(ສພຊ) ວັນທີ 28 ສິງຫາ 2023 ທີ່ສະພາແຫ່ງຊາດ ແຫ່ງ ສປປລາວ, ທ່ານ ຄຳແພງ ວິລະພັນ ປະທານກຳມາທິການຍຸຕິທຳ ໄດ້ຕ້ອນຮັບທ່ານ ແມັດທິວ ເຮດ (Matthew Heges) ຜູ້ອໍານວຍການມູນນິທິເວສມິນສະເຕີ ປະຈໍາຂົງເຂດ ອາຊີ-ປາຊີຟິກ ແລະ ອາເມລິກາ ພ້ອມດ້ວຍຄະນະ ທີ່ໄດ້ເດີນທາງມາຮ່ວມເຮັດວຽກນຳສະພາແຫ່ງຊາດ ໃນຄັ້ງນີ້.

ໂອກາດດັ່ງກ່າວ ທ່ານ ຄຳແພງ ວິລະພັນ ໄດ້ກ່າວສະແດງຄວາມຍິນດີຕ້ອນຮັບທ່ານ ແມັດທິວ ເຮດ ພ້ອມດ້ວຍຄະນະ ເຊິ່ງມີສາຍພົວພັນມິດຕະພາບ ແລະ ການຮ່ວມມືທີ່ມີໝາກຜົນ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫະຣາຊະອານາຈັກອັງກິດ ໄດ້ຮັບການພັດທະນາ ແລະ ເສີມຂະຫຍາຍຢ່າງບໍ່ຢຸດຢັ້ງ, ລັດຖະບານອັງກິດ ໄດ້ສຸມໃສ່ໃຫ້ການຊ່ວຍເຫຼືອ ສປປລາວ ໂດຍໄດ້ຖືເອົາເປົ້າໝາຍລວມ ຂອງແຜນພັດທະນາເສດຖະກິດ-ສັງຄົມ ຂອງລັດຖະບານລາວ ເປັນບ່ອນອີງໃນການຈັດຕັ້ງປະຕິບັດໂຄງການຊ່ວຍເຫຼືອ ໂດຍສະເພາະການຊ່ວຍເຫຼືອແກ່ສະພາແຫ່ງຊາດລາວ ຜ່ານມູນນິທິ ເວສມິນສະເຕີ ເພື່ອປະຊາທິປະໄຕ ຫຼື WFD ແມ່ນໄດ້ໃຫ້ການສະຫນັບສະຫນູນໂຄງການຊ່ວຍເຫຼືອລ້າໃຫ້ແກ່ສະພາແຫ່ງຊາດລາວ ນັບຕັ້ງແຕ່ປີ 2017 ເປັນຕົ້ນມາ ໂດຍສະເພາະວຽກຂອງກຳມາທິການຍຸຕິທຳ, ກຳມາທິການກົດໝາຍ, ກຳມາທິການແຜນການ ການເງິນ ແລະ ການກວດສອບ ແລະ ກຳມາທິການວຽກງານສະມາຊິກສະພາແຫ່ງຊາດ. ໄດ້ສະເໜີມາຍັງ ສະພາແຫ່ງຊາດ ເພື່ອຂໍເຂົ້າຢ້ຽມຂໍ່ານັບ ການນໍາຂອງສະພາແຫ່ງຊາດ, ສະພາປະຊາຊົນຂັ້ນແຂວງ ແລະ ພົບປະກັບບັນດາກໍາມາທິການສະພາແຫ່ງຊາດ ທີ່ມູນນິທິດັ່ງກ່າວ ໃຫ້ການສະໜັບສະໜູນ ພ້ອມທັງຖືໂອກາດເຂົ້າຮ່ວມຕິດຕາມກອງປະຊຸມປະເມີນການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດຂອງສະພາແຫ່ງຊາດ.

ໃນວັນທີ 29 ສິງຫາ 2023 ທ່ານ ແມັດທິວ ເຮດ ໄດ້ເດີນທາງໄປພົບປະນຳທ່ານ ສິງຕັນ ໄຊລືຊົງ ຮອງປະທານສະພາປະຊາຊົນແຂວງຫຼວງພະບາງ ເພື່ອຢ້ຽມຢາມ ແລະ ເຮັດວຽກນຳສະພາປະຊາຊົນແຂວງຫຼວງພະບາງ, ນອກນັ້ນ ຍັງໄດ້ເຂົ້າຮ່ວມຕິດຕາມກອງປະຊຸມປະເມີນກົດໝາຍ 4 ສະບັບ ໃນຂົງເຂດສະພາແຫ່ງຊາດ ທີ່ຈັດຂຶ້ນຢູ່ແຂວງຫຼວງພະບາງອີກດ້ວຍ.