(ສພຊ) ຕອບສະໜອງການເຊື້ອເຊີນຂອງທ່ານ ເມິງຄ໌ບາທາຣ໌ ລັກຄະວາ ຮອງປະທານສະພາຄູຣານໃຫຍ່ ແຫ່ງ ມົງໂກລີ ແລະ ເພື່ອເປັນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືທີ່ດີ ລະຫວ່າງ ສປປລາວ-ມົງໂກລີ ເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດ.
ວັນທີ 15 ມີນາ 2024 ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງຢ້ຽມຢາມ ແລະ ເຮັດວຽກຢູ່ມົງໂກລີ ຢ່າງເປັນທາງການ.
ອອກຕ້ອນຮັບຄະນະທີ່ສະໜາມບິນຂອງທ່ານ ເອັງຄ໌-ອໍາກາລັງ ສະມາຊິກສະພາຄູຣານໃຫຍ່, ປະທານ ກໍາມາທິການຄວາມໝັ້ນຄົງ ແລະ ນະໂຍບາຍຕ່າງປະເທດຂອງສະພາຄູຣານໃຫຍ່, ປະທານຄະນະມິດຕະພາບ ລັດ ຖະສະພາ ມົງໂກລີ-ລາວ ພ້ອມດ້ວຍຄະນະ ແລະ ທ່ານ ແພງສະຫວັນ ແກ້ວປະເສີດ ເອກອັກຄະລັດຖະທູດລາວ ປະຈໍາປະເທດມົງໂກລີ.
ຕອນເຊົ້າວັນທີ 16 ມີນາ 2024 ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປລາວ ໄດ້ມີການພົບປະສອງຝ່າຍກັບທ່ານ ເມິງຄ໌ບາທາຣ໌ ລັກຄະວາ ຮອງປະທານສະພາຄູຣານໃຫຍ່ ແຫ່ງ ມົງ ໂກລີ ພ້ອມດ້ວຍຄະນະ.
ທ່ານຮອງປະທານສະພາຄູຣານໃຫຍ່ ແຫ່ງ ມົງໂກລີ ໄດ້ສະແດງຄວາມຕ້ອນຮັບອັນອັບອຸ່ນ ແລະ ຕີລາຄາສູງ ຕໍ່ການຢ້ຽມຢາມ ແລະ ເຮັດວຽກຂອງທ່ານຮອງປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະໃນຄັ້ງນີ້ ເຊິ່ງເປັນການປະກອບສ່ວນສໍາຄັນໃຫ້ແກ່ການເພີ່ມພູນຄູນສ້າງສາຍພົວພັນຮ່ວມມືທີ່ມີມູນເຊື້ອມາເປັນເວລາ 60 ກວ່າປີ ໃຫ້ນັບມື້ນັບມີປະສິດທິຜົນຍິ່ງໆຂຶ້ນ ແລະ ໄດ້ລາຍງານໃຫ້ຄະນະຊາບກ່ຽວກັບບັນດາຜົນສໍາເລັດໃນການ ພັດທະນາດ້ານເສດຖະກິດຂອງມົງໂກລີ ໃນໄລຍະຜ່ານມາ.
ໃນນາມຕາງໜ້າໃຫ້ຄະນະຜູ້ແທນສະພາແຫ່ງຊາດ ແຫ່ງ ສປປລາວ, ທ່ານຮອງປະທານສະພາແຫ່ງຊາດ ໄດ້ ສະແດງຄວາມຮູ້ສຶກເປັນກຽດຢ່າງສູງທີ່ໄດ້ມີໂອກາດມາຢ້ຽມຢາມ ແລະ ເຮັດວຽກຢູ່ປະເທດມົງໂກລີເປັນຄັ້ງທຳອິດ ໃນນາມຮອງປະທານສະພາແຫ່ງຊາດ ແຫ່ງ ສປປລາວ ຊຸດທີ IX, ຕີລາຄາສູງຕໍ່ຜົນການຮ່ວມມືອັນເປັນມູນເຊື້ອທີ່ດີ ລະຫວ່າງ ລາວ-ມົງໂກລີ ເວົ້າລວມ, ເວົ້າສະເພາະ ລະຫວ່າງສອງອົງການນິຕິບັນຍັດ, ພ້ອມທັງໄດ້ແຈ້ງສະພາບການທີ່ ພົ້ນເດັ່ນພາຍໃນປະເທດມົງໂກລີ ໃຫ້ໄດ້ຮັບຊາບ; ທ່ານໄດ້ຕີລາຄາສູງ ແລະ ຊົມເຊີຍຢ່າງຈິງໃຈຕໍ່ຜົນສໍາເລັດອັນ ໃຫຍ່ຫຼວງທີ່ປະຊາຊົນມົງໂກລີ ຍາດມາໄດ້ຕະຫຼອດໄລຍະຜ່ານມາ ເຊິ່ງເຫັນໄດ້ເສດຖະກິດມີການຂະຫຍາຍຕົວດີ, ລວມຍອດຜະລິດຕະພັນພາຍໃນ (GDP) ຂອງມົງໂກລີ ຂະຫຍາຍຕົວໃນອັດຕາ 6,8% ໃນປີ 2023, ຖານະບົດ ບາດຂອງມົງໂກລີ ນັບມື້ນັບພົ້ນເດັ່ນຂຶ້ນໃນເວທີພາກພື້ນ ແລະ ໃນໂລກ.
ຫຼັງຈາກນັ້ນ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປລາວ ແລະ ທ່ານ ລ.ເມິງຄ໌ບາທາຣ໌ ຮອງປະທານສະພາຄູຣານໃຫຍ່ ແຫ່ງ ມົງໂກລີ ໄດ້ເຂົ້າຮ່ວມເປັນສັກຂີພະຍານພິທີລົງນາມ ໃນບົດບັນທຶກມອບ-ຮັບເຄື່ອງເຟີນີເຈີ ຂອງຂວັນຈາກສະພາແຫ່ງຊາດ ແຫ່ງ ສປປລາວ ມອບໃຫ້ແກ່ສະພາຄູຣານ ໃຫຍ່ ແຫ່ງ ມົງໂກລີ, ໂດຍຜູ້ລົງນາມຝ່າຍລາວແມ່ນທ່ານ ສິງຄໍາ ວົງພະຈັນ ຮອງເລຂາທິການສະພາແຫ່ງຊາດ ແຫ່ງ ສປປລາວ, ຝ່າຍມົງໂກລີ ແມ່ນທ່ານ ຊ.ບັດບາທາຣ໌ ຮອງຫົວໜ້າຫ້ອງວ່າການສະພາຄູຣານໃຫຍ່ ແຫ່ງ ມົງໂກລີ.
ໃນຕອນເຊົ້າຂອງວັນດຽວກັນ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປລາວ ໄດ້ເຂົ້າຢ້ຽມຂໍ່ານັບພະນະທ່ານ ກອມບໍຈາວ ຊັງຕັງຊາທາຣ໌ ປະທານສະພາຄູຣານໃຫຍ່ ແຫ່ງ ມົງໂກລີ ເຊິ່ງທ່ານປະທານສະພາຄູຣານໃຫຍ່ ແຫ່ງ ມົງໂກລີ ໄດ້ສະແດງຄວາມຕ້ອນຮັບອັນອັບອຸ່ນຕໍ່ການຢ້ຽມຢາມ ແລະ ເຮັດວຽກຂອງທ່ານຮອງປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະໃນຄັ້ງນີ້ ທັງໄດ້ຕີລາຄາສູງຕໍ່ ມູນເຊື້ອການພົວພັນຮ່ວມມືລະຫວ່າງ 2 ປະເທດ ກໍຄືລະຫວ່າງອົງການນິຕິບັນຍັດຂອງ 2 ປະເທດ ຕະຫຼອດໄລ ຍະຜ່ານມາ.
ທ່ານຮອງປະທານສະພາແຫ່ງຊາດ ແຫ່ງ ສປປລາວ ໄດ້ສະແດງຄວາມຂອບໃຈຕໍ່ການຕ້ອນຮັບທີ່ອົບອຸ່ນ, ສະໜິດສະໜົມ ຂອງປະທານສະພາຄູຣານໃຫຍ່ ແຫ່ງ ມົງໂກລີ ເຊິ່ງການຢ້ຽມຢາມ ແລະ ເຮັດວຽກຂອງຄະນະຜູ້ ແທນສະພາແຫ່ງຊາດ ແຫ່ງ ສປປລາວ ຄັ້ງນີ້ ເປັນການປະກອບສ່ວນເສີມຂະຫຍາຍສາຍພົວພັນທີ່ເປັນມູນເຊື້ອດີ ງາມລະຫວ່າງປະຊາຊົນ 2 ຊາດພວກເຮົາ; ທ່ານຍັງໄດ້ນໍໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍ ພອນໄຊອັນປະເສີດຈາກພະນະທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄປ ຍັງພະນະທ່ານປະທານສະພາຄູຣານໃຫຍ່; ທ່ານໄດ້ສະແດງຄວາມຊົມເຊີຍທີ່ໄດ້ເຫັນຜົນສຳເລັດຮອບດ້ານໃນການ ພັດທະນາປະເທດມົງໂກລີ ອັນໄດ້ເຮັດໃຫ້ໃບໜ້າຂອງປະເທດຊາດມີການປ່ຽນແປງຢ່າງຫຼວງຫຼາຍ, ເສດຖະກິດມີ ການພັດທະນາ, ຊີວິດການເປັນຢູ່ຂອງປະຊາຊົນນັບມື້ໄດ້ຮັບການປັບປຸງດີຂຶ້ນ, ບົດບາດອິດທິພົນຂອງປະເທດມົງ ໂກລີໃນເວທີພາກພື້ນ ແລະ ສາກົນ ນັບມື້ນັບສູງຂຶ້ນ. ທ່ານຮອງປະທານສະພາແຫ່ງຊາດລາວ ຍັງໄດ້ລາຍງານກ່ຽວ ກັບການພົບປະກັບທ່ານຮອງປະທານສະພາຄູຣານໃຫຍ່ ແຫ່ງ ມົງໂກລີ, ເຊິ່ງທັງສອງຝ່າຍໄດ້ມີການປຶກສາຫາລື ແລະ ແລກປ່ຽນບົດຮຽນກັນຫຼາຍບັນຫາ ແນໃສ່ຊຸກຍູ້ ແລະ ສົ່ງເສີມການພົວພັນຮ່ວມມືເຊິ່ງກັນ ແລະກັນໃນຂົງ ເຂດນິຕິບັນຍັດ, ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ; ທ່ານຮອງປະທານສະພາແຫ່ງຊາດລາວ ໄດ້ສະ ແດງຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫຼືອ, ສະໜັບສະໜູນຂອງປະຊາຊົນມົງໂກລີ ໃຫ້ແກ່ປະຊາຊົນລາວ ຕະຫຼອດການ.
ການມາຢ້ຽມຢາມ ແລະ ເຮັດວຽກໃນຄັ້ງນີ້ ເປັນການຜັນຂະຫຍາຍ ຜົນສໍາເລັດຂອງການຢ້ຽມຢາມ ມົງໂກລີ ຢ່າງເປັນທາງການ ຂອງ ທ່ານປະທານສະພາແຫ່ງຊາດ ແຫ່ງ ສປປ ລາວ ໃນເດືອນກັນຍາ ປີ 2023, ທັງເປັນການຕາງໜ້າ ລັດຖະບານ ສປປ ລາວ ກໍ່ຄື ສະພາແຫ່ງຊາດລາວ ນໍາເອົາໂຕະຕັ່ງໄມ້ເນື້ອແຂງ ຈຳນວນ 50 ຊຸດ ໄດ້ມອບເປັນຂອງຂວັນ ໃຫ້ແກ່ສະພາຄູຣານໃຫຍ່ມົງໂກລີ ເນື່ອງໃນໂອກາດທີ່ສະພາຄູຣານໃຫຍ່ ຈະມີຈໍານວນສະມາຊິກເພີ່ມຂຶ້ນອີກ ໃນການເລືອກຕັ້ງຄັ້ງທີ່ຈະມາເຖິງໃນເດືອນມິຖຸນາ ໜ້ານີ້.
ໃນຕອນທ່ຽງຂອງວັນດຽວກັນ, ທ່ານ ເມິງຄ໌ບາທາຣ໌ ຮອງປະທານສະພາຄູຣານໃຫຍ່ ແຫ່ງ ມົງໂກລີ ໄດ້ຈັດ ງານລ້ຽງອາຫານທ່ຽງຕ້ອນຮັບທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ດ້ວຍບັນຍາກາດແຫ່ງໄມຕີຈິດມິດຕະພາບອັນສະໜິດສະໜົມ.
ນອກຈາກການເຄື່ອນໄຫວຢູ່ນະຄອນຫຼວງອູລັນບາຕໍ ແລ້ວ ຍັງໄດ້ຢ້ຽມຊົມອານຸສອນສະຖານ ຈິງກິສຄານ ກະສັດຜູ້ຍິ່ງໃຫຍ່ຂອງມົງໂກລີ, ຢ້ຽມຢາມສະຖານທີ່ທ່ອງທ່ຽວ, ຫໍພິພິທະພັນແຫ່ງຊາດ ແລະ ພື້ນຖານວັດທະນະ ທໍາຈໍານວນໜຶ່ງ, ຄະນະຍັງໄດ້ໄປຢ້ຽມຢາມພົບປະກັບພະນັກງານສະຖານທູດລາວ ປະຈໍາມົງໂກລີອີກດ້ວຍ.