ບົດສູນທອນພົດກ່າວອັດ
ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ
ຊຸດທີ VIII, ຂອງທ່ານ ນາງ ປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ,
ວັນທີ 21 ທັນວາ 2018
ຮຽນ: – ທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ທີ່ເຄົາລົບ ແລະ ນັບຖືຢ່າງສູງ.
– ບັນດາທ່ານ ຜູ້ນໍາ, ອາດີດການນໍາຂັ້ນສູງ ຂອງ ພັກ-ລັດ ທີ່ນັບຖື,
– ບັນດາທ່ານສະມາຊິກສະພາແຫ່ງຊາດ, ແຂກທີ່ມີກຽດ ທີ່ນັບຖື ແລະ ຮັກແພງ.
ພາຍຫຼັງການປະຕິບັດສິດ ແລະໜ້າທີ່ເປັນເວລາ 23 ວັນເຕັມ, ດ້ວຍຄວາມຫ້າວຫັນ ບົນຈິດໃຈເສີມຂະຫຍາຍສິດ ປະຊາທິປະໄຕ ແລະ ຄວາມຮັບຜິດຊອບສູງ ຂອງບັນດາທ່ານສະມາຊິກສະພາແຫ່ງຊາດໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ມາຮອດນີ້, ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ໄດ້ສິ້ນສຸດລົງ ດ້ວຍຜົນສໍາເລັດຕາມຈຸດປະສົງຄາດໝາຍທີ່ວາງໄວ້.
ໃນກອງປະຊຸມຄັ້ງນີ້, ໄດ້ພິຈາລະນາ ແລະ ຮັບຮອງເອົາກົດ ໝາຍຈໍານວນ 8 ສະບັບຄື: ປະມວນກົດໝາຍແພ່ງ, ກົດໝາຍວ່າດ້ວຍທະນາຄານທຸລະກິດ, ກົດໝາຍວ່າດ້ວຍຄວາມປອດໄພຈາກລັງສີ, ກົດໝາຍວ່າດ້ວຍ ລາຍເຊັນເອເລັກໂຕຣນິກ, ກົດໝາຍວ່າດ້ວຍ ການລົດ ໄຟ, ກົດໝາຍວ່າດ້ວຍການປະກັນສຸຂະພາບ, ກົດໝາຍວ່າດ້ວຍຄົນພິການ ແລະ ກົດໝາຍວ່າດ້ວຍ ສໍານັກງານຜູ້ຕາງໜ້າ ສປປ ລາວ ປະຈໍາຢູ່ຕ່າງປະເທດ. ການພິຈາລະນາ ຮັບຮອງເອົາ ບັນດາກົດໝາຍດັ່ງ ກ່າວ ເປັນການສືບຕໍ່ ຫັນແນວທາງນະໂຍບາຍຂອງພັກ ກ່ຽວກັບ ການຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງເສດຖະກິດ-ສັງ ຄົມດ້ວຍກົດໝາຍ ໃຫ້ນັບມື້ເປັນລະບົບຄົບຊຸດດີຂຶ້ນ. ກອງປະຊຸມ ຍັງໄດ້ປະກອບຄວາມເຫັນໃສ່ຮ່າງກົດໝາຍວ່າດ້ວຍທີ່ດິນ ເພື່ອແນໃສ່ ຮັບປະກັນ ຈັດຕັ້ງຜັນຂະຫຍາຍທິດຊີ້ນໍາຂອງສູນກາງພັກ ກ່ຽວກັບ ວຽກງານທີ່ດິນໃນໄລຍະໃໝ່, ເພີ່ມທະວີການຄຸ້ມຄອງລັດ, ການນໍາໃຊ້ທີ່ດິນ ທີ່ເປັນຊັບພະຍາກອນອັນລໍ້າຄ່າ ແລະ ເປັນທ່າແຮງຂອງຊາດ ໃຫ້ມີປະສິດທິຜົນ, ມີຄວາມຍືນຍົງ, ປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມ ກໍ່ຄື ປັບປຸງຊີວິດການເປັນຢູ່ຂອງປະຊາຊົນລາວບັນດາ ເຜົ່າ ໃຫ້ນັບມື້ນັບດີຂຶ້ນ. ກອງປະຊຸມມອບໃຫ້ລັດຖະບານ ນໍາເອົາຄວາມຄິດຄວາມເຫັນຂອງສະມາຊິກສະພາແຫ່ງຊາດ ໄປປັບປຸງ ຕໍ່ຮ່າງກົດໝາຍດັ່ງກ່າວ ແລະ ນໍາລົງທາບທາມຄວາມຄິດເຫັນຢ່າງກວ້າງຂວາງ ຈາກບັນດາຂະແໜງການ, ອົງການປົກຄອງທ້ອງຖິ່ນ ແລະ ບັນດາຊັ້ນຄົນຕ່າງໆ ເພື່ອລວບລວມ ແລະ ປັບປຸງແລ້ວນໍາສະເໜີຕໍ່ກອງປະຊຸມສະໄໝສາມັນຄັ້ງຕໍ່ໄປ ພິຈາລະນາ.
ກອງປະຊຸມ ໄດ້ພິຈາລະນາ ແລະ ຮັບຮອງບົດລາຍງານຂອງລັດຖະບານ ກ່ຽວກັບ ແຜນພັດທະນາເສດຖະກິດ-ສັງຄົມ, ແຜນເງິນຕາ, ແຜນງົບປະມານ, ບົດລາຍງານຂອງອົງການກວດສອບ, ອົງ ການໄອຍະການປະຊາຊົນສູງສຸດ, ສານປະຊາຊົນສູງສຸດ ກາງສະໄໝ ແລະ ປະຈໍາປີ 2018, ທິດທາງ ປີ 2019. ກອງປະຊຸມຕີລາຄາສູງ ຕໍ່ຄວາມພະຍາຍາມຊີ້ນໍາ-ນໍາພາ ຂອງລັດຖະບານ ແລະ ບັນດາອົງການທີ່ກ່ຽວຂ້ອງດັ່ງກ່າວ ທີ່ໄດ້ຜ່ານຜາຂໍ້ຫຍຸ້ງຍາກ, ສິ່ງທ້າທາຍ, ສູ້ຊົນຈັດຕັ້ງປະຕິບັດມະຕິກອງປະຊຸມສະໄໝສາມັນແຕ່ລະຄັ້ງ ຂອງສະພາແຫ່ງຊາດ ຕາມຂອບເຂດ ສິດ ແລະ ພາລະບົດບາດຂອງຕົນ ແລະ ສາມາດຍາດໄດ້ຜົນສໍາເລັດໃນຫຼາຍດ້ານ ອັນໄດ້ປະກອບສ່ວນເຂົ້າໃນການ ສືບຕໍ່ ເຮັດໃຫ້ປະເທດຊາດ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ມີຄວາມຍຸຕິທໍາ, ເສດຖະກິດ-ສັງຄົມ ສືບຕໍ່ມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງດີຂຶ້ນເປັນກ້າວໆ. ກອງປະຊຸມຍັງໄດ້ວິເຄາະວິໄຈ ຕໍ່ບັນດາຈຸດອ່ອນຂໍ້ຄົງຄ້າງ ແລະ ສະເໜີຫຼາຍມາດຕະການທີ່ເປັນຮູບປະທໍາ ແລະ ແທດຕົວຈິງ ເພື່ອແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ, ການເງິນ, ເງິນຕາ, ການຜະລິດທຸລະກິດ, ແກ້ໄຂຜົນຂອງການກວດສອບ, ຜົນການກວດກາຕາມຜົນການກວດສອບ ແລະ ແກ້ໄຂປາກົດ ການຫຍໍ້ທໍ້ຢູ່ໃນຂົງເຂດວຽກງານສານປະຊາຊົນ ແລະ ໄອຍະການປະຊາຊົນ ໃນແຕ່ລະຂັ້ນ ໃນປີຕໍ່ໄປ ໃຫ້ມີຄຸນນະພາບ ແລະ ຫັນປ່ຽນຢ່າງຕັ້ງໜ້າ. ກອງປະຊຸມ ສະເໜີມາຍັງບັນດາຂະແໜງການສູນກາງ, ທ້ອງຖິ່ນ ຈົ່ງໄດ້ເຊີດຊູຄວາມຮັບຜິດຊອບຂອງອົງການຕົນ, ສູ້ຊົນຈັດຕັ້ງປະຕິບັດບັນດາຄາດໝາຍໃຫຍ່ທີ່ໄດ້ກໍານົດໄວ້ໃນມະຕິຕ່າງໆ ຂອງກອງປະຊຸມຄັ້ງນີ້ ດ້ວຍບັນດານະໂຍບາຍ, ມາດຕະການ ທີ່ບຸກທະລຸຢ່າງແຂງແຮງ, ແທດຕົວຈິງ ຫຼາຍຂຶ້ນກວ່າເກົ່າ ແນໃສ່ກະຕຸ້ນເສດຖະກິດ-ສັງຄົມ ໃນການພັດທະນາປະເທດຊາດໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ເປັນຮູບປະທໍາ. ກອງປະຊຸມສະແດງຄວາມຊົມເຊີຍ ຕໍ່ ຜູ້ປະກອບການທັງພາຍໃນ ແລະ ຕ່າງປະເທດ, ປະຊາຊົນລາວບັນດາເຜົ່າ ທີ່ໄດ້ໃຫ້ການສະໜັບສະໜູນ ແລະ ໄດ້ປະກອບສ່ວນທາງດ້ານສະຕິປັນຍາ, ເຫື່ອແຮງ, ວັດຖຸ-ເງິນຄໍາ ເຂົ້າໃນການຈັດຕັ້ງປະຕິບັດແຜນພັດທະນາດັ່ງກ່າວ ດ້ວຍຄວາມເປັນເຈົ້າການ.
ກອງປະຊຸມ ຍັງໄດ້ຕິດຕາມກວດກາ ການຈັດຕັ້ງປະຕິບັດມະ ຕິຂອງກອງປະຊຸມສະພາແຫ່ງຊາດໃນຄັ້ງຜ່ານມາເຊັ່ນ: ການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ຮັບຟັງການຊີ້ແຈງອະທິບາຍຈາກ 10 ກະຊວງ, ອົງການ ໃນບາງດ້ານທີ່ພົ້ນເດັ່ນ ແລະ ຮີບດ່ວນ ພົວພັນເຖິງຜົນປະໂຫຍດລວມຂອງຊາດ ແລະປະຊາ ຊົນສ່ວນຫຼວງຫຼາຍເປັນຕົ້ນ: ຄຸນນະພາບໃນການກໍ່ສ້າງ ແລະ ສ້ອມ ແປງຖະໜົນຫົນທາງ, ຄຸນນະພາບການບໍລິການ ການປິ່ນປົວຢູ່ໂຮງໝໍ ແລະ ສຸກສາລາ ແລະ ການແກ້ໄຂປາກົດການຫຍໍ້ທໍ້ ໃນການລະເມີດສັນຍາກູ້ຢືມ. ກອງປະຊຸມ ມີຄວາມເຊື່ອໝັ້ນວ່າ ບັນດາຂະແໜງການດັ່ງກ່າວ ຈະສືບຕໍ່ເສີມຂະຫຍາຍບັນດາຜົນງານ, ຜົນສໍາເລັດ ທີ່ຍາດມາໄດ້ໃນຊຸມປີຜ່ານມາ, ສູ້ຊົນຈໍາກັດ ແລະ ແກ້ໄຂບັນດາປາກົດການຫຍໍ້ທໍ້, ສິ່ງກີດຂວາງ ໃນຂົງເຂດວຽກງານ ທີ່ຕົນຮັບຜິດຊອບ ໃຫ້ມີການຫັນປ່ຽນດີຂຶ້ນຢ່າງຈະແຈ້ງ, ປະກອບສ່ວນເຂົ້າໃນການແກ້ໄຂສະ ພາບການລະເມີດວິໄນແຜນການ-ການເງິນ, ການນໍາໃຊ້ງົບປະມານທີ່ມີຈໍາກັດຢ່າງປະຍັດ, ມີຄຸນນະພາບ, ມີປະສິດທິຜົນ, ເກັບກູ້ ແລະ ລວມສູນລາຍຮັບເຂົ້າງົບປະມານແຫ່ງລັດ ຕາມທີ່ກົດໝາຍງົບປະມານ ກໍານົດໄວ້; ສ້າງລະບົບບໍລິການສຸຂະພາບ ທີ່ມີຄຸນນະພາບ ໂດຍຖືເອົາຄົນເປັນໃຈກາງ, ຍົກສູງການບໍລິຫານຄະດີ ໃຫ້ມີຄຸນນະພາບ, ຖືກ ຕ້ອງຕາມກົດໝາຍ ແລະ ຮັບປະກັນຄວາມຍຸຕິທໍາໃນສັງຄົມ.
ກອງປະຊຸມ ໄດ້ຮັບຮອງເອົາ ການສະເໜີແຕ່ງຕັ້ງ ສະມາຊິກລັດຖະບານຈໍານວນ 2 ທ່ານຕາມການສະເໜີຂອງທ່ານນາຍົກລັດຖະ ມົນຕີຄື: ແຕ່ງຕັ້ງທ່ານ ພົນໂທ ວິໄລ ຫຼ້າຄໍາຟອງ ເປັນລັດຖະມົນຕີກະຊວງປ້ອງກັນຄວາມສະຫງົບ ແລະ ແຕ່ງຕັ້ງ ທ່ານ ສອນໄຊ ສິດພະໄຊ ເປັນຜູ້ວ່າ ການທະນາຄານ ແຫ່ງ ສປປ ລາວ. ກອງປະຊຸມມີຄວາມເຊື່ອໝັ້ນວ່າ ດ້ວຍບົດຮຽນ ແລະ ປະສົບການໃນການບໍລິຫານລັດຂອງບັນດາທ່ານດັ່ງກ່າວ ຈະສືບຕໍ່ປັບປຸງການຈັດຕັ້ງ ແລະ ການເຄື່ອນ ໄຫວວຽກງານຂອງອົງການຕົນໃຫ້ມີການຫັນປ່ຽນດີຂຶ້ນ. ກອງປະຊຸມຍັງໄດ້ຮັບຮອງເອົາຊົນເຜົ່າບຣູ ຈັດຢູ່ໃນໝວດພາສາ ມອນ-ຂະແມ ຊຶ່ງໄດ້ເຮັດໃຫ້ຈໍານວນຊົນເຜົ່າໃນລາວເພີ່ມຈາກ 49 ມາເປັນ 50 ເຜົ່າ.
ກອງປະຊຸມ ໄດ້ພິຈາລະນາ ແລະ ຮັບຮອງເອົາ ບົດລາຍງານການເຄື່ອນ ໄຫວວຽກງານກາງສະໄໝ ແລະ ປະຈໍາປີ 2018 ແລະ ທິດທາງການເຄື່ອນໄຫວວຽກງານຮອດປີ 2020 ແລະ ແຜນວຽກງານຈຸດສຸມປີ 2019 ຂອງສະພາແຫ່ງຊາດ ແລະ ຮັບຟັງການປະກອບຄວາມເຫັນຂອງສູນກາງແນວລາວສ້າງຊາດ ຕໍ່ກັບການເຄື່ອນໄຫວວຽກງານຂອງສະພາແຫ່ງຊາດ. ກອງປະຊຸມຕີລາຄາສູງ ຕໍ່ການຊີ້ນໍາ-ນໍາພາຂອງຄະນະປະຈໍາສະພາແຫ່ງຊາດ, ການປະຕິບັດໜ້າທີ່ຂອງກົງຈັກຂອງສະພາແຫ່ງຊາດ ແລະ ສະມາຊິກສະພາແຫ່ງຊາດຢູ່ຂັ້ນສູນກາງ ແລະ ທ້ອງຖິ່ນ ທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍວຽກງານຂອງຕົນຕາມພາລະບົດບາດ ແລະ ສິດໜ້າທີ່ ໃນປີຜ່ານມາ, ປະກອບສ່ວນສໍາຄັນຍົກສູງຂີດຄວາມສາມາດໃນການພິຈາລະນາ ແລະ ຮັບຮອງບັນດາບັນຫາທີ່ສໍາຄັນພື້ນຖານຂອງປະເທດຊາດ ຖືກຕ້ອງຕາມແນວທາງ, ແຜນນະໂຍບາຍຂອງພັກ, ສອດຄ່ອງກັບກົດໝາຍ ແລະ ສະພາບຄວາມເປັນຈິງ ໃນການພັດທະນາເສດຖະກິດ-ສັງຄົມ ກໍ່ຄື ການເຊື່ອມໂຍງທາງດ້ານເສດຖະກິດ ກັບພາກພື້ນ ແລະ ໃນໂລກ, ສືບຕໍ່ສູ້ຊົນ ຈັດຕັ້ງປະຕິບັດບັນດາວຽກງານຈຸດສຸມ ໃນປີ 2019 ໃຫ້ບັນລຸຜົນສໍາເລັດຕາມແຜນການທີ່ວາງໄວ້. ກອງປະຊຸມ ຍັງໄດ້ປະກອບຄວາມເຫັນ ແລະ ສະເໜີມາຍັງຄະນະປະຈໍາສະພາແຫ່ງຊາດ ສືບຕໍ່ປັບປຸງແກ້ໄຂບັນດາຈຸດອ່ອນ ຂໍ້ຄົງຄ້າງໃນການປະຕິບັດພາລະບົດບາດ, ສິດໜ້າທີ່ທາງດ້ານນິຕິບັນຍັດ, ຕິດຕາມກວດກາ, ກົນໄກການປະສານງານກັບ ບັນດາຂະແໜງການຂັ້ນສູນກາງ ແລະ ທ້ອງຖິ່ນ ໃຫ້ມີການຫັນປ່ຽນດີຂຶ້ນ. ກອງປະຊຸມສະແດງຄວາມຂອບໃຈ ມາຍັງ ສູນກາງແນວລາວສ້າງຊາດ ທີ່ໄດ້ຕາງໜ້າໃຫ້ອົງການສະຫະພັນນັກຮົບເກົ່າ ແລະ ບັນດາອົງການຈັດຕັ້ງມະຫາຊົນ ປະກອບຄວາມເຫັນຢ່າງມີເນື້ອໃນ ແລະ ເປັນບັນຫາທີ່ພົ້ນເດັ່ນ ສະເໜີໃຫ້ບັນດາອົງການລັດ ຈະຕ້ອງໄດ້ສືບຕໍ່ແກ້ໄຂ.
ບັນດາທ່ານຜູ້ນໍາພັກ-ລັດ, ອາດີດການນໍາ ຂັ້ນສູງ, ສະມາຊິກສະພາແຫ່ງຊາດ ແລະ ແຂກທີ່ນັບຖື ແລະ ຮັກແພງ!
ຜົນສໍາເລັດຂອງກອງປະຊຸມຄັ້ງນີ້ ແມ່ນໝາກຜົນລວມຍອດ ແຫ່ງການເສີມຂະຫຍາຍສະຕິປັນຍາລວມໝູ່, ການປະສານສົມທົບກົມກຽວແຕ່ຫົວທີ ລະຫວ່າງ ສະພາແຫ່ງຊາດ ກັບ ລັດຖະບານ ແລະ ອົງການລັດທີ່ກ່ຽວຂ້ອງ. ກອງປະຊຸມຮຽກຮ້ອງມາຍັງ ອົງການຈັດຕັ້ງລັດທຸກພາກສ່ວນ, ທຸກຂັ້ນ ພ້ອມດ້ວຍປະຊາຊົນລາວບັນດາເຜົ່າ ແລະ ຜູ້ປະກອບການທັງພາຍໃນ ແລະ ຕ່າງປະເທດ ຈົ່ງພ້ອມກັນນໍາເອົາຜົນສໍາເລັດຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍຕາມຂອບເຂດໜ້າທີ່, ສິດຂອງຕົນ ດ້ວຍຄວາມເປັນເຈົ້າການ ເພື່ອແນໃສ່ ຮັບປະກັນເຮັດໃຫ້ປະເທດຊາດສືບຕໍ່ມີການພັດທະນາຢ່າງໜັກແໜ້ນໃນຊຸມປີຕໍ່ໜ້າ. ກອງປະຊຸມ ສະແດງຄວາມຮູ້ບຸນຄຸນ ແລະ ຂອບໃຈຢ່າງສູງມາຍັງການນໍາທຸກຂັ້ນ ທີ່ໄດ້ໃຫ້ການຮ່ວມມື, ການຊີ້ນໍາຕໍ່ບັນດາເນື້ອໃນທີ່ໄດ້ນໍາມາພິຈາລະນາໃນກອງປະຊຸມໃນຄັ້ງນີ້. ສະແດງຄວາມຂອບໃຈຢ່າງສູງ ມາຍັງບັນດາທ່ານຜູ້ນໍາ, ອະດີດການ ນໍາຂັ້ນສູງຂອງພັກ-ລັດ, ຄະນະລັດຖະບານ, ອົງການແນວລາວສ້າງຊາດ, ອົງການສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ, ບັນດາທ່ານແຂກທີ່ມີກຽດ ທີ່ໄດ້ສະຫຼະເວລາ ແລະ ໃຫ້ກຽດເຂົ້າຮ່ວມກອງປະຊຸມໃນຄັ້ງນີ້. ຂອບໃຈຕໍ່ການຕິດຕາມຮັບຊົມ ແລະ ການປະກອບຄວາມເຫັນທີ່ມີເນື້ອໃນສໍາຄັນຂອງປະຊາຊົນ ຕໍ່ການດໍາເນີນກອງປະຊຸມ, ຂອບໃຈມາຍັງ ສື່ມວນຊົນ, ກໍາລັງປ້ອງກັນ ຊາດ-ປ້ອງກັນຄວາມສະຫງົບ ແລະ ທຸກພາກສ່ວນທີ່ກ່ຽວຂ້ອງ ໄດ້ປະກອບສ່ວນເຮັດໃຫ້ກອງປະຊຸມຄັ້ງນີ້ ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.
ນະໂອກາດປີໃໝ່ສາກົນ 2019 ທີ່ໃກ້ຈະມາເຖິງນີ້, ຂ້າພະເຈົ້າ ຕາງໜ້າໃຫ້ກອງປະຊຸມ ຂໍອວຍພອນໄຊອັນປະເສີດ ມາຍັງບັນດາທ່ານຜູ້ນໍາ, ອະດີດການນໍາຂັ້ນສູງຂອງພັກ-ລັດ, ນັກປະຕິວັດອາວຸໂສ, ສະ ມາຊິກສະພາແຫ່ງຊາດ, ພະນັກງານ, ທະຫານ, ຕໍາຫຼວດ ແລະ ປະຊາ ຊົນລາວບັນດາເຜົ່າໃນທົ່ວປະເທດ ຈົ່ງມີສຸຂະພາບແຂງແຮງ, ມີຄວາມ ສຸກສົມຫວັງ ແລະ ປະ ສົບຜົນສໍາເລັດ ໃນໜ້າທີ່ວຽກງານອັນມີກຽດສະຫງ່າຂອງບັນດາທ່ານ.
ໃນໂອກາດນີ້, ຂ້າພະເຈົ້າຂໍປະກາດ ອັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ຢ່າງເປັນທາງການ ນັບແຕ່ເວລານີ້ເປັນຕົ້ນໄປ.
ຂໍຂອບໃຈ.