(ສພຂ) ວັນທີ 27 ມິຖຸນາ 2023 ທີ່ ສະພາແຫ່ງຊາດລາວ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບ ທ່ານ ອັນວາ ອິບບຣາຮິມ ນາຍົກລັດຖະມົນຕີ ແຫ່ງ ມາເລເຊຍ, ໃນໂອກາດທີ່ເດີນທາງມາຢ້ຽມຢາມ ສປປລາວ ຢ່າງເປັນທາງການ ໃນວັນທີ 26-27 ມິຖຸນາ 2023.
ໃນໂອກາດນີ້, ທ່ານ ປອ. ໄຊສົມພອນ ພົມວິຫານ ໄດ້ຕີລາຄາສູງຕໍ່ການຢ້ຽມຢາມ ສປປລາວ ຂອງທ່ານນາຍົກລັດຖະມົນຕີ ມາເລເຊຍ ພ້ອມດ້ວຍຄະນະ ເຊິ່ງຢູ່ໃນທ່າມກາງບັນຍາກາດທີ່ ສະພາແຫ່ງຊາດ ແຫ່ງ ສປປລາວ ພວມດໍາເນີນ ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະແດງຄວາມເຊື່ອໝັ້ນວ່າ ການຢ້ຽມຢາມຄັ້ງນີ້ ຈະປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ແລະ ປະຊາຊົນ 2 ຊາດ ລາວ ແລະ ມາເລເຊຍ ໃຫ້ດີຂຶ້ນເລື້ອຍໆ. ພ້ອມກັນນີ້, ຍັງໄດ້ແຈ້ງໃຫ້ຊາບໂດຍຫຍໍ້ ສະພາບການພັດທະນາເສດຖະກິດ-ສັງຄົມ ກໍຄືການເຄື່ອນໄຫວຂອງສະພາແຫ່ງຊາດລາວ ຊຸດທີ IX.
ທ່ານ ປະທານສະພາແຫ່ງຊາດ ແຫ່ງ ສປປລາວ ຕີລາຄາສູງຕໍ່ການສະໜັບສະໜູນ ຊ່ວຍເຫຼືອຂອງ ລັດຖະບານ ແລະ ປະຊາຊົນ ມາເລເຊຍ ໃນໄລຍະຜ່ານມາ ໂດຍສະເພາະແມ່ນ ການຊ່ວຍເຫຼືອລ້າ (ODA) ເຂົ້າໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເປັນຕົ້ນແມ່ນການສະໜອງຢາວັກແຊັງຕ້ານພະຍາດໂຄວິດ-19 ແລະ ອຸປະກອນການແພດຕ່າງໆ, ພ້ອມທັງສະແດງຄວາມຫວັງວ່າ ມາເລເຊຍ ຈະສືບຕໍ່ໃຫ້ການຊ່ວຍເຫຼືອ ແລະ ສະໜັບສະໜູນ ສປປລາວ ໃນຕໍ່ໜ້າ ໂດຍສະເພາະແມ່ນ ການເປັນປະທານອາຊຽນ ແລະ ການເປັນເຈົ້າພາບຈັດກອງປະຊຸມ ສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 (AIPA-45) ໃນປີ 2024 ທີ່ ນະຄອນຫຼວງວຽງຈັນ ໃຫ້ໄດ້ຮັບຜົນສໍາເລັດຢ່າງຈົບງາມ.
ທ່ານ ນາຍົກລັດຖະມົນຕີ ອັນວາ ອິບບຣາຮິມ ໄດ້ສະແດງຄວາມຂອບໃຈ ຕໍ່ທ່ານ ປອ. ໄຊສົມພອນ ພົມວິຫານ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງສະແດງຄວາມຊົມເຊີຍ ຕໍ່ຜົນສຳເລັດດ້ານຕ່າງໆ ທີ່ ສປປລາວ ຍາດມາໄດ້ໃນຕະຫຼອດໄລຍະຜ່ານມາ, ພ້ອມທັງເຊື່ອໝັ້ນວ່າ ສປປລາວ ຈະສືບຕໍ່ໄດ້ຮັບການພັດທະນາໃນຕໍ່ໜ້າ.
ສອງຝ່າຍ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໄດ້ມີບາດກ້າວຂະ ຫຍາຍຕົວຢ່າງຕໍ່ເນື່ອງ ແລະ ເປັນຮູບປະທຳຍິ່ງຂຶ້ນ, ການພົວພັນຮ່ວມມື ລະຫວ່າງ ສອງອົງການນິຕິບັນຍັດ ຂອງສອງປະເທດ ກໍສືບຕໍ່ຂະຫຍາຍຕົວ ແລະ ນຳເອົາຜົນປະໂຫຍດຕົວຈິງ ມາສູ່ສອງປະເທດ ລາວ-ມາເລເຊຍ.
ທ່ານ ປອ. ໄຊສົມພອນ ພົມວິຫານ ໄດ້ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືສອງຝ່າຍ ລາວ-ມາເລເຊຍ ຈົ່ງສືບຕໍ່ຂະຫຍາຍຕົວ ແລະ ແຕກດອກອອກຜົນຍິ່ງຂຶ້ນ, ພ້ອມທັງອວຍພອນໃຫ້ ທ່ານ ນາຍົກລັດຖະມົນຕີ ພ້ອມດ້ວຍ ຄະນະຜູ້ແທນ ຈົ່ງເດີນທາງກັບຄືນປະເທດ ດ້ວຍຄວາມສະຫວັດດີພາບທຸກປະການ.