(ສພຊ) ໃນຕອນບ່າຍຂອງວັນທີ 31 ພຶດສະພາ 2022 ທີ່ຫ້ອງຮັບແຂກສະພາແຫ່ງຊາດ ສະຫາຍ ໄຊສົມ ພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການ ເຂົ້າຢ້ຽມຂໍ່ານັບຂອງສະຫາຍ ນາງ ເຈື່ອງ ທິ ມາຍ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າໂຄສະນາຈັດຕັ້ງສູນກາງພັກກອມມູນິດຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມ ຢາມພົບປະ ແລະ ເຮັດວຽກຢູ່ ສປປລາວ ຢ່າງເປັນທາງການ.
ໂອກາດດັ່ງກ່າວ ສະຫາຍ ໄຊສົມພອນ ພົມວິຫານ ໄດ້ກ່າວສະແດງຄວາມຕ້ອນຮັບອັນອົບອຸ່ນຕໍ່ສະຫາຍ ນາງ ເຈື່ອງ ທິ ມາຍ ທີ່ເຂົ້າຢ້ຽມຂໍ່ານັບໃນຄັ້ງນີ້ ເປັນການນໍາເອົາໄມຕີຈິດມິດຕະພາບ, ຄວາມສາມັກຄີຮັກແພງສະໜິດສະ ໜົມສະຫາຍອ້າຍນ້ອງມາສູ່ປະຊາຊົນລາວ ໃນໂອກາດປີສາມັກຄີມິດຕະພາບລາວ-ຫວຽດນາມ-ລາວ ໃນປີ 2022, ເປັນການປະກອບສ່ວນສໍາຄັນເຂົ້າໃນການເພີ່ມພູນຄູນສ້າງສາຍພົວພັນອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງປະຊາຊົນສອງຊາດ ລາວ-ຫວຽດນາມ; ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດການພົບປະລະຫວ່າງຄະນະຈັດຕັ້ງສູນກາງພັກປະຊາຊົນປະຕິວັດລາວ ແລະ ຄະນະຈັດຕັ້ງສູນກາງພັກກອມມູນິດຫວຽດນາມ ໃນຕອນເຊົ້າວັນດຽວກັນ ເຊິ່ງທັງສອງຝ່າຍ ໄດ້ຕີລາຄາຄືນການພົວພັນ ແລະ ການຮ່ວມມືນໍາກັນ ໃນໄລຍະຜ່ານມາ ແລະ ຮ່ວມກັນປຶກສາຫາລື ກ່ຽວກັບທິດທາງຮ່ວມມືນຳກັນ ໃນຕໍ່ໜ້າ; ຕີລາຄາສູງ ຕໍ່ການພົວພັນຮ່ວມມື ລາວ-ຫວຽດນາມ ໃນທຸກຂົງເຂດສືບຕໍ່ໄດ້ຮັບການເສີມຂະຫຍາຍທັງທາງກວ້າງ ແລະ ທາງເລິກ ພັກ, ລັດ ແລະ ປະຊາຊົນອ້າຍນ້ອງຫວຽດນາມ ໄດ້ໃຫ້ການສະໜັບສະໜູນ ແລະ ຊ່ວຍເຫລືອແກ່ ສປປລາວ ຕະຫລອດມາ ເປັນຕົ້ນແມ່ນ ໄດ້ບິແບ່ງທຶນຮອນອັນໃຫຍ່ຫລວງ ໃຫ້ແກ່ການກໍ່ສ້າງຕຶກຫໍສະພາແຫ່ງຊາດລາວຫລັງໃໝ່ ສຳເລັດສົມບູນຕາມຄາດໝາຍ; ການພົວພັນດ້ານການເມືອງ, ປກຊ-ປກສ, ການຕ່າງປະເທດ ສືບຕໍ່ໜັກແໜ້ນ, ການພົວພັນດ້ານເສດຖະກິດ-ການຄ້າ, ການລົງທຶນ, ການພົວພັນແຂວງທ້ອງຖິ່ນຕ່າງໆຂອງສອງປະເທດ ສືບຕໍ່ມີຄວາມຄືບໜ້າ ພິເສດ, ໃນລະຫວ່າງວັນທີ 15-17 ພຶດສະພາ 2022 ຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ນໍາໂດຍສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ກໍໄດ້ມາຢ້ຽມຢາມສັນຖະວະໄມຕີ ສປປລາວ ຢ່າງເປັນທາງການ, ສອງຝ່າຍໄດ້ຮ່ວມກັນເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື (MOU) ລະຫວ່າງ ສອງສະພາແຫ່ງຊາດ ລາວ-ຫວຽດນາມ ສະບັບໃໝ່ ແລະ ເປັນສັກຂີພິຍານໃນການລົງນາມບົດບັນທຶກ ວ່າດ້ວຍການຮ່ວມມື ລະຫວ່າງ ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ສະບັບໃໝ່ ພ້ອມທັງແຈ້ງໃຫ້ຊາບກ່ຽວກັບຜົນຂອງກອງປະຊຸມອົງຄະນະພັກສະພາແຫ່ງຊາດ ໄດ້ຈັດກອງປະຊຸມໃຫຍ່ຄັ້ງທີ IV ໃນວັນທີ 21 ມັງກອນ 2022 ແລະ ການເຄື່ອນໄຫວວຽກງານຂອງສະພາແຫ່ງຊາດລາວໂດຍຫຍໍ້.
ສະຫາຍ ນາງ ເຈື່ອງ ທິ ມາຍ ກໍໄດ້ກ່າວສະແດງຄວາມຂອບໃຈທີ່ສະຫາຍ ໄຊສົມພອນ ພົມວິຫານ ໄດ້ເສຍ ສະຫລະເວລາອັນມີຄຸນຄ່າໃຫ້ການຕ້ອນຮັບດ້ວຍຄວາມອົບອຸ່ນ ພ້ອມທັງລາຍງານໃຫ້ຮູ້ກ່ຽວກັບຜົນຂອງການພົບ ປະເຮັດວຽກຮ່ວມກັບຄະນະຈັດຕັ້ງສູນກາງພັກປະຊາຊົນປະຕິວັດລາວ ແລະ ຈຸດປະສົງຂອງການເຂົ້າຢ້ຽມຂໍ່ານັບ ໃນຄັ້ງນີ້.
ພິເສດ, ໃນປີ 2022 ເປັນປີສາມັກຄີມິດຕະພາບລາວ-ຫວຽນາມ, ສອງສະພາແຫ່ງຊາດ ຂອງສອງປະເທດ ກໍໄດ້ຈັດກິດຈະກໍາຫລາຍຢ່າງ ເພື່ອສະເຫລີມສະຫລອງປີສາມັກຄີ ກໍຄື ສອງວັນປະຫວັດສາດແຫ່ງການພົວພັນ ລະຫວ່າງ ສອງປະເທດ ຄືວັນສ້າງຕັ້ງສາຍພົວພັນທາງການທູດຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45 ປີ ເຊິ່ງໄດ້ສະແດງໃຫ້ເຫັນເຖິງ ຄວາມມີຊີວິດຊີວາ ແຫ່ງ ສາຍພົວພັນພິເສດ ລາວ-ຫວຽດນາມ.
(ພາບ ແລະ ຂ່າວ: ສອນສັກ ວັນວິໄຊ)