ຕອນແລງ ວັນທີ 15 ມັງກອນ 2024 ນີ້, ທ່ານ ນາງ ອຳໄພວອນ ລ້ອມບຸນແພງ ກໍາມະການສໍາຮອງສູນກາງພັກ ຮອງເລຂາພັກແຂວງ ປະທານ ສະພາປະຊາຊົນ ແຂວງຫົວພັນ, ທ່ານ ສິງວົງໄຊ ສຸລິວົງພັນ ສສຂ ເມືອງ ວຽງໄຊ ແລະ ທ່ານ ຄໍາຫຼ້າ ດວງພາສຸກ ປະທານ ບໍລິສັດ ດວງພາສຸກ ພ້ອມດ້ວຍທີມງານ ໄດ້ລົງຢ້ຽມຢາມ, ພົບປະໂອ້ລົມ ແລະ ອວຍພອນ ອາດີດ ນາຍ ແລະ ພົນທະຫານ ສູນເສຍອົງຄະ ສູນ 11 ຢູ່ບ້ານນາແທ່ນ ເມືອງວຽງໄຊ ແຂວງຫົວພັນ ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ.

           ໃນໂອກາດລົງຢ້ຽມຢາມຄັ້ງນີ້, ຄະນະທີມງານ ໄດ້ສະແດງເຖິງຄວາມເປັນຫ່ວງເປັນໃຍ, ຄວາມກະຕັນຍູ, ຮູ້ບຸນຄຸນຢ່າງສູງ ຂອງພະນັກງານນັກຮົບເສຍອົງຄະ ທີ່ມີຜົນງານ ຄຸນງາມຄວາມດີ ຕໍ່ປະເທດຊາດ ໄດ້ປະກອບສ່ວນສະຕິປັນຍາ ເສຍສະຫຼະເລືອດເນື້ອເຫື່ອແຮງຂອງຕົນ ເພື່ອສ່ວນລວມ ກໍຄື ປະເທດຊາດ ໃນພາລະກິດປົດປ່ອຍຊາດ ໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ ສາມາດຍາດໄດ້ຜົນງານອັນໃຫຍ່ຫຼວງ ຈົນຮອດເທົ່າທຸກວັນນີ້, ພ້ອມນີ້ ຍັງໄດ້ອວຍພອນ ໃຫ້ບັນດາ ທ່ານ ອາດີດ ນາຍ ແລະ ພົນທະຫານ ພະນັກງານບໍານານ ທີ່ເສຍອົງຄະ ຈົ່ງມີສຸຂະພາບແຂງແຮງ ມີອາຍຸໝັ້ນຂວັນຍືນ ປາສະຈາກໂລກໄພໄຂ້ເຈັບ ແລະ ອວຍພອນມາຍັງ ບັນດາທ່ານ ນາຍ ແລະ ພົນທະຫານ ທີ່ປະຈໍາຢູ່ກອງຮ້ອຍສູນເສຍອົງຄະ ສູນ 11 ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ທີ່ຈະມາເຖິງນີ້ ຈົ່ງມີສຸຂະພາບແຂງແຮງ ມີຜົນສໍາເລັດໃນໜ້າທີ່ວຽກງານຂອງບັນດາທ່ານ.

            ໂອກາດດຽວກັນນີ້ ທີມງານ ຍັງໄດ້ນຳເອົາວັດຖຸປັດໃຈເປັນຕົ້ນແມ່ນ ກະຕ່າຂອງຂັວນ, ຜ້າຫົ່ມ ມອບໃຫ້ຄອບຄົວພະນັກງານບຳນານ ນັກຮົບເສຍອົງຄະ ລວມມູນຄ່າທັງໝົດ 3,850,000 ກີບ. ເຊິ່ງໄດ້ຮັບການຊ່ວຍເຫຼືອຈາກ ບໍລິສັດ ດວງພາສຸກ ກໍ່ສ້າງຈຳກັດ ແລະ ຮັບໂດຍ ທ່ານ ພັຕ ພັນສີ ພິມມະວົງ ຕາງໜ້າໃຫ້ຄະນະກອງຮ້ອຍ ແລະ ຄອບຄົວ ນາຍ ແລະ ພົນທະຫານ ພະນັກງານບຳນານທີ່ເສຍອົງຄະ ສູນ 11 ພ້ອມທັງ ສະແດງຄວາມຂອບອົກຂອບໃຈມາຍັງທີມງານ ທີໄດ້ຕ່າງໃຫ້ພະນັກງານລັດທະກອນ ນັກທຸລະກິດ ພໍ່ຄ້າຊາວຂາຍ ພໍ່ແມ່ປະຊາຊົນ ມາຢ້ຽມຢາມ ແລະ ອວຍພອນເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ສືບຕໍ່ໃຫ້ການຊ່ວຍເຫຼືອ ເບິ່ງແຍງ ພະນັກງານບຳນານເສຍອົງຄະ ສູນ 11 ຂອງພວກເຮົາໃນຕໍ່ໜ້າຕື່ມອີກ.