(ສພຊ) – ເພື່ອຮັບປະກັນເຮັດໃຫ້ການຄຸ້ມຄອງ ແລະ ພັດທະນາທີ່ດິນກະສິກຳ ມີປະສິດທິພາບ ແລະ ປະສິດທິຜົນ; ໃນວາລະກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ຄັ້ງວັນທີ 25 ພະ ຈິກນີ້, ທ່ານ ນາງ ປິ່ງຄຳ ລາຊະສິມມາ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຕາງໜ້າຄະນະປະຈໍາສະພາແຫ່ງຊາດ ໄດ້ສະເໜີບາງຄໍາເຫັນຕໍ່ລັດຖະບານດັ່ງນີ້:

1. ວິໄສທັດຮອດປີ 2040 ແລະ ຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກຳ ຮອດປີ 2030 ຕ້ອງໃຫ້ສອດຄ່ອງກັບຍຸດທະສາດຂອງຂະແໜງການທີ່ກ່ຽວຂ້ອງ ເປັນຕົ້ນຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມ, ໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່, ແຜນແມ່ບົດຈັດສັນທີ່ດິນແຫ່ງຊາດ ລວມທັງວຽກງານປ່າໄມ້ຂອງຂະແໜງກະສິກຳ ແລະ ປ່າໄມ້ເອງ;

2. ເອົາໃຈໃສ່ປົກປັກຮັກສາທີ່ດິນກະສິກຳ ໂດຍສະເພາະເນື້ອທີ່ດິນນາ, ດິນຮັບນໍ້າຊົນລະປະທານທີ່ລັດໄດ້ມີການພັດທະນາແລ້ວ ເພື່ອເປັນປັດໄຈສະໜອງໃຫ້ແກ່ແຜນງານຄໍ້າປະກັນການຜະລິດສະບຽງອາຫານ ແລະ ຜະລິດເປັນສິນຄ້າ ເພື່ອຊົມໃຊ້ພາຍໃນ ແລະ ສົ່ງອອກ ໂດຍມີມາດຕະການຄຸ້ມຄອງ, ມີການຕິດຕາມກວດກາ, ຈຳກັດການຫັນປ່ຽນທີ່ດິນກະສິກຳໄປເປັນທີ່ດິນປະເພດອື່ນ ເພື່ອຮັບປະກັນບໍ່ໃຫ້ເນື້ອທີ່ກະສິກຳຫຼຸດລົງໃນໄລຍະຍາວ;

3. ສືບຕໍ່ມີກົນໄກຄຸ້ມຄອງ ແລະ ພັດທະນາທີ່ດິນກະສິກຳ ໄປຄຽງຄູ່ກັບການຍົກສູງຄຸນນະພາບການຜະລິດກະສິກຳ ໃຫ້ກ້າວໄປສູ່ການຜະລິດທີ່ທັນສະໄໝ ພ້ອມທັງມີການຍົກສູງຄຸນນະພາບທີ່ດິນກະສິກຳ ໃຫ້ຮັບປະກັນຕໍ່ການນໍາໃຊ້ ແລະ ການພັດທະນາທີ່ດິນ ຕາມທິດສີຂຽວ ແລະ ຍືນຍົງ;

4. ໃນການຈັດຕັ້ງຜັນຂະຫຍາຍຍຸດທະສາດສະບັບນີ້ ສະເໜີໃຫ້ມີກົນໄກປະສານສົມທົບກັບພາກສ່ວນທີ່ກ່ຽວຂ້ອງທັງສູນກາງ ແລະ ທ້ອງຖິ່ນ ຢ່າງກົມກຽວ ແລະ ເປັນເອກະພາບກັນ, ມີການສະໜອງຂໍ້ມູນຂ່າວສານ, ເຄື່ອງມືອຸປະກອນ ແລະ ການແບ່ງຄວາມຮັບຜິດຊອບຢ່າງຂາດຕົວ ບົນຫຼັກການການມີສ່ວນຮ່ວມຈາກທຸກພາກສ່ວນທີ່ກ່ຽວຂ້ອງ ແລະ ໄປຕາມທິດ 3 ສ້າງ ເພື່ອຮັບປະກັນເຮັດໃຫ້ການຈັດຕັ້ງປະຕິບັດຍຸດທະສາດດັ່ງກ່າວ ມີປະສິດທິພາບ ແລະ ປະສິດທິຜົນ, ຮັບປະກັນຄວາມຊັດເຈນທາງດ້ານຕົວເລກເນື້ອທີ່ດິນທີ່ຈະຖືກນໍາໃຊ້ໃນແຕ່ລະປະເພດ;

5. ສ້າງ ແລະ ພັດທະນາບຸກຄະລາກອນທີ່ຮັບຜິດຊອບວຽກງານການຄຸ້ມຄອງ ແລະ ພັດທະນາທີ່ດິນກະສິກຳ ໃຫ້ໄດ້ທັງປະລິມານ ແລະ ຄຸນນະພາບ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວຽກງານດັ່ງກ່າວ ພ້ອມທັງເອົາໃຈໃສ່ໂຄສະນາເຜີຍ ແຜ່ຂໍ້ມູນຂ່າວສານການຄຸ້ມຄອງ ແລະ ພັດທະນາທີ່ດິນກະສິກຳ ຢ່າງກວ້າງຂວາງ ໃຫ້ທຸກພາກສ່ວນໃນສັງຄົມ, ປະຊາຊົນ ເຂົ້າໃຈ, ເຂົ້າຮ່ວມ ແລະ ມີສ່ວນຮ່ວມໃນການຈັດຕັ້ງປະຕິບັດວຽກງານດັ່ງກ່າວ;

6. ຕໍ່ກັບມາດຕະການດ້ານງົບປະມານ ແລະ ແຫຼ່ງທຶນ, ສະເໜີໃຫ້ກະຊວງກ່ຽວຂ້ອງ ເອົາໃຈໃສ່ຄົ້ນຄວ້ານໍາສະເໜີເຂົ້າແຜນງົບປະມານຂອງລັດ ແລະ ຄົ້ນຄວ້າແຫຼ່ງທຶນຕ່າງໆ ເພື່ອໝູນໃຊ້ເຂົ້າໃສ່ບັນດາວຽກງານຢ່າງມີຈຸດສຸມ, ພຽງພໍ ແລະ ຮັບປະກັນໃຫ້ຮ່າງວິໄສທັດ ແລະ ຍຸດທະສາດສະບັບນີ້ ສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ.