(ສພຊ) – ການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນຕອນບ່າຍວັນທີ 21 ພະຈິກນີ້ ໂດຍການເປັນປະທານຂອງ ຄຳໃບ ດຳລັດ ຮອງປະທານສະພາແຫ່ງຊາດ; ຫຼັງຈາກທ່ານ ຮສ. ປອ. ພຸດ ສິມມາລາວົງ ລັດຖະມົນ ຕີກະຊວງສຶກສາທິການ ແລະ ກິລາ ໄດ້ລາຍງານກ່ຽວກັບການຈັດຕັ້ງປະຕິບັດແຜນຍຸດທະສາດການປະຕິຮູບລະບົບການສຶກສາແຫ່ງຊາດ, ຍຸດທະສາດການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ, ທ່ານ ບຸນຕາ ເທບພະວົງ ປະທານກຳມາທິການວັດທະນະທຳ-ສັງຄົມ ຕາງໜ້າຄະ ນະປະຈໍາສະພາແຫ່ງຊາດ ໄດ້ປະກອບຄໍາເຫັນຕໍ່ບົດລາຍງານດັ່ງກ່າວ ໂດຍສະເໜີບາງທັດສະນະຕໍ່ກັບທິດທາງແຜນການໃນຕໍ່ໜ້າ ເພື່ອໃຫ້ລັດຖະບານ ກໍຄືຂະແໜງການທີ່ກ່ຽວຂ້ອງ ນໍາໄປຄົ້ນຄວ້າ ແລະ ພິຈາລະນາ ດັ່ງນີ້:

ຕໍ່ກັບຍຸດທະສາດການປະຕິຮູບລະບົບການສຶກສາແຫ່ງຊາດ

1. ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ຄູ-ອາຈານ ມີຄຸນທາດການເມືອງທີ່ໜັກແໜ້ນ, ມີຈັນຍາບັນ, ຈັນຍາທຳ, ມີຄວາມຮັກຊາດ, ມີຄວາມອົດ ທົນສູງກວ່າເກົ່າ.

2. ປັບປຸງ ແລະ ສ້າງໃໝ່ ກົດໝາຍ ແລະ ນິຕິກໍາໃຕ້ກົດໝາຍ ທີ່ເຫັນວ່າມີຄວາມຈໍາເປັນ.

3. ສຸມໃສ່ສ້າງ ແລະ ປັບປຸງຫຼັກສູດການຮຽນ-ການສອນ ໃນສາຍສາມັນສຶກສາ ແລະ ສາມັນວິຊາຊີບ; ພ້ອມນີ້, ກໍໃຫ້ສຶກສາຄົ້ນຄວ້າຄືນຫຼັກສູດເກົ່າທີ່ຍັງເຫັນວ່າດີມີປະໂຫຍດ, ຮຽນແລ້ວນັກຮຽນເຂົ້າໃຈ ກໍໃຫ້ນໍາມາໃຊ້ຄືນໃໝ່.

4. ສ້າງໂຮງຮຽນກິນນອນ ຫຼື ສ້າງທີ່ຢູ່ອາໄສໃຫ້ນັກຮຽນຢູ່ເຂດຊົນນະບົດ ບ່ອນທີ່ມີຄວາມຫຍຸ້ງຍາກ.

5. ປັບປຸງກົນໄກປະສານງານ ແລະ ວິທີເຮັດວຽກຂອງຄະນະພັດທະນາການສຶກ ສາຂັ້ນບ້ານ ເພື່ອຮັບປະກັນການຄຸ້ມຄອງການນໍາໃຊ້ເງິນປະກອບສ່ວນຂອງພໍ່ແມ່ນັກຮຽນ ແລະ ຊຸມຊົນ ໃຫ້ມີປະສິດທິຜົນສູງ.

6. ເປັນເຈົ້າການສຶກສາອົບຮົມໃຫ້ນັກຮຽນ-ນັກສຶກສາ ເຫັນໄດ້ຄວາມສໍາຄັນຂອງວຽກງານການສຶກສາ ເພື່ອເຮັດໃຫ້ອັດຕາການປະລະການຮຽນຫຼຸດລົງ ແລະ ຂະ ຫຍາຍໂອກາດການເຂົ້າຮຽນໃໝ່ໃນທຸກຊັ້ນທຸກສາຍໃຫ້ນັບມື້ເພີ່ມຂຶ້ນ; ກວດກາຄືນ ແລະ ຊອກວິທີແກ້ໄຂບັນຫາທີ່ບາງບ້ານມີໂຮງຮຽນ ແຕ່ບໍ່ມີຄູ, ບາງບ້ານມີຄູ ແຕ່ມີນັກຮຽນໜ້ອຍ.

7. ສູ້ຊົນຂະຫຍາຍໂຄງການອາຫານທ່ຽງໃນໂຮງຮຽນໃຫ້ເພີ່ມຂຶ້ນ ແລະ ຄົ້ນຄວ້າພິຈາລະນາເພີ່ມເງິນ ຈາກ 1,000 ກີບຕໍ່ຄົນຕໍ່ຄາບ ຂຶ້ນຕື່ມຕາມຄວາມເໝາະສົມ ເພື່ອໃຫ້ເດັກໄດ້ຮັບໂພຊະນາການດີຂຶ້ນ.

8. ສູ້ຊົນພັດທະນາ ແລະ ປັບປຸງພື້ນຖານໂຄງລ່າງທາງດ້ານການສຶກສາ, ສ້າງຫໍພັກ, ຫ້ອງຮຽນ, ຫ້ອງອ່ານ, ສະໜອງປຶ້ມຕໍາລາ, ວັດຖູປະກອນການຮຽນ-ການສອນ, ອຸປະກອນການກິລາ, ສິລະປະ, ມີກິດຈະກໍາສໍາລັບໄວໜຸ່ມ ແລະ ສ້າງເງື່ອນໄຂສະພາບແວດລ້ອມຂອງໂຮງຮຽນໃຫ້ເປັນສິ່ງດຶງດູດໃຫ້ນັກຮຽນຢາກໄປໂຮງຮຽນ ໃຫ້ມີການຂະຫຍາຍຕົວຕໍ່ເນື່ອງ.

9. ສູ້ຊົນແກ້ໄຂງົບປະມານເຂົ້າໃນວຽກງານການສຶກສາ, ວິທະຍາສາດ ແລະ ກິ ລາ ໃຫ້ໄດ້ຕາມກົດໝາຍກໍານົດໄວ້.

10. ສືບຕໍ່ເພີ່ມທະວີຄວາມເປັນເຈົ້າ ໃນການປະສານສົມທົບກັນ ເພື່ອຈັດຕັ້ງຜັນຂະຫຍາຍມະຕິຕົກລົງ ເລກທີ 09/ລບ, ລົງວັນທີ 17 ກໍລະກົດ 2023 ຕາມ 5 ນະ ໂຍບາຍ ແລະ 10 ມາດຕະການແກ້ໄຂການຂາດແຄນຄູສອນ; 3 ນະໂຍບາຍ ແລະ 12 ມາດຕະການ ແກ້ໄຂການປະລະການຮຽນຂອງນັກຮຽນ ແລະ ການສົ່ງເສີມການເຂົ້າຮຽນວິຊາຊີບ ໃຫ້ທົ່ວເຖິງ ແລະ ເປັນຮູບປະທໍາຕົວຈິງໃຫ້ຫຼາຍຂຶ້ນ.

ຕໍ່ກັບຍຸດທະສາດການພັດທະນາຊັບພະຍາກອນມະນຸດແຫ່ງຊາດ

ສະເໜີໃຫ້ລັດຖະບານ ກໍຄືຄະນະກໍາມາທິການແຫ່ງຊາດ ເພື່ອການພັດທະນາຊັບພະຍາກອນມະນຸດແຫ່ງຊາດ ສືບຕໍ່ສຸມໃສ່ຈັດຕັ້ງປະຕິບັດຍຸທະສາດການພັດທະນາໃນໄລຍະທ້າຍທີ່ໄດ້ກໍານົດຮອດປີ 2025 ດັ່ງນີ້:

1. ສືບຕໍ່ສະຫຼຸບຕີລາຄາສະພາບການຈັດຕັ້ງປະຕິບັດຍຸດທະສາດການພັດທະ ນາຊັບພະຍາກອນມະນຸດແຫ່ງຊາດ ຕາມທີ່ກໍານົດໄວ້ ໃຫ້ເຫັນແຈ້ງດ້ານດີຜົນສໍາເລັດ, ສາເຫດຕົ້ນຕໍ ແລະ ທິດທາງແຜນພັດທະນາຊັບພະຍາກອນມະນຸດໃນຕໍ່ໜ້າ ໃຫ້ມີຄວາມສອດຄ່ອງກັບໜ້າທີ່ການເມືອງໃນໄລຍະໃໝ່ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ແຕ່ລະໄລຍະ ເພື່ອເປັນພື້ນຖານທີ່ໜັກແໜ້ນໃຫ້ແກ່ການກະກຽມຫັນປະເທດອອກຈາກສະຖານະພາບທຸກຍາກ ແລະ ດ້ອຍພັດທະນາ ໃນເວລາອັນໃກ້ນີ້ ທັງເປັນການສູ້ຊົນບັນລຸເປົ້າໝາຍການພັດທະນາແບບຍືນຍົງ (SDGs) ໃນປີ 2030.

2. ສ້າງຄົນລາວໃຫ້ເປັນພົນລະເມືອງດີ, ມີຄຸນສົມບັດ, ມີຄວາມຮູ້, ມີຄວາມສາມາດ, ມີວິຊາຊີບ, ມີຄວາມຊຳນານງານໃນຫຼາກຫຼາຍສາຂາອາຊີບຕາມຄວາມຕ້ອງການຂອງຕະຫຼາດແຮງງານ ເພື່ອຕອບສະໜອງຄວາມຕ້ອງການຂອງການພັດທະນາເສດຖະກິດ-ສັງຄົມຂອງປະເທດຊາດໃນໄລຍະໃໝ່, ສາມາດເຊື່ອມໂຍງ ແລະ ແຂ່ງຂັນກັບພາກພື້ນ ແລະ ສາກົນ ເທື່ອລະກ້າວ.

3. ສ້າງເງື່ອນໄຂ ແລະ ສະພາບແວດລ້ອມທີ່ເອື້ອອໍານວຍໃຫ້ແກ່ການພັດທະນາຊັບພະຍາກອນມະນຸດ ດ້ວຍການສືບຕໍ່ກໍ່ສ້າງ, ປັບປຸງພື້ນຖານໂຄງລ່າງ ໃຫ້ທົ່ວສັງຄົມສາມາດເຂົ້າເຖິງການບໍລິການທາງດ້ານການສຶກສາ, ສາທາລະນະສຸກ, ແຮງງານ ແລະ ສະຫວັດດີການສັງຄົມ ຢ່າງທົ່ວເຖິງ; ກໍ່ສ້າງບໍາລຸງ ຄູ, ແພດໝໍ, ນາຍຊ່າງທີ່ມີສີມືແຮງງານ, ປູກຝັງລ້ຽງສັດ ໃຫ້ມີຄວາມຮູ້ຄວາມສາມາດ ເພື່ອສ້າງຄວາມເຊື່ອໝັ້ນໃຫ້ແກ່ຜູ້ປະກອບການ ກໍຄືສັງຄົມ ເທື່ອລະກ້າວ.

4. ສືບຕໍ່ຄົ້ນຄວ້າປະຕິບັດນະໂຍບາຍເພີ່ມເງິນເດືອນ ຫຼື ເງິນຄ່າຄອງຊີບ ໃຫ້ແກ່ພະນັກງານ-ລັດຖະກອນ ແລະ ປັບປຸງຄ່າແຮງງານຂັ້ນຕໍ່າໃຫ້ສາມາດກຸ້ມກິນ ຈຶ່ງຈະສາມາດດຶງດູດໃຫ້ມີຄົນມາເຂົ້າຮຽນ ແລະ ຫຼຸດຜ່ອນການປະລະການຮຽນ ໄປອອກແຮງງານຢູ່ຕ່າງປະເທດ.