ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນໂອກາດເຂົ້າຮ່ວມກອງປະຊຸມປະຈຳປີຂອງເວທີປຶກສາຫາລືລັດຖະສະພາອາຊີ-ປາຊີຟິກ (APPF) ຄັ້ງທີ 30 ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ກ່າວປາໄສຕໍ່ກອງປະຊຸມປຶກສາຫາລືວາລະທີ 1 ວຽກງານການເມືອງ ແລະ ຄວາມໝັ້ນຄົງ ພາຍໃຕ້ຫົວຂໍ້: “ສົ່ງເສີມການທູດລັດຖະສະພາ ເພື່ອຄວາມໝັ້ນຄົງໃນພາກພື້ນ” ໂດຍທ່ານໄດ້ເນັ້ນບາງບັນຫາດັ່ງນີ້:
ໃນນາມສະພາແຫ່ງຊາດ ແຫ່ງ ສປປລາວ ທ່ານໄດ້ຕີລາຄາສູງ ແລະ ສະໜັບສະໜູນ ຕໍ່ຄໍາຂວັນຂອງກອງປະຊຸມທີ່ວ່າ: “ລັດຖະສະພາ ແລະ ການພັດທະນາແບບຍືນຍົງ ພາຍຫຼັງການແຜ່ລະບາດຂອງພະຍາດໂຄວິດ-19’’ ເຊິ່ງໄດ້ສະແດງໃຫ້ເຫັນເຖິງບົດບາດ ແລະ ຄວາມສຳຄັນຂອງອົງການນິຕິບັນຍັດທີ່ມີຄວາມຮັບຜິດຊອບຕໍ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຮອດປີ 2030 (SDGs) ເພື່ອຮັບປະກັນການຟື້ນຟູ ແລະ ຕ້ານການແຜ່ລະບາດຂອງພະຍາດໂຄວິດ-19 ແບບຍືນຍົງສຳລັບອະນາຄົດ.
ພ້ອມກັນນີ້ ທ່ານຍັງໄດ້ຕີລາຄາວ່າ ກອງປະຊຸມ APPF-30 ຄັ້ງນີ້, ຈັດຂຶ້ນໃນທ່າມກາງທີ່ໂລກ ກໍຄືພາກພື້ນ ພວມປະເຊີນໜ້າກັບສິ່ງທ້າທາຍຫຼາຍຢ່າງ ເປັນຕົ້ນແມ່ນບັນຫາການສະກັດກັ້ນ ແລະ ຮັບມືກັບຜົນກະທົບຈາກການແຜ່ລະບາດຂອງພະຍາດໂຄວິດ-19, ໄພພິບັດທາງທໍາມະຊາດ, ຄວາມຂັດແຍ່ງທາງດ້ານການທະຫານໃນພາກພື້ນຕ່າງໆ, ບັນຫາການເງິນ ແລະ ເສດຖະກິດທົດຖອຍ, ຄວາມບໍ່ໝັ້ນຄົງທາງດ້ານສະບຽງອາຫານ ແລະ ການຂາດແຄນພະລັງງານ ອັນໄດ້ສົ່ງຜົນກະທົບຢ່າງໜັກໜ່ວງ ຕໍ່ການພັດທະນາເສດຖະກິດ-ສັງຄົມ, ສະຖຽນລະພາບ, ຄວາມໝັ້ນຄົງຂອງພາກພື້ນ ແລະ ໃນໂລກ.
ເພື່ອເປັນການຮັບມືກັບສິ່ງທ້າທາຍດັ່ງກ່າວ, ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ຕ້ອງໄດ້ຍົກສູງບົດບາດການທູດລັດຖະສະພາໃນການຊຸກຍູ້ສົ່ງເສີມການຮ່ວມມືກັນຢ່າງໃກ້ຊິດລະຫວ່າງສະມາຊິກ APPF ດ້ວຍກັນ, ມີສ່ວນຮ່ວມໃນການແກ້ໄຂຂໍ້ຂັດແຍ່ງ ແລະ ສິ່ງທ້າທາຍຕ່າງໆຂອງພາກພື້ນ, ລວມທັງການພິຈາລະນາຮັບຮອງເອົາມະຕິທີ່ສໍາຄັນຫຼາຍສະບັບໃນກອງປະຊຸມໃຫຍ່ປະຈຳປີ ແນໃສ່ຊຸກຍູ້ສົ່ງເສີມການຮ່ວມມືທາງດ້ານເສດຖະກິດ, ສັງຄົມ ແລະ ການເມືອງ-ຄວາມໝັ້ນຄົງຂອງພາກພື້ນອາຊີ-ປາຊີຟິກ; ສົ່ງເສີມການມີສ່ວນຮ່ວມຂອງປະຊາຊົນ ກໍຄືທຸກພາກສ່ວນໃນສັງຄົມ; ຕອບສະໜອງທາງດ້ານນິຕິກຳທີ່ມີຄວາມສອດຄ່ອງກົມກຽວກັນ; ແລກປ່ຽນບົດຮຽນ ແລະ ປະສົບການທີ່ດີນຳກັນໃນການປະຕິບັດໜ້າທີ່ຂອງລັດຖະສະພາສະມາຊິກ APPF; ເປັນເຈົ້າການໃນການພິຈາລະນາໃຫ້ສັດຕະຍາບັນແກ່ສົນທິສັນຍາ ແລະ ສັນຍາສາກົນຕ່າງໆ ເພື່ອຮັບປະກັນໃຫ້ແກ່ການຈັດຕັ້ງປະຕິບັດບັນດາຖະແຫຼງການຮ່ວມ ແລະ ມະຕິຕ່າງໆທີ່ພາກພື້ນອາຊີ-ປາຊີຟິກໄດ້ຮັບຮອງ ແລະ ລົງນາມ ໃຫ້ປາກົດຜົນເປັນຈິງ ແລະ ນຳເອົາຜົນປະໂຫຍດມາໃຫ້ປະຊາຊົນ ໃນພາກພື້ນນີ້ ກໍຄືໃນໂລກ.
ທ່ານ ປະທານສະພາແຫ່ງຊາດແຫ່ງ ສປປລາວ ຍັງໄດ້ຍົກໃຫ້ເຫັນເຖິງການດຳເນີນນະໂຍບາຍການຕ່າງປະເທດ ຂອງ ສປປລາວ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ເພື່ອການພັດທະນາ ຢ່າງສະເໝີຕົ້ນສະເໝີປາຍ, ສົ່ງເສີມຄວາມສາມັກຄີເປັນປຶກແຜ່ນລະຫວ່າງບັນດາເຜົ່າ ໃຫ້ມີຄວາມສະເໝີພາບຕໍ່ໜ້າກົດໝາຍ, ຢຶດໝັ້ນຕາມເຈຕະນາລົມ ແລະ ຄວາມໝາຍໝັ້ນທາງດ້ານການເມືອງທີ່ຈະຮ່ວມມືກັບວົງຄະນາຍາດສາກົນ ແກ້ໄຂບັນດາຂໍ້ຂັດແຍ່ງ ແລະ ສິ່ງທ້າທາຍ ທີ່ພວມເກີດຂຶ້ນໃນພາກພື້ນຕ່າງໆ ແລະ ໃນໂລກ ດ້ວຍສັນຕິວິທີ ໂດຍປະກອບສ່ວນເຂົ້າໃນການສ້າງສະພາບແວດລ້ອມທີ່ເອື້ອອຳນວຍໃຫ້ແກ່ສັນຕິພາບ, ການຮ່ວມມື, ການເຊື່ອມໂຍງ-ເຊື່ອມຈອດພາຍໃນພາກພື້ນ ແລະ ການພັດທະນາເສດຖະກິດ-ສັງຄົມ ເພື່ອບັນລຸເປົ້າໝາຍການພັດທະນາແບບຍືນຍົງ ແລະ ຍົກສູງຊີວິດການເປັນຢູ່ຂອງປະຊາຊົນໃຫ້ດີຂຶ້ນເລື້ອຍໆ.
ໃນຂະບວນການດັ່ງກ່າວນີ້, ສະພາແຫ່ງຊາດລາວ ໄດ້ເພີ່ມທະວີບົດບາດຂອງຕົນ ໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ໂດຍໄດ້ມີການຮັບຮອງເອົາກົດໝາຍຫຼາຍສະບັບທີ່ສອດຄ່ອງກັບຫຼັກການສາກົນ, ຄວາມເປັນຈິງຂອງປະເທດ, ມີການຕິດຕາມກວດກາການຈັດຕັ້ງປະຕິບັດກົດໝາຍ ກໍຄືການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ພ້ອມທັງໃຫ້ສັດຕະຍາບັນໃຫ້ແກ່ສົນທິສັນຍາ ເປັນຕົ້ນແມ່ນ ສົນທິສັນຍາກ່ຽວກັບການຕ້ານອາຊະຍາກຳຂ້າມຊາດ, ການຄ້າມະນຸດ, ການຕ້ານການກໍ່ການຮ້າຍ, ຕ້ານ ແລະ ສະກັດກັ້ນອາຊະຍາກຳທາງຄອມພິວເຕີ, ການເກືອດຫ້າມອາວຸດນິວເຄຼຍ ແລະ ອື່ນໆ ເຊິ່ງບັນດາສົນທິສັນຍາເຫຼົ່ານັ້ນ ໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມສ້າງສັນຕິພາບ, ຄວາມໝັ້ນຄົງ, ສະຖຽນລະພາບ, ການພັດທະນາແບບຍືນຍົງ ແລະ ຄວາມຢູ່ດີກິນດີຂອງປະຊາຊົນ ໃນພາກພື້ນ ແລະ ໃນໂລກ.
ໃນຕອນທ້າຍ ທ່ານ ປອ. ໄຊສົມພອນ ພົມວິຫານ ຍັງໄດ້ຮຽກຮ້ອງມາຍັງລັດຖະສະພາສະມາຊິກ APPF ຈົ່ງເພີ່ມທະວີການເຮັດບົດບາດການທູດລັດຖະສະພາທັງໃນຂອບສອງຝ່າຍ ແລະ ຫຼາຍຝ່າຍ ເພື່ອປະກອບສ່ວນເຂົ້າໃນການສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ແລະ ເປັນອີກຊ່ອງທາງໜຶ່ງທີ່ສຳຄັນໃນການແກ້ໄຂບັນຫາ ແລະ ຂໍ້ຂັດແຍງຕ່າງໆຢ່າງສັນຕິວິທີ ໂດຍຜ່ານຂະບວນການເຈລະຈາ, ປະຕິບັດຕາມຫຼັກການ ແລະ ກົດໝາຍສາກົນ.