(ສພຊ) ໃນວັນທີ 01 ສິງຫາ 2023, ທີ່ສະພາແຫ່ງຊາດ ທ່ານ ນາງ ທຸມມະລີ ວົງພະຈັນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ຕ້ອນຮັບ ທ່ານ ຈ່ອງ ຢ່ອງຊູ (JUNG Yung Soo) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ເກົາຫຼີ ປະຈຳ ສປປ ລາວ ໃນໂອກາດທີ່ມາດຳລົງຕຳແໜ່ງເປັນເອກອັກຄະລັດຖະທູດ ປະຈຳ ສປປ ລາວ ຄົນໃໝ່.
ໂອກາດນີ້, ທ່ານ ນາງ ທຸມມະລີ ວົງພະຈັນ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ຈ່ອງ ຢ່ອງຊູ ທີ່ຖືກແຕ່ງຕັ້ງໃຫ້ມາປະຕິບັດໜ້າທີ່ການທູດ ຢູ່ ສປປ ລາວ, ພ້ອມທັງຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ.ເກົາຫຼີ ໃນໄລະຍະຜ່ານມາ. ຈາກນັ້ນ ປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ໄດ້ສະແດງຄວາມເຊື່ອໝັ້ນວ່າໃນໄລຍະທີ່ທ່ານທູດ ມາປະຕິບັດໜ້າທີ່ຢູ່ ສປປ ລາວ ຈະມີການຮ່ວມມືກັນຢ່າງໃກ້ຊິດ ເພື່ອສົ່ງເສີມການຮ່ວມມືລະຫ່ວາງສອງຝ່າຍ ໃຫ້ນັບມື້ກວ້າງຂວາງ ແລະ ເປັນຮູບປະທຳຫລາຍຂຶ້ນ.
ທ່ານ ຈ່ອງ ຢ່ອງຊູ ໄດ້ສະແດງຄວາມຂອບໃຈຕໍ່ ປະທານກຳມາທິການວັດທະນະທຳ-ສັງຄົມ ພ້ອມດ້ວຍຄະນະ ທີ່ໄດ້ຕ້ອນຮັບຢ່າງອົບອຸ່ນ ແລະ ໃຫ້ຄໍາໝັ້ນສັນຍາວ່າ ຈະພະຍາຍາມຢ່າງສຸດຄວາມສາມາດ ເພື່ອຊຸກຍູ້ສາຍພົວພັນຮ່ວມມື ລະຫວ່າງ ສປປ ລາວ-ສ ເກົາຫລີ ກໍຄື ຊຸກຍູ້ການພົວພັນຮ່ວມມືຂອງສອງ ສະພາແຫ່ງຊາດ ລາວ-ສ.ເກົາຫລີ ກໍຄືກຳມາທິການວັດທະນະທຳ-ສັງຄົມ ໃຫ້ສືບຕໍ່ໄດ້ຮັບການເສີມຂະຫຍາຍຍິ່ງໆ ຂຶ້ນໃນຕໍ່ໜ້າ.