(ສພຊ) – ຕອນເຊົ້າວັນທີ 27 ພະຈິກຜ່ານມາ, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຮັບຟັງບົດລາຍງານຂອງອົງການກວດກາແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2024 ແລະ ແຜນການປະຈຳປີ 2025, ບົດລາຍງານການກວດກາຕາມຜົນການກວດສອບປີ 2022 ຈາກທ່ານ ຄຳພັນ ພົມມະທັດ ປະທານອົງການກວດກາແຫ່ງລັດ; ບົດລາຍງານຂອງອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ແຜນການປະຈໍາປີ 2025, ບົດສະຫຼຸບຂາດຕົວການຈັດຕັ້ງປະຕິບັດງົບປະມານແຫ່ງລັດປະຈຳປີ 2023 ຈາກທ່ານ ວຽງທະວີສອນ ເທບພະຈັນ ປະທານ​ອົງການ​ກວດ​ສອບ​ແຫ່ງ​ລັດ; ຈາກນັ້ນ, ທ່ານ ປອ. ລີເບີ ລີບົວປາວ ປະທານກຳມາທິການແຜນການ, ການເງິນ ແລະ ການກວດສອບ ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄໍາເຫັນຕໍ່ສອງບົດລາຍ ງານດັ່ງກ່າວ ໂດຍມີບາງຂໍ້ສະເໜີໃຫ້ເອົາໃຈໃສ່ຕື່ມດັ່ງນີ້:

ຕໍ່ອົງການກວດກາແຫ່ງລັດ

1. ສືບຕໍ່ແກ້ໄຂຂໍ້ຄົງຄ້າງຂອງວຽກອົງການກວດກາແຫ່ງລັດໃນປີຜ່ານມາ ໃຫ້ມີຄວາມຄືບໜ້າຫຼາຍຂຶ້ນ;

2. ເອົາໃຈໃສ່ຈັດຕັ້ງປະຕິບັດກົດໝາຍວ່າດ້ວຍການກວດກາລັດ ເປັນຕົ້ນມາດຕາ 28 ການພິຈາລະນາຜົນການກວດກາ, ມາດຕາ 29 ການແກ້ໄຂຜົນການກວດກາ ແລະ ມາດຕາ 30 ການຕິດຕາມ, ຊຸກຍູ້, ກວດກາການແກ້ໄຂຜົນການກວດກາ ໃຫ້ເຂັ້ມງວດ ແລະ ເປັນຮູບປະທໍາຂຶ້ນກວ່າເກົ່າ;

3. ສືບຕໍ່ຊຸກຍູ້ເປົ້າໝາຍຖືກກວດກາ, ອົງການຄຸ້ມຄອງເປົ້າໝາຍຖືກກວດກາ ເປັນເຈົ້າການປະສານສົມທົບ ແລະ ໃຫ້ການຮ່ວມມືກັບອົງການກວດກາແຫ່ງລັດ ໄຈ້ແຍກ ແລະ ສັງລວມຜົນການກວດກາ ມາຮອດປັດຈຸບັນມີເທົ່າໃດ, ໄດ້ຮັບການແກ້ໄຂແລ້ວເທົ່າໃດ ແລະ ຍັງຄ້າງເທົ່າໃດ ພ້ອມທັງຈັດລຽງລຳດັບຄວາມສຳຄັນຂອງການແກ້ໄຂຜົນການກວດກາ ເປັນຕົ້ນລະດັບໃດຄວນແມ່ນຄວາມຮັບຜິດຊອບຂອງສະພາແຫ່ງຊາດ, ລະດັບໃດຄວນແມ່ນລັດຖະບານ, ກະຊວງ, ອົງການ, ສະພາປະຊາຊົນຂັ້ນແຂວງ ແລະ ອົງການປົກຄອງທ້ອງຖິ່ນ ແກ້ໄຂໄດ້ ແລະ ອັນໃດຄວນແກ້ທັນທີ, ແກ້ໃນໄລຍະສັ້ນ, ກາງ ແລະ ຍາວ ເພື່ອໃຫ້ສະພາແຫ່ງຊາດພິຈາລະນາ;

4. ສືບຕໍ່ເອົາໃຈໃສ່ກໍ່ສ້າງບໍາລຸງພະນັກງານຂອງຕົນໃຫ້ມີຄວາມຮູ້, ມີຄວາມຊໍານິຊໍານານ, ມີຄຸນນະພາບ ແລະ ມີຈັນຍາບັນ-ຈັນຍາທຳ ເພື່ອສາມາດຕອບສະໜອງກັບວຽກງານກວດກາໃນສະພາບຕົວຈິງ ແລະ ໃນໄລຍະໃໝ່;

5. ເອົາໃຈໃສ່ພັດທະນາສິ່ງອໍານວຍຄວາມສະດວກ ແລະ ຫັນເປັນທັນສະໄໝວຽກງານກວດກາ ໃຫ້ມີຄຸນນະພາບ, ມີປະສິດທິພາບ ແລະ ປະສິດທິຜົນຫຼາຍຂຶ້ນ.

ຕໍ່ອົງການກວດສອບແຫ່ງລັດ

1. ຄົ້ນຄວ້າ ແລະ ຄັດເລືອກເປົ້າໝາຍກວດສອບ ທີ່ຕິດພັນກັບການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ 2024, ພ້ອມທັງຕິດຕາມການແກ້ໄຂຜົນການກວດສອບໄປຄຽງຄູ່;

2. ຄົ້ນຄວ້າສ້າງ, ປັບປຸງນິຕິກໍາ ແລະ ຜັນຂະຫຍາຍບາງມາດຕາຂອງກົດໝາຍ ເປັນຕົ້ນມາດຕາ 67 ຜູ້ຮ່ວມງານການກວດສອບ;

3. ເຂົ້າຮ່ວມແຕ່ຫົວທີໃນການສ້າງແຜນງົບປະມານແຫ່ງລັດ ແລະ ແຜນການລົງທຶນຂອງລັດປະຈໍາປີ;

4. ຊຸກຍູ້ເປົ້າໝາຍຖືກກວດສອບ, ອົງການຄຸ້ມຄອງເປົ້າໝາຍຖືກກວດສອບ ສືບຕໍ່ເປັນເຈົ້າການປະສານສົມທົບກັບອົງການກວດສອບແຫ່ງລັດ ໄຈ້ແຍກ ແລະ ສັງລວມຜົນການກວດສອບ ມາຮອດປັດຈຸບັນມີຈຳນວນເທົ່າໃດ ແລະ ໄດ້ຮັບການແກ້ໄຂແລ້ວຈຳນວນເທົ່າໃດ, ຍັງຄ້າງຈໍານວນເທົ່າໃດ ພ້ອມທັງຈັດລຽງລຳດັບຄວາມສຳຄັນຂອງການແກ້ໄຂຜົນການກວດສອບ ເປັນຕົ້ນລະດັບໃດຄວນແມ່ນສະພາແຫ່ງຊາດ, ລະດັບໃດຄວນແມ່ນລັດຖະບານ, ກະຊວງ, ອົງການ, ສະພາປະຊາຊົນຂັ້ນແຂວງ ແລະ ອົງການປົກຄອງທ້ອງຖິ່ນ ແກ້ໄຂໄດ້ ແລະ ບັນຫາໃດຄວນແກ້ໄຂທັນທີ, ແກ້ໄຂໃນໄລຍະສັ້ນ, ກາງ, ຍາວ ເພື່ອໃຫ້ສະພາແຫ່ງຊາດພິຈາລະນາ;

5. ສືບຕໍ່ຄົ້ນຄວ້າພັດທະນາເຄື່ອງມືຮັບໃຊ້ວຽກງານກວດສອບ ເພື່ອຫັນວຽກງານການກວດສອບແຫ່ງລັດເປັນທັນສະໄໝ ໃຫ້ສາມາດເຊື່ອມໂຍງຂໍ້ມູນກັບເປົ້າໝາຍຖືກກວດສອບ ແລະ ແຫຼ່ງຂໍ້ມູນຂອງຂະແໜງການກ່ຽວຂ້ອງ ເພື່ອສາມາດຕິດຕາມກວດກາແຕ່ຫົວທີ ແລະ ເປັນປົກກະຕິ;

6. ເພີ່ມທະວີການສະໜອງຂໍ້ມູນ ແລະ ເອກະສານ ໂດຍສະເພາະບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈໍາປີ ແລະ ເອກະສານອື່ນທີ່ຈໍາເປັນ ໃຫ້ສະພາແຫ່ງຊາດ, ຄົ້ນຄວ້າພິຈາລະນາ ແລະ ທັນຕາມໄລຍະເວລາ ຕາມມາດຕາ 36 ຂອງກົດໝາຍວ່າດ້ວຍການກວດສອບແຫ່ງລັດ;

7. ສືບຕໍ່ເອົາໃຈໃສ່ກໍ່ສ້າງພະນັກງານ ແລະ ນັກກວດສອບ ໃຫ້ມີຄວາມຮູ້, ຄວາມສາມາດ, ມີຈັນຍາບັນ, ຈັນຍາທຳ ເພື່ອສາມາດຕອບສະໜອງຄວາມຮຽກຮ້ອງຕ້ອງການຂອງວຽກງານກວດສອບ ໃຫ້ມີຄຸນນະພາບ ແລະ ທັນເວລາ.

ຕໍ່ກັບຂໍ້ສະເໜີຂອງສອງອົງການ ໃຫ້ສະພາແຫ່ງຊາດພິຈາລະນາງົບປະມານນັ້ນ,​ ຄະນະປະຈໍາສະພາແຫ່ງຊາດ ຈະປະສານສົມທົບກັບລັດຖະບານ ໃຫ້ພິຈາລະນາຕາມຄວາມເໝາະສົມ.