(ສພຊ) ວັນທີ 16 ພຶດສະພາ 2023, ສະຫາຍ ພົນຕີ ວົງສັກ ພັນທະວົງ ຄະນະປະຈໍາສະພາແຫ່ງຊາດ, ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ພ້ອມດ້ວຍຄະນະ ໄດ້ຢ້ຽມຢາມພົບປະໂອ້ລົມຕໍ່ພະນັກງານຫຼັກແຫຼ່ງຢູ່ກອງພົນທີ 2 ໂດຍມີສະຫາຍ ພົນຈັດຕະວາ ວຽງແກ້ວ ສີສຸລາດ ເລຂາຄະນະພັກ ຫົວໜ້າການເມືອງ ກອງພົນທີ 2, ສະຫາຍ ພົນຈັດຕະວາ ຄໍາດີ ໄຊຍະວົງ ຮອງເລຂາຄະນະພັກ ຫົວໜ້າການທະຫານກອງພົນທີ 2, ພ້ອມດ້ວຍພະນັກງານຫຼັກແຫຼ່ງ ທົ່ວກອງພົນທີ 2 ເຂົ້າຮ່ວມ.

ໂອກາດນີ້ ສະຫາຍ ພົນຈັດຕະວາ ຄໍາດີ ໄຊຍະວົງ ໄດ້ລາຍງານສະພາບການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາໂດຍຫຍໍ້, ຈາກນັ້ນ ສະຫາຍ ພົນຕີ ວົງສັກ ພັນທະວົງ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສໍາເລັດໃນການຈັດຕັ້ງປະຕິບັດໜ້າທີ່ວຽກງານທີ່ຄະນະພັກ-ຄະນະບັນຊາ, ພະນັກງານຫຼັກແຫຼ່ງກອງພົນທີ 2 ຍາດມາໄດ້ຕະຫຼອດໃນໄລຍະຜ່ານມາ ພ້ອມທັງໄດ້ຍົກໃຫ້ເຫັນພາລະບົດບາດ ຂອງສະພາແຫ່ງຊາດ ເວົ້າສະເພາະແມ່ນພາລະບົດບາດ ຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ແລະ ເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ພ້ອມທັງໄດ້ຮຽກຮ້ອງໃຫ້ ຄະນະພັກ-ຄະນະບັນຊາແຕ່ລະຂັ້ນ ຍົກສູງນ້ຳໃຈຄວາມຮັບຜິດຊອບຂອງຕົນຕໍ່ໜ້າທີ່ການເມືອງທີ່ພັກ-ລັດຂັ້ນເທິງ ກໍຄືການຈັດຕັ້ງມອບໝາຍໃຫ້, ເປັນເຈົ້າການປະຕິບັດຄຳຂວັນຮັກຊາດ ແລະ ພັດທະນາ, ຕັ້ງໜ້າປັບປຸງ ກໍ່ສ້າງກຳລັງໃຫ້ມີຄວາມເຕີບໃຫຍ່ເຂັ້ມແຂງ, ປັບປຸງກໍ່ສ້າງກົມກອງ ຄ້າຍຄູໃຫ້ມີຄວາມແໜ້ນໜາຖາວອນ, ເປັນເຈົ້າການເຮັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ຂອບເຂດກົມກອງ ຮັບຜິດຊອບມີຄວາມສະຫງົບໂດຍພື້ນຖານ, ປະຊາຊົນມີທາງທຳມາຫາກິນ, ມີໂອກາດພັດທະນາເສດຖະກິດ-ສັງຄົມ, ຫັນລົງກໍ່ສ້າງຮາກຖານການເມືອງ ຕິດພັນກັບການປະຕິບັດ 2 ວາລະແຫ່ງຊາດ ຂອງລັດຖະບານ ເພື່ອຕ້ານ ແລະ ສະກັດກັ້ນປາກົດການຫຍໍ້ທໍ້ຂອງສັງຄົມໃຫ້ນັບມື້ຫຼຸດໜ້ອຍຖອຍລົງ.