; ເອົາໃຈໃສ່ຊຸກຍູ້ ແລະ ສະໜັບສະໜູນການພົວພັນຮ່ວມມື ລະຫວ່າງສະພາແຫ່ງຊາດລາວ ກັບລັດຖະສະພາຕ່າງປະເທດ ໃຫ້ມີການຂະຫຍາຍຕົວຂຶ້ນກວ່າເກົ່າ ເປັນຕົ້ນການແລກປ່ຽນຂອງຄະນະຜູ້ແທນ, ການຮ່ວມມືທາງດ້ານວິຊາການ, ຈັດກອງປະຊຸມສຳມະນາແລກປ່ຽນບົດຮຽນ, ທັດສະນະສຶກສາ ແລະ ແລກປ່ຽນບົດຮຽນ ເພື່ອຍົກສູງຂີດຄວາມສາມາດ ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຂອງ ສປປລາວ; ນອກຈາກນີ້, ສະເໜີໃຫ້ມີການສະໜັບສະໜູນການພົວພັນຮ່ວມມືນໍາກັນ ໃນເວທີລັດຖະສະພາພາກພື້ນ ແລະ ສາກົນ ຕາມຄວາມເໝາະສົມ. ພິເສດ ແມ່ນການຍາດແຍ່ງເອົາການສະໜັບສະໜູນ ແລະ ການຊ່ວຍເຫຼືອ ຂອງຕ່າງປະເທດ ເຂົ້າໃນການສ້າງສາ ແລະ ພັດທະນາປະເທດຊາດ ຂອງພວກເຮົາ.

ທ່ານ ປອ. ໄຊສົມພອນ ພົມວິຫານ ໄດ້ແຈ້ງໃຫ້ຮູ້ຕື່ມວ່າ: ສະພາແຫ່ງຊາດລາວ ໄດ້ມີການແຕ່ງຕັ້ງຄະນະມິດຕະພາບລັດຖະສະພາລາວ ກັບຕ່າງປະເທດ ຈໍານວນ 22 ຄະນະ, ມີການເຊັນ MOU ກັບ 8 ລັດຖະສະພາ ຂອງຕ່າງປະເທດ ໂດຍສະເພາະແມ່ນບັນດາລັດຖະສະພາ ຂອງປະເທດສັງຄົມນິຍົມ ແລະ ບັນດາລັດຖະສະພາຕາມຂົງເຂດ, ສໍາລັບຢູ່ຂົງເຂດເອີຣົບ ແມ່ນມີຄະນະມິດຕະພາບລັດຖະສະພາລາວ-ເອີຣົບ. ສະນັ້ນ, ສະເໜີໃຫ້ບັນດາທ່ານທູດ ຈົ່ງຊ່ວຍເກັບກໍາສະພາບການ ຂອງບັນດາລັດຖະສະພາ, ຊຸກຍູ້ສົ່ງເສີມ ແລະ ຍາດແຍ່ງເອົາການຮ່ວມມື, ການສະໜັບສະໜູນ ຂອງບັນດາລັດຖະສະພາດັ່ງກ່າວ; ສະພາແຫ່ງຊາດລາວ ຍັງໄດ້ເປັນສະມາຊິກຂອງອົງການລັດຖະສະພາພາກພື້ນ ແລະ ສາກົນ ເປັນຕົ້ນ ອົງການສະມັດຊາລັດຖະສະພາລະຫວ່າງຊາດອາຊຽນ (AIPA), ສະຫະພັນລັດຖະສະພາສາກົນ IPU, ອົງການສະມັດຊາລັດຖະສະພາທີ່ໃຊ້ພາສາຝຣັ່ງ APF, ເວທີປຶກສາຫາລືລັດຖະສະພາອາຊີ-ເອີຣົບ ASEP, ເວທີປຶກສາຫາລືລັດຖະສະພາອາຊີ-ປາຊີຟິກ APPF, ກອງປະຊຸມສະພາແຫ່ງຊາດຂອງ ກຳປູເຈຍ, ລາວ ແລະ ຫວຽດນາມ (CLV) ແລະ ອື່ນໆ ຂໍໃຫ້ບັນດາທ່ານຊ່ວຍຕິດຕາມ ແລະ ໃຫ້ການຮ່ວມມືນໍາສະພາແຫ່ງຊາດ ພົວພັນນໍາອົງການດັ່ງກ່າວຢ່າງມີປະສິດທິຜົນ; ສະເໜີໃຫ້ບັນດາທ່ານທູດ ຈົ່ງຈັດຕັ້ງປະຕິບັດກົດໝາຍ ວ່າດ້ວຍສໍານັກງານຜູ້ຕາງໜ້າ ແຫ່ງ ສປປລາວ ປະຈໍາຢູ່ຕ່າງປະເທດ ແລະ ປະຕິບັດສິດ, ໜ້າທີ່ ແລະ ພາລະບົດບາດຂອງຕົນຢ່າງຕັ້ງໜ້າ; ສະເໜີໃຫ້ບັນດາທ່ານເອກອັກຄະລັດຖະທູດ ຊ່ວຍຊຸກຍູ້ ແລະ ສະໜັບສະໜູນ ສະພາແຫ່ງຊາດລາວ ເປັນເຈົ້າພາບໃນການຈັດກອງປະຊຸມສະພາແຫ່ງຊາດ 3 ປະເທດ: ກຳປູເຈຍ, ລາວ ແລະ ຫວຽດນາມ (CLV) ຄັ້ງທີ 1 ທີ່ໄດ້ຍົກລະດັບ ຈາກກອງປະຊຸມ 3 ກໍາມາທິການຕ່າງປະເທດ ມາເປັນລະດັບປະທານສະພາແຫ່ງຊາດ, ປັດຈຸບັນ ກຳລັງກະກຽມລະບຽບການຕ່າງໆກ່ຽວກັບການຈັດກອງປະຊຸມດັ່ງກ່າວຢູ່ ແລະ ຄາດຄະເນກາງປີ 2023, 3 ປະທານສະພາແຫ່ງຊາດ ຈະຈັດກອງປະຊຸມ CLV ໃນລະດັບປະທານສະພາ ຄັ້ງທີ 1 ຢູ່ ສປປລາວ ເປັນເຈົ້າພາບ ແລະ ໃນປີ 2024 ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຫຼື AIPA ຄັ້ງທີ 45 ຢູ່ນະຄອນຫຼວງວຽງຈັນ.

(ພາບ ແລະ ຂ່າວ: ສົມນຶກ ແກ້ວໄຊຍະຈັກ)