ທ່ານ ປອ.ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດລົງເຄື່ອນໄຫວ ແລະ ເຮັດວຽກຮ່ວມກັບ ຄະນະພັກແຂວງ, ຄະນະປະຈໍາສະພາປະຊາຊົນແຂວງ, ອົງການປົກຄອງແຂວງສາລະວັນໃນວັນທີ 6 ພຶດສະພາ 2022 ນີ້

ໂອກາດດັ້ງກ່າວ ທ່ານປະທານສະພາໄດ້ຮັບຟັງການລາຍງານການພັດທະນາເສດຖະກິດ – ສັງຄົມ, ການຈັດຕັ້ງປະຕິບັດ 2 ວາລະແຫ່ງຊາດຢູ່ແຂວງສາລະວັນໂດຍທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສະພາປະຊາຊົນແຂວງສາລະວັນ, ຫຼັງຈາກນັ້ນທ່ານ ປອ. ໄຊສົມພອນ ພົມວິຫານໄດ້ມີບາງຄຳຄິດເຫັນດັ່ງນີ້ :

1. ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ
(1) ແຂວງສະລະວັນ ເປັນແຂວງທີ່ມີຊາຍແດນຕິດປະເທດໃກ້ຄຽງ ຊຶ່ງມີຄວາມສ່ຽງທີ່ກຸ່ມຄົນບໍ່ດີ ຈະນໍາໃຊ້ເຂດຊາຍແດນດັ່ງກ່າວ ກໍ່ອາດສະຍາກໍາປະເພດຕ່າງໆ ເປັນຕົ້ນ ການເຂົ້າ-ອອກ ສປປ ລາວ ທີ່ບໍ່ຖືກກົດໝາຍ, ການກໍ່ຄວາມບໍ່ສະຫງົບ, ບັນຫາຢາເສບຕິດ, ການຄ້າມະນຸດ, ແລະ ອື່ນໆ; ເປັນຈຸດຫຼໍ່ແຫຼມ ແລະ ມີຄວາມເປັນຫ່ວງ ທີ່ອິດທິກໍາລັງປໍລະປັກ ນໍາໃຊ້ສະຖານທີ່ດັ່ງກ່າວ ທໍາລາຍ, ມ້າງເພພວກເຮົາ ດ້ວຍເລ່ຫຼ່ຽມຕ່າງໆຢ່າງເປີດເຜີຍ ແລະເລິກລັບ. ອີກດ້ານໜຶ່ງ ແຂວງສາລະວັນ ກໍເປັນແຂວງໜຶ່ງທີ່ເປັນທາງຜ່ານ ຈຶ່ງຕ້ອງໄດ້ມີຄວາມລະມັດລະວັງ, ມີສະຕິລະວັງຕົວ ຕໍ່ກຸ່ມຄົນບໍ່ດີທີ່ຈະແອບແຝງເຂົ້າມາມ້າງເພທໍາລາຍພວກເຮົາ ໃນຮູບແບບຕ່າງໆ. ສະນັ້ນ, ຈຶ່ງສະເໜີໃຫ້ ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ ປົກຮັກສາຄວາມສະຫງົບໃຫ້ແກ່ແຂວງຂອງຕົນ; ຈັດຕັ້ງຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບ ຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາດສະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງຄົນຕ່າງປະເທດ ໃຫ້ເຂັ້ມງວດຕາມກົດໝາຍ.
(2) ແຂວງສາລະວັນ ເປັນແຂວງທີ່ມີເນື້ອທີີ່ເກືອບເຄີ່ງໜຶ່ງຂອງເນື້ອທີ່ທັງໝົດ ເປັນທົ່ງພຽງ, ເປັນດິນທີ່ມີຄວາມອຸດົມສົມບູນ, ເໝາະສົມກັບການຜະລິດກະສິກໍາປະເພດຕ່າງໆ, ດິນຟ້າອາກາດກໍເອື້ອອໍານວຍໃຫ້ແກ່ການຜະລິດກະສິກໍາ, ການລ້ຽງສັດ; ປະຊາຊົນບັນດາເຜົ່າຂອງແຂວງສາລະວັນ ມີມູນເຊື້ອດຸໝັ່ນໃນການອອກແຮງງານ, ຕາມຂໍ້ມູນຂອງບົດສະຫຼຸບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງໃນປີຜ່ານມາ ເຫັນວ່າ ການຜະລິດກະສິກໍາປະເພດຕ່າງໆ ໄດ້ບັນລຸຜົນສໍາເລັດເກີນຄາດໝາຍຂອງແຜນການ. ສະນັ້ນ, ຈຶ່ງສະເໜີໃຫ້ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີການນໍາພາ ຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາເປັນສິນຄ້າ ໃຫ້ມີຄວາມເໝາະສົມ; ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເປັນຕົ້ນ ການປູກເຂົ້າ, ກາເຟ, ໝາກແໜ່ງ, ໄມ້ໃຫ້ໝາກ, ການປູກໄມ້ອຸດສາຫະກໍາ, ການປູກຜັກປອດສານພິດ, ການປຸງແຕ່ງຜະລິດຕະພັນກະສິກໍາ, ການຫຸ້ມຫໍ ເພື່ອສາມາດເປັນຂອງຕ້ອນ ຂອງຝາກ; ການລ້ຽງສັດໃຫຍ່ເປັນສິນຄ້າເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສ້າງຄອບຄົວຕົວແບບຂອງການຜະລິດໃຫ້ເພີ່ມຂຶ້ນຕື່ມ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະ ມີຜົນຜະລິດຈໍານວນຫຼາຍ, ມີທ່າແຮງໃນການເຂົ້າເຖິງແຫຼ່ງທຶນ ແລະ ການເຂົ້າເຖິງຕະຫຼາດທີ່ມີປະສິດທິພາບ. ເມື່ອໄດ້ເງິນມາແລ້ວ ກໍໃຫ້ະຢັດມັດທະຍາດ ເພື່ອເປັນທຶນຮອນ ໃນການຂະຫຍາຍການຜະລິດ.
(3) ແຂວງສາລະວັນ ເປັນແຂວງທີ່ມີແຫຼ່ງທ່ອງທ່ຽວທໍາມະຊາດ ທີ່ມີຄວາມສວຍງາມຫລາຍແຫ່ງ ເປັນຕົ້ນ ນໍ້າຕົກຕາດເລາະ, ນໍ້າຕົກຕາດສູງ, ນໍ້າຕົກຕາດເທວະດາ, ທໍາມະຊາດແກ້ງຂຸ ແລະອື່ນໆ ຊຶ່ງເປັນທ່າ ແຮງດ້ານໜຶ່ງຂອງແຂວງສາລະວັນ ໃນການພັດທະນາເສດຖະກິດ-ສັງຄົມ ໃຫ້ຂະຫຍາຍຕົວ. ສະນັ້ນ, ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ນໍາພາ ໃນການປົກປັກຮັກສາແຫຼ່ງທ່ອງທ່ຽວໃຫ້ມີຄວາມຍືນຍົງ; ພ້ອມກັນນັ້ນ ກໍເອົາໃຈໃສ່ຊຸກຍູ້ສ່ົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການທ່ອງທ່ຽວດັ່ງກ່າວໃຫ້ມີຄວາມກົມກຽວ ແລະ ຊຸກຍູ້ສົ່ງເສີມ ຊຶ່ງກັນ ແລະ ກັນ ແລະ ພ້ອມກັນພັດທະນາຢ່າງບໍ່ຢຸດຢັ້ງ.
(4) ການພັດທະນາຊັບພະຍາກອນມະນຸດ ເປັນວຽກງານທີ່ມີຄວາມສໍາຄັນ ແລະ ຕັດສິນຜົນສໍາເລັດຂອງວຽກງານຂະແໜງການຕ່າງໆ, ຖ້າແຂວງເຮົາມີບຸກຄະລາກອນທີ່ມີຄວາມຮູ້, ຄວາມສາມາດ ກໍຈະເຮັດໃຫ້ ການສ້າງສາພັດທະນາເສດຖະກິດ-ສັງຄົມມີປະສິດທິຜົນສູງ. ສະນັ້ນ, ຈຶ່ງສະເໜໃຫ້ ຄະນະພັກແຂວງ, ສະພາປະຊາຊົນແຂວງ, ອົງການປົກຄອງແຂວງສາລະວັນ ເອົາໃຈໃສ່ການພັດທະນາຊັບພະຍາກອນມະນຸດ ໃຫ້ສອດ ຄ່ອງກັບຄວາມຮຽກຮ້ອງຕ້ອງການຂອງການພັດທະນາ, ສາມາດສ້າງວຽກເຮັດງານທໍາໃຫ້ແກ່ຊາວໜຸ່ມທີ່ເປັນ ກໍາລັງແຮງງານ. ພ້ອມກັນນັ້ນ ກໍໃຫ້ເອົາໃຈໃສ່ການສຶກສາອົບຮົມ ແລະ ຮຽນຮູ້ມູນເຊື້ອຄວາມສາມັກຄີປອງດອງ, ນໍ້າໃຈຮັກຊາດ ແລະ ເສຍສະຫລະ ເພື່ອຜົນປະໂຫຍດສ່ວນລວມ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ.
(5) ຕາມຕົວເລກຂໍ້ມູນແຜນພັດທະນາເສດຖະກິດ-ສັງຄົມຂອງແຂວງສາລະວັນ ເຫັນວ່າ ແຂວງເຮົາມີຊາວໜຸ່ມໄປອອກແຮງງານຢູ່ປະເທດໃກ້ຄຽງຈໍານວນຫຼາຍເຖິງ 25.968 (ຊາວຫ້າພັນເກົ້າຮ້ອຍຫົກສິບແປດຄົນ) ຈຶ່ງເປັນວຽກງານໜຶ່ງທີ່ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ຄົ້ນຄວ້າຊອກຫາວິທີແກ້ໄຂ. ການໄປອອກແຮງງານດັ່ງກ່າວ ສ່ວນຫຼາຍກໍປະກອບອາຊີບຮັບໃຊ້ ເປັນແມ່ບ້ານ, ເຮັດວຽກຕາມຮ້ານອາຫານ ທັງເປັນລູກຫຼານທີ່ຍັງມີອາຍຸນ້ອຍ ເຮັດໃຫ້ມີຄວາມເປັນຫ່ວງຫຼາຍ. ທັງໆທີ່ຢູ່ແຂວງສາລະວັນ ກໍມີທີ່ດິນອຸດົມສົມບູນ, ການຜະລິດກະສິກໍາເປັນສິນຄ້າກໍເປັນທ່າແຮງ ແລະ ມີຄວາມຕ້ອງການຂອງຕະຫຼາດພາຍໃນ ແລະ ຕ່າງປະເທດ. ສະນັ້ນ ຈຶ່ງສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ປຸກລະດົມ, ຂົນຂວາຍ ໃຫ້ຊາວໜຸ່ມດັ່ງກ່າວ ຫັນມາເປັນເຈົ້າຂອງກິດຈະການ ຂະ ໜາດນ້ອຍ, ຂະໜາດກາງ ເຮັດການຜະລິດກະສິກໍາຢູ່ປະເທດເຮົາ ກໍມີລາຍໄດ້ບໍ່ໜ້ອຍໃນແຕ່ລະເດືອນ ທັງມີກຽດສັກສີ, ມີຄວາມເປັນອິດສະຫຼະ, ໄດ້ຢູ່ໃກ້ກັບຄອບຄົວ ເພື່ອບໍ່ໃຫ້ພໍ່ແມ່ມີີຄວາມເປັນຫ່ວງ.
(6) ປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດຢູ່ແຂວງ ໃຫ້ມີປະສິດທິພາບ, ແກ້ໄຂສະພາບການຊໍ້າຊ້ອນດ້ານພາລະບົດບາດ ໃຫ້ຈະແຈ້ງ ແລະຮັດກຸມ, ເຮັດໃຫ້ກົງຈັກກະທັດຮັດເປັນລະບົບໂລ່ງລ່ຽນ; ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍຂອງເຈົ້າໜ້າທີ່ຂອງລັດທຸກຂັ້ນ; ສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ-ລັດດີຂຶ້ນເລື່ອຍໆ.
(7) ສ້າງເງື່ອນໄຂໃຫ້ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນຕາມກົດໝາຍກໍານົດ ຢ່າງມີປະສິດທິພາບ ເພື່ອສຶກສາອົບຮົມບັນດາຊັ້ນຄົນໃຫ້ມີຄວາມສາມັກຄີປອງດອງ, ຕື່ນຕົວ ແລະ ເປັນເຈົ້າການເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະ ນາປະເທດຊາດ.
(8) ການເຄື່ອນໄຫວວຽກງານຂອງ ສະພາປະຊາຊົນແຂວງສາລະວັນ ໃນໄລຍະຜ່ານມາກໍມີຜົນສໍາເລັດຫຼາຍດ້ານ ແລະ ສາມາດສ້າງປະສົບປະການນັບມື້ດີຂຶ້ນ. ເຖິງແນວໃດກໍຕາມ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນຕໍ່ໜ້າ ຈຶ່ງສະເໜີໃຫ້ ຄະນະພັກແຂວງສາລະວັນ ເພີ່ມທະວີຄວາມເອົາໃຈໃສ່ນໍາພາ ເຮັດໃຫ້ການປະຕິບັດໜ້າທີ່ຂອງສະພາປະຊາຊົນແຂວງ ໃນການເປັນຕົວແທນໃຫ້ແກ່ປະຊາຊົນບັນດາເຜົ່າຂອງແຂວງ ມີຄຸນນະພາບ ແລະ ປະສິດທິຜົນສູງຂຶ້ນ ໂດຍສະເພາະ ການກະກຽມເນື້ອໃນກອງປະຊຸມສະໄໝສາມັນຂອງສະພາປະຊາຊົນແຂວງ ເພື່ອພິຈາລະນາຮັບຮອງເອົາບັນຫາສໍາຄັນຂອງແຂວງ, ການພິຈາລະນາຮັບຮອງນິຕິກໍາທີ່ສໍາຄັນຂອງແຂວງ ລວມທັງການເຄື່ອນໄຫວຕິດຕາມກວດກາຂອງສະພາປະຊາຊົນແຂວງສາລະວັນ ຊຶ່ງຈະເປັນຂໍ້ມູນໃຫ້ ຄະນະພັກແຂວງ ໃນການປັບປຸງແກ້ໄຂບັນຫາຕ່າງໆໄດ້ຢ່າງຖືກຕ້ອງ; ສະເໜີໃຫ້ຄະນະພັກ, ອົງການປົກຄອງແຂວງ ເພີ່ມທະວີການນໍາພາຊີ້ນໍາ ຂະແໜງການກ່ຽວຂ້ອງຂອງແຂວງ ໃນການສ້າງເງື່ອນໄຂອໍານວຍຄວາມສະດວກໃຫ້ແກ່ ການປັບປຸງກົງຈັກຊ່ວຍວຽກຂັ້ນຂະ ແໜງການຂອງສະພາປະຊາຊົນແຂວງ ລວມທັງບຸກຄະລາກອນ ໃຫ້ສາມາດຮັບປະກັນການປະຕິບັດໜ້າທີ່ການເມືອງ ໄດ້ຮັບຜົນສໍາເລັດ ລວມທັງການຍົກສູງບົດບາດການເຄື່ອນໄຫວວຽກງານ ຂອງສະມາຊິກສະພາປະຊາຊົນແຂວງ ທີ່ປະຈໍາຢູ່ເມືອງ ໃຫ້ນັບມື້ດີຂຶ້ນ