(ສພຊ) ລະຫວ່າງວັນທີ 7-8 ກຸມພານີ້, ທ່ານ ຮສ. ປອ. ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ ແລະ ມະຕິຕົກລົງຂອງ ຄະນະປະຈຳສະພາແຫ່ງຊາດ ທີ່ພົວພັນກັບໂຄງການພັດທະນາໄຟຟ້າ ແລະ ໂຄງການຂຸດຄົ້ນບໍ່ແຮ່ທີ່ ແຂວງຫຼວງພະບາງ.

ໂອກາດດັ່ງກ່າວ, ທ່ານ ຮສ. ປອ, ລິນຄຳ ດວງສະຫວັນ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບທ່ານ ເຈົ້າແຂວງຫຼວງພະບາງ ເພື່ອລາຍງານຈຸດປະສົງໃນການເຄື່ອນໄຫວເຮັດວຽກຄັ້ງນີ້. ຈາກນັ້ນ ໄດ້ພົບປະເຮັດວຽກກັບພາກສ່ວນທີ່ກ່ຽວຂ້ອງ ເຊິ່ງໄດ້ຮັບຟັງການລາຍງານກ່ຽວກັບສະພາບການລົງທຶນດ້ານພະລັງງານ ແລະ ບໍ່ແຮ່ ຢູ່ພາຍໃນແຂວງ; ການຈັດຕັ້ງປະຕິບັດວາລະແຫ່ງຊາດ ທີ່ຕິດພັນກັບວຽກງານຂົງເຂດພະລັງງານ ແລະ ບໍ່ແຮ່ແຂວງ; ການຟື້ນຟູປ່າ ແລະ ປູກປ່າທົດແທນຄືນພື້ນທີ່ປ່າໄມ້ທຳມະຊາດ ທີ່ຖືກໂຄງການພັດທະນາໄຟຟ້າ ແລະ ຂຸດຄົ້ນບໍ່ແຮ່; ການຟື້ນຟູຊີວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນທີ່ຖືກຜົນກະທົບ ຈາກໂຄງການພັດທະນາໄຟຟ້າ ແລະ ບໍ່ແຮ່.

ພ້ອມນີ້, ຄະນະ ຍັງໄດ້ເດີນທາງໄປເຂື່ອນໄຟຟ້ານ້ຳອູ1 ຢູ່ເມືອງປາກອູ ພ້ອມຮັບຟັງການລາຍງານຈາກຜູ້ຕາງໜ້າບໍລິສັດຜະລິດໄຟຟ້ານ້ຳອູ1 ກ່ຽວກັບສະພາບການຈັດຕັ້ງປະຕິບັດໂຄງການເຂື່ອນໄຟຟ້ານ້ຳອູໄລຍະ1 ແລະ 2; ການຟື້ນຟູຊີວິດການເປັນຢູ່, ການຊົດເຊີຍຜົນກະທົບໃຫ້ແກ່ປະຊາຊົນ ທີ່ຖືກກະທົບຈາກໂຄງການ; ການຟື້ນຟູປ່າ ແລະ ການປູກທົດແທນຄືນພື້ນທີ່ທີ່ໄດ້ຮັບຜົນກະທົບຈາກໂຄງການ ແລະ ໄດ້ລົງຕິດຕາມກວດກາ ແລະ ຢ້ຽມຢາມເຂດບ້ານຈັດສັນຂອງໂຄງການດັ່ງກ່າວ.