ຂປລ. ໃນວາລະດຳເນີນກອງປະຊຸມ ຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ທີ່ໄຂຂຶ້ນຢ່າງເປັນທງການ ໃນຕອນເຊົ້າວັນທີ 22 ມີນາ 2021 ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີການນຳພັກ-ລັດ, ພະນັກງານປະຕິວັດ ອາວຸໂສ ແລະ ສະມາຊິກສະພາແຫ່ງຊາດ ເຂົ້າຮ່ວມ. ກອງປະຊຸມໄດ້ເຫັນດີ ເປັນເອກະພາບ ເລືກຕັ້ງເອົາທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ ເປັນປະທາປະເທດແຫ່ງ ສາທາລະນະລັດ ປະຊາທິປະໄຕປະຊາຊົນລາວຄົນໃໝ່ ແລະ ຮັບຮອງເອົາ ທ່ານ ນາງ ປານີ ຢາທໍ່ຕູ້ ແລະ ທ່ານ ບຸນທອງ ຈິດມະນີ  ເປັນຮອງປະທານປະເທດ.

ໂອກາດນີ້, ທ່ານ ບຸນຍັງ ວໍລະຈິດ ອະດີດເລຂາທິການໃຫຍ່ ຂອງພັກປະຊາຊົນ ປະຕິວັດລາວ, ປະທານປະເທດ (ຜູ້ເກົ່າ) ໄດ້ກ່າວ ອຳລາໜ້າທີ່ ວ່າ: ຕະຫລອດໄລຍະເວລາ 5 ປີ ທີ່ຂ້າພະເຈົ້າ ໄດ້ດໍາລົງຕໍາແໜ່ງເປັນ ປະທານປະເທດ, ຂ້າພະເຈົ້າ ມີຄວາມພາກພູມໃຈ ເປັນຢ່າງຍິ່ງ ທີ່ໄດ້ທຸ້ມເທ ທັງເຫື່ອແຮງ ແລະ ສະຕິປັນຍາຂອງຕົນ ປະກອບສ່ວນເຂົ້າໃນ ການປະຕິບັດພາລະກິດ ອັນໃຫຍ່ຫລວງ ແລະ ມີຄວາມໝາຍອັນສໍາຄັນ ໃນຫລາຍຂົງເຂດ ວຽກງານຂອງຊາດ. ດັ່ງນັ້ນ, ມາຮອດນະເວລານີ້, ກ່ອນທີ່ຂ້າພະເຈົ້າ ຈະກ່າວອໍາລາໜ້າທີ່ ໃນການດໍາລົງຕຳແໜ່ງ ປະທານ ປະເທດ ຢ່າງເປັນທາງການນັ້ນ, ຂ້າພະເຈົ້າ ຂໍຖືໂອກາດນີ້, ສະແດງຄວາມຮູ້ບຸນຄຸນ ຕໍ່ສະມາຊິກສະພາແຫ່ງຊາດຊຸດທີ VIII ທີ່ໄດ້ມອບ ຄວາມໄວ້ ວາງໃຈ ແລະ ໄດ້ເລືອກຕັ້ງໃຫ້ຂ້າພະເຈົ້າ ດໍາລົງຕໍາແໜ່ງເປັນປະທານປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະແດງ ຄວາມຂອບໃຈ ຢ່າງເລິກເຊິ່ງມາຍັງ ຄະນະບໍລິຫານງານສູນກາງພັກ, ສະພາແຫ່ງຊາດ, ລັດຖະບານ, ບັນດາກໍາລັງປະກອບອາວຸດ, ພະນັກງານ, ລັດຖະກອນ, ບັນດາອົງການຈັດຕັ້ງການເມືອງ, ເສດຖະກິດ-ສັງຄົມ ແລະ ພີ່ນ້ອງຮ່ວມຊາດທັງຢູ່ພາຍໃນ ແລະ ຕ່າງປະເທດ, ຕະຫລອດເຖິງ ເພື່ອນມິດສາກົນ ທີ່ໄດ້ໃຫ້ການຮ່ວມມື ສະໜັບສະໜູນ ແລະ ຊ່ວຍເຫລືອຂ້າພະເຈົ້າ ເຮັດຫລ້ອນໜ້າທີ່ ໃນການດໍາລົງຕຳແໜ່ງເປັນ ປະທານປະເທດ ຢ່າງສົມກຽດ ໃນຕະຫລອດໄລຍະທີ່ຜ່ານມາ. ອີງຕາມລັດຖະທໍາມະນູນ ທີ່ລະບຸວ່າ ປະທານປະເທດ ມີອາຍຸການເທົ່າກັບອາຍຸການ ຂອງສະພາ ແຫ່ງຊາດ; ມື້ນີ້ ສະພາແຫ່ງຊາດຊຸດທີ VIII ໄດ້ໝົດວາລະຂອງຕົນ, ຂ້າພະເຈົ້າທີ່ດໍາລົງຕໍາແໜ່ງ ປະທານປະເທດ ກໍໝົດວາລະຂອງຕົນເຊັ່ນດຽວກັນ.

ຈາກນັ້ນ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ກໍໄດ້ກ່າວຮັບໜ້າທີ່ ໃນຄັ້ງນີ້ວ່າ: ພະເຈົ້າ ມີຄວາມພາກພູມໃຈ ເປັນຢ່າງຍິ່ງ ແລະ ຖືເປັນກຽດອັນສູງສົ່ງ ທີ່ກອງປະຊຸມຄັ້ງປະ ຖົມມະເລີກຂອງສະພາແຫ່ງຊາດ ຊຸດທີ IX ໄດ້ເລືອກຕັ້ງ ໃຫ້ຂ້າພະເຈົ້າ ດຳລົງ ຕຳແໜ່ງເປັນປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ. ຂ້າພະເຈົ້າ ຂໍສະແດງຄວາມ ຂອບອົກຂອບໃຈ ຢ່າງຈິງໃຈ ມາຍັງບັນດາ ທ່ານສະມາຊິກ ສະພາແຫ່ງຊາດ ຊຸດທີ IX ທີ່ໄດ້ໃຫ້ຄວາມເຊື່ອໝັ້ນ ແລະ ໄວ້ວາງໃຈຕໍ່ຂ້າພະເຈົ້າ ທັງເປັນການມອບ ຄວາມຮັບ ຜິດຊອບ, ພາລະໜ້າທີ່ອັນໃຫຍ່ຫລວງ ແລະ ເຕັມໄປດ້ວຍຄວາມ ຮັບຜິດຊອບອັນສູງສົ່ງ ແລະ ໜັກໜ່ວງ ໃນການປະຕິບັດ ພາລະບົດບາດ ໃນຖານະປະມຸກແຫ່ງລັດ ຂອງສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າຂໍຮັບເອົາ ດ້ວຍຄວາມຈິງໃຈ ແລະ ຂໍໃຫ້ຄໍາໝັ້ນສັນຍາ ຕໍ່ສະພາແຫ່ງຊາດ ທີ່ຊົງກຽດແຫ່ງນີ້ ວ່າ: ຈະເຄົາລົບ ແລະ ປະຕິບັດຕາມ ລັດຖະທຳມະນູນ ແລະ ກົດໝາຍຢ່າງເຂັ້ມງວດ; ຈະຈົງຮັກພັກດີຊື່ສັດ, ບໍລິສຸດຕໍ່ປະເທດຊາດ ແລະ ປະຊາຊົນບັນດາເຜົ່າ; ຈະຮ່ວມກັບການນຳ ຂອງພັກ-ລັດ ເຮັດທຸກສິ່ງທຸກຢ່າງ ເພື່ອສ້າງເງື່ອນໄຂ ແລະ ຮັບປະກັນ ໃຫ້ປະເທດຊາດ ມີສະຖຽນລະພາບ ແລະ ຄວາມສະຫງົບປອດໄພ; ເສດຖະກິດ-ສັງຄົມ ໄດ້ຮັບການພັດທະນາຢ່າງບໍ່ຢຸດຢັ້ງ; ສືບຕໍ່ຍົກລະດັບ ຄຸນນະພາບຊີວິດ ຂອງປະຊາຊົນ ໃຫ້ນັບມື້ນັບສູງຂຶ້ນ, ສືບຕໍ່ບູລະນະລະບອບ ປະຊາທິປະໄຕປະຊາຊົນ ໃຫ້ສົມບູນຍິ່ງຂຶ້ນ, ສືບຕໍ່ຈັດຕັ້ງປະຕິບັດ ແນວທາງປ່ຽນແປງໃໝ່ຮອບດ້ານ, ມີຫລັກການຂອງພັກ ໃຫ້ເຂົ້າສູ່ລວງເລິກ ທີ່ເປັນຮູບປະທຳ, ຈະປະຕິບັດນະໂຍບາຍ ການຕ່າງປະເທດ ສັນຕິພາບ, ເອກະລາດແຫ່ງຊາດ, ມິດຕະພາບ ແລະ ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ໃນໂລກ.

ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍສະແດງຄວາມຊົມເຊີຍ ແລະ ຮູ້ບຸນຄຸນ ເປັນຢ່າງສູງມາຍັງງ ທ່ານ ບຸນຍັງ ວໍລະຈິດ ອະດີດເລຂາທິ ການໃຫຍ່ຂອງ ພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ, ເຊິ່ງທ່ານເປັນຜູ້ນຳຍຸດ ທະສາດສຳຄັນຜູ້ໜຶ່ງ ຂອງພັກ ແລະ ລັດເຮົາ, ເປັນນັກປະຕິວັດທີ່ອົງອາດແກ່ນ ທີ່ໄດ້ອຸທິດຄວາມຮູ້, ຄວາມສາມມາດ, ສະຕິປັນຍາ, ເຫື່ອແຮງ ຢາງບໍ່ຮູ້ອິດບໍ່ຮູ້ເມື່ອຍ ເຂົ້າໃນພາລະກິດຕໍ່ສູ້ກູ້ຊາດ ແລະ ພາລະກິດປົກປັກຮັກສາ ແລະ ພັດທະນາປະເທດຊາດ ຂອງພວກເຮົາ ໃນຕະຫລອດໄລຍະ ຫລາຍທົດ ສະວັດທີ່ຜ່ານມາ. ໂດຍໄດ້ຖືກມອບໝາຍ ໜ້າທີ່ຕໍ່ຈາກ ສະຫາຍ ບຸນຍັງ ວໍລະຈິດ ນັບແຕ່ມື້ນີ້ເປັນຕົ້ນໄປ ຂ້າພະເຈົ້າ ຂໍຮຽກຮ້ອງມາຍັງ ການນຳ ຂອງພັກ ແລະ ລັດ ທຸກໆຂັ້ນລວມທັງພະນັກງານ, ທະຫານ, ຕຳຫລວດ ຕະຫລອດເຖິງ ປະຊາຊົນລາວ ໃນທົ່ວປະເທດ ແລະ ພີ່ນ້ອງເຊື້ອຊາດ ລາວຢູ່ຕ່າງປະເທດ ຈົ່ງພ້ອມກັນເຊີດຊູ ນ້ຳໃຈຮັກຊາດ, ເພີ່ມທະວີຄວາມສາມັກຄີ ເປັນປຶກແຜ່ນ, ເສີມຂະຫຍາຍມູນເຊື້ອ ດຸໝັ່ນຂະຫຍັນພຽນ ຂອງຊາດ, ປະກອບ ສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ເຮັດໃຫ້ຄວາມມຸ່ງມາດປາຖະໝາ ຂອງປະຊາຊົນ ກໍຄື ຈຸດໝາຍ ສ້າງປະເທດ ໃຫ້ຮັ່ງມີຜາສຸກ, ປະເທດຊາດ ມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີ ເປັນປຶກແຜ່ນ, ປະຊາທິປະໄຕ, ຍຸຕິທຳ ແລະ ສີວິໄລ ປະກົດຜົນເປັນຈິງ.

ແຫຼ່ງຂ່າວທີ່ມາ: ຂ່າວສານປະເທດລາວ