ໃນຕອນເຊົ້າຂອງວັນທີ 17 ມັງກອນ 2024, ສະມາຊິກ ສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ ແລະ ສະມາຊິກສະພາປະຊາຊົນ ນະຄອນຫຼວງວຽງຈັນ (ສສນວ) ຊຸດທີ II ໄດ້ສືບຕໍ່ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນນະຄອນຫຼວງ ຊຸດທີ II, ພ້ອມທັງຟັງຄຳຄິດເຫັນ ແລະ ຄຳສະເໜີຂອງປະຊາຊົນ ຢູ່ເມືອງໄຊເສດຖາ ນະຄອນຫຼວງວຽງຈັນ, ໂດຍໄດ້ແບ່ງອອກເປັນ 02 ໜ່ວຍ. ໜ່ວຍທີ 1 ນຳໂດຍ ທ່ານ ສາລະພິດ ສູນວໍລະວົງ ສະມາຊິກ ສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ; ທ່ານ ບຸນປິງ ປັນຍາຈິດ ແລະ ທ່ານ ນາງ ພິດສະໄໝ ຕົ້ນສະຫວັນ ສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ ໄຊເສດຖາ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ຢູ່ທີ່ວັດໂພນໄຊ ເມືອງໄຊເສດຖາ ນວ ໂດຍມີປະຊາຊົນຈາກ 03 ບ້ານເຂົ້າຮ່ວມ ຄື: ບ້ານໂພນໄຊ, ບ້ານນາໄຊ ແລະ ບ້ານຝາຍ ລວມທັງໝົດ 86 ຄົນ, ຍິງ 41 ຄົນ.
ໜ່ວຍທີ 2 ນໍາໂດຍ ທ່ານ ປອ. ນາງ ວາລີ ເວດສະພົງ ສະມາຊິກ ສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ; ທ່ານ ທະນົງໄຊ ຄຸດໄພທູນ ແລະ ທ່ານ ບຸນຈັນ ແກ້ວສີທຳມະ ສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ ໄດ້ລົງພົບປະປະຊາຊົນ ຢູ່ທີ່ວັດບ້ານໄຮຄຳ ໂດຍມີປະຊາຊົນຈາກ 04 ບ້ານເຂົ້າຮ່ວມ ຄື: ບ້ານໄຮຄຳ, ບ້ານນາຄວາຍໃຕ້, ບ້ານນາຄວາຍກາງ ແລະ ບ້ານນາສ້າງໄພ ລວມຈຳນວນຜູ້ເຂົ້າຮ່ວມຮັບຟັງທັງໝົດ 46 ຄົນ, ຍິງ 17 ຄົນ.
ໃນການດຳເນີນພິທີດັ່ງກ່າວ, ບັນດາທ່ານ ສສຊ ແລະ ສສນວ ກໍໄດ້ຖັດປ່ຽນກັນໂອ້ລົມ ແລະ ເຜີຍແຜ່ຜັນຂະຫຍາຍເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນ ນະຄອນຫລວງວຽງຈັນ ຊຸດທີ II ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງກ້ວາງຂວາງ ຕໍ່ກັບບັນດາເນື້ອໃນ ແລະ ວຽກງານທີ່ສຳຄັນຕ່າງໆ. ພ້ອມດຽວກັນນີ້, ບັນດາທ່ານຜູ້ມີສິດເລືອກຕັ້ງ ກໍໄດ້ແລກປ່ຽນ ແລະ ສະເໜີບັນຫາສຳຄັນຕ່າງໆ ຕໍ່ຄະນະລົງເຮັດວຽກ ເປັນຕົ້ນແມ່ນ ການສົ່ງເສີມການຜະລິດສິນຄ້າຂອງປະຊາຊົນລາວ ເຊັ່ນ: ທຽນ; ພ້ອມດຽວກັນນີ້, ປະຊາຊົນກໍໄດ້ສະເໜີໃຫ້ບັນດາທ່ານ ສສຊ, ສສນວ ແລະ ພາກສ່ວນກ່ຽວຂ້ອງ ເອົາໃຈໃສ່ ແລະ ຊຸກຍູ້ສົ່ງເສີມການຜະລິດສິນຄ້າກະສິກຳ ພ້ອມທັງຈັດສັນພື້ນທີ່ຜະລິດກະສິກຳໃຫ້ແກ່ປະຊາຊົນ; ບັນຫາຄ່າຊົດເຊີຍຈາກໂຄງການພັດທະນາຂອງລັດ; ການຄຸ້ມຄອງປ້າຍໂຄສະນາ ແລະ ລາຄາສິນຄ້າ ທີ່ເປັນເງິນຕາຕ່າງປະເທດ; ບັນຫາລົດແກ່ຫິນ-ຊາຍ ທີ່ສ້າງຄວາມເປິເປື້ອນຕາມຖະໜົນຫົນທາງ ໂດຍສະເພາະແມ່ນຕາມເສັ້ນທາງບ້ານແກ້ງຍາງ ຫາ ບ້ານຈີ່ນາຍໂມ້; ບັນຫານ້ຳຖ້ວມຂັງ; ບັນຫາເສັ້ນທາງເປ່ເພ ແລະ ບັນຫາອື່ນໆອີກຈຳນວນໜຶ່ງ. ຕໍ່ກັບຄຳສະເໜີດັ່ງກ່າວ, ບັນດາທ່ານ ສສຊ, ສສນວ ແລະ ພາກສ່ວນຮັບຜິດຊອບ ກໍໄດ້ອະທິບາຍ, ຊີ້ແຈງ ໃຫ້ປະຊາຊົນໄດ້ຮັບຊາບ ກ່ຽວກັບຂັ້ນຕອນໃນການແກ້ໄຂບັນຫາ ພ້ອມທັງຮັບເອົາບັນດາຄຳສະເໜີດັ່ງກ່າວ ນຳໄປປຶກສາຫາລືກັບບັນດາພາກສ່ວນຮັບຜິດຊອບ ເພື່ອຄົ້ນຄວ້າ ແລະ ແກ້ໄຂ ໃຫ້ທັນເວລາ.
(ພອນທິບ ອິນທິລາດ)